Udi ne dîsu dimpe anyi?
1. Kuikala ne ‘dîsu dimpe’ kudi kumvuija tshinyi?
1 Bintu bitu mêsu etu amona bitu bitusaka bua kuenza malu kampanda. Ke bualu kayi Yezu wakamba ne: “bikala disu diebe dimona tshintu bimpe, mubidi webe wonso neutoke ne munya.” (Mat. 6:22) Padi dîsu dietu ‘dimpe’ bu muvua Yezu muambe, nedimanyine pa kipatshila ka kuenza disua dia Nzambi. Tudi tuteka Bukalenge bua Nzambi pa muaba wa kumpala ne katuena tulekela biuma anyi midimu ya tshianana bitupangisha bua kuyisha.
2. Ntshinyi tshidi mua kunyanga lumonu luetu? Kadi ntshinyi tshiatuambuluisha?
2 Tudi ne bua kudikonkonona: Lumonu luetu ludi mua kunyanguka patudi tuteleja madisuisha a ku tudiomba adi atuambila tshitudi natshi dijinga anyi patudi tutangila bintu bidi nabi bakuabu. Kumpala kua kusumba tshintu anyi kuenza bualu bupiabupia budi mua kutuangata dîba dia bungi, makuta a bungi anyi bukole bua bungi, mbimpe ‘kubala mushinga’ pa kudikonka ne: ‘Tshintu etshi anyi bualu ebu nebungambuluishe bua kuvudija mudimu undi ngenzela Yehowa anyi nebumpangishe bua kuwenza?’ (Luka 14:28; Filip. 1:9-11) Mbimpe kabidi kukonkonona ku musangu ne ku musangu mushindu utudi mua kumbusha malu adi kaayi ne mushinga mu nsombelu wetu bua kumona mua kuvudija mudimu wetu wa kuyisha.—2 Kol. 13:5; Ef. 5:10.
3. Ntshinyi tshitudi tulongela kudi muanetu wa bakaji mukuabu uvua mumbushe malu avua kaayi ne mushinga mu nsombelu wende?
3 Pavua muanetu wa bakaji mukuabu mulue mpanda-njila wa pa tshibidilu wakangata dipangadika dia kutungunuka ne mudimu wa bianza uvua umuangata mêba a bungi nansha muvua mudimu wa mêba makese mua kumupetesha makuta makumbane bua majinga ende. Ndekelu wa bionso wakalua kumona ne kabivua mua kukumbana ke kuambaye ne: “Muntu kena mua kuenzela bamfumu babidi mudimu. Bivua bikengela kulekela bintu bivua muoyo wanyi musue ne kuenza anu bivua ne mushinga wa bungi. Ngakamona ne: biuma bitu binyanguka ne kukeba kupeta bintu bivua muoyo wanyi musue kuvua mua kuntshiokesha.” Nsombelu wende wakamuambuluisha bua kumbusha malu avua kaayi ne mushinga mu nsombelu wende, kushintulula mudimu ne kutungunuka ne bumpanda-njila.
4. Bua tshinyi bidi ne mushinga bua kulama dîsu dimpe mpindieu?
4 Bu mutudi mu tshikondo tshibi, mbimpe tulame dîsu dietu dimpe. Dituku dionso didi dienda dipita didi dienda ditusemeja ku nshikidilu wa tshikondo etshi ne ku bulongolodi bupiabupia bua Nzambi. (1 Kol. 7:29, 31) Patudi tuditua mu diyisha bikole, tudi mua kudisungila tuetu ne bantu badi batuteleja.—1 Tim. 4:16.