“Udi mua kuikala mpanda-njila muimpe”
1. Mmushindu kayi uvua muanetu wa bakaji mukuabu wangata mudimu wende wa bumpanda-njila?
1 Kathe Palm wakamba ne: “Tshivua mua kupeta mudimu mukuabu uvua mua kumpesha disanka ne kukolesha malanda anyi ne Nzambi to.” Muanetu eu wakadifila bidimu bia bungi mu mudimu wa bumpanda-njila wenda uyisha mu ditunga dijima dia Chili didi ku Sud kua Amerique. Muntu mukuabu uvua mua kuikala wela meji ku masanka a bumpanda-njila ne yeye kukuambila ne: “Udi mua kuikala mpanda-njila muimpe.”
2. Leja bua tshinyi mudimu wa Yehowa utu upetesha masanka a bungi.
2 Mudimu udi upetesha disanka: Kuenza disua dia Nzambi kuvua kukolesha Yezu udi tshilejilu tshietu. (Yone 4:34) Ke bualu kayi wakalongesha bayidi bende ne: disanka dilelela didi difumina ku dienza midimu idi ipetangana ne ntendelelu wa Yehowa. Tudi tumvua bimpe patudi tuenza midimu idi isankisha Yehowa. Patudi kabidi tudifila ne bukole buetu buonso ne bionso bitudi nabi bua kuambuluisha bakuabu, disanka dietu didi divula.—Bien. 20:31, 35.
3. Patudi tuyisha bikole, netupete tshinyi?
3 Tuetu tuyisha bikole tudi tupeta mpunga ya bungi ya kutuadija kulongesha bantu Bible. Tudi mua kufika ku dimona ne: teritware uvua umueneka muikale ne bantu ba bungi bavua kabayi batuleja mmuimpe patudi tulengeja mudimu wetu ne tuuvudija. Bampanda-njila badi mua kutumikila malu a bungi adibu balonga mu Kalasa ka Bampanda-njila kadibu babuela pakadibu ne tshidimu tshijima mu bumpanda-njila. (2 Tim. 2:15) Patudi tusuminyina tudi mua kukuna ntente ya bulelela yalua kutoloka pashishe.—Muam. 11:6.
4. Ntshinyi tshidi bansonga bakadi pa kujikija tulasa tuabu ne bua kukonkonona?
4 Bansonga: Panukadi nujikija tulasa tuenu, nukadiku bele meji bua tshinuenza anyi? Mpindieu midimu ya mu kalasa idi ikuangata mêba a bungi. Ntshinyi tshiwenza ne dîba diuvua uyenza? Pamutu pa kukeba midimu idi mua kutuangata dîba dia bungi, kanuenaku mua kuela meji ne kusambila bua kulua bampanda-njila ba pa tshibidilu anyi? Malu awalonga mu mudimu eu bu mudi kuyisha bantu ba miaba mishilashilangane, kutantamena ntatu, kumanya mua kudikanda ne mua kulongesha bimpe neakuambuluishe matuku ebe onso a muoyo.
5. Ntshinyi tshidi baledi ne bena mu tshisumbu mua kuenza bua kukankamija bansonga bua kuluabu bampanda-njila?
5 Nuenu baledi nudiku nuambuluisha bana benu bua kusungulabu mudimu wa bumpanda-njila anyi? Mêyi enu ne tshilejilu tshienu tshimpe bidi mua kubambuluisha bikole bua kuteka malu a Bukalenge pa muaba wa kumpala. (Mat. 6:33) Muanetu Ray uvua mutuadije bumpanda-njila pakajikijaye tulasa tua bikadilu udi wamba ne: “Mamu uvua wela meji ne: bumpanda-njila ke mudimu utu upetesha masanka a bungi.” Bena mu tshisumbu bonso badi mua kusakangana ku diangata bumpanda-njila padibu bakula bimpe bua mudimu eu ne bautua nyama ku mikolo. Tshilejilu, Jose muanetu wa mu ditunga dia Espagne udi wamba ne: “Bena mu tshisumbu tshietu bavua bamona bumpanda-njila bu mudimu muimpe bua bansonga. Malu avuabu bamba, mushindu uvuabu banyisha mudimu eu ne diambuluisha diabu biakangambuluisha bua kulua mpanda-njila.”
6. Ntshinyi tshitudi mua kuenza patudi katuyi ne dijinga dia kulua bampanda-njila?
6 Kutantamena ntatu: Kadi netuambe tshinyi wewe udiambila ne: ‘tshiena musue kulua mpanda-njila.’ Pikalabi nanku, ambila Yehowa bua muudi udiumvua ne muambila ne: ‘Tshiena mumanye bikala bumpanda-njila mbunkumbayine, kadi ndi musue kukusankisha.’ (Mus. 62:8; Nsu. 23:26) Pashishe keba mibelu mu Dîyi diende ne kudi bulongolodi buende. Bampanda-njila ba pa tshibidilu ba bungi bavua banji ‘kuteta’ bumpanda-njila buambuluishi ne masanka avuabu bapete akabasaka bua kulua bampanda-njila ba pa tshibidilu.—Mus. 34:8.
7. Ntshinyi tshiudi mua kuenza paudi udiambila ne: tshiakukumbaja mêba 70?
7 Tshiudi mua kuenza ntshinyi wewe udiambila ne: kuakukumbaja mêba 70 ku ndekelu wa ngondo? Udi mua kuyukila ne bampanda-njila badi ne nsombelu wa muomumue nebe. (Nsu. 15:22) Pashishe enza programe mishilangane ne uyifunde. Neumone ne: mbipepele bua kuyisha mêba auvua wenza malu avua kaayi ne mushinga.—Ef. 5:15, 16.
8. Bua tshinyi tudi ne bua kukonkonona nsombelu wetu ku musangu ne ku musangu?
8 Konkonona nsombelu webe: Nsombelu wetu udi mua kushintuluka, ke bualu kayi tudi ne bua kudikonkonona misangu yonso. Tshilejilu, ukadi pa kupeta pansio anyi? Muanetu Randy uvua mupete pansio mutshikale ne makanda udi wamba ne: “Dipangadika edi ndingambuluishe bua kulua mpanda-njila pamue ne mukajanyi ne nditupeshe mushindu wa kuya muaba udibu dijinga ne bamanyishi ba Bukalenge. Dipangadika edi ndimpeteshe masanka a bungi, kadi kuikala ne kondo ka muoyo kimpe ke disanka ditambe bunene dindi mupete.”
9. Ntshinyi tshidi badi mu mabaka mua kuenza?
9 Bantu ba bungi badi mu mabaka mbamone panyima pa bobu bamane kukonkonona nsombelu wabu ne: bonso babidi kabena ne bua kuenza midimu yabu idi ibangata dîba dia bungi to. Bidi mua kubalomba bua kukepesha amue malu mu nsombelu wabu, kadi kuenza nunku nekubapeteshe masanka a bungi. Tshilejilu, mukaji wa John mmulekele mudimu wende uvua umuangata dîba dia bungi bua kulua mpanda-njila. John udi wamba ne: “Kakuena disanka didi dipite dia kumanya ne: mukajanyi mmudifile mu mudimu wa Yehowa mu munya muonso emu.”
10. Ntshinyi tshidi tshisaka bena Kristo bua kulua bampanda-njila?
10 Tshijadiki tshia dinanga ne ditabuja: Yehowa mmuenze bua mudimu wa kuyisha wikale ne mushinga kupita yonso itudi mua kuenza. Ukadi pa kubutula bulongolodi bubi ebu ne anu bantu badi batendekena dîna diende ke basungidibua. (Lomo 10:13) Tuetu bamunange ne muoyo wetu mujima ne tuanyisha bionso bidiye utuenzela nebitusake bua kutumikila dîyi dia Muanende dia kuyisha ne tshisumi. (Mat. 28:19, 20; 1 Yone 5:3) Tuetu bashindike kabidi ne: tudi mu matuku a ku nshikidilu, nebitusake bua kudifila ne muoyo mujima mu mudimu wa kuyisha patshidi dîba dikalaku, pamutu pa kulonda malu a pa buloba.—1 Kol. 7:29-31.
11. Tudi mua kumona bishi muntu yeye mutuambila ne: udi mua kulua mpanda-njila muimpe?
11 Kuikala mpanda-njila wa tshibidilu kakuena anu kukumbaja kua mêba tshianana, kadi kudi kuleja mutudi banange Nzambi ne muoyo mujima. Nunku padi muntu ukuambila ne: udi mua kuikala mpanda-njila muimpe, umone bualu abu bu kalumbandi. Ubuelele meji ne usambile bua ubuele pebe mu mulongo wa bantu badi benzela Nzambi mudimu eu.
[Lungenyi lunene lua mu dibeji 4]
Baledi, nudiku nusaka bana benu bua kuluabu bampanda-njila anyi?
[Lungenyi lunene lua mu dibeji 5]
Yehowa mmuenze bua mudimu wa kuyisha wikale ne mushinga kupita yonso itudi mua kuenza.