Neutuadijaku kulongesha muntu Bible mu ngondo wa 10 emu anyi?
1. Mu ngondo wa dikumi netufile mikanda kayi?
1 Mu ngondo wa dikumi emu netupeshe bantu Tshibumba tshia Nsentedi ne Réveillez-vous! Bua kulondolola bantu badi bitaba, netubapeshe trakte wa Kuenaku musue kupeta mandamuna a nkonko eyi anyi? ne kudienzeja bua kutuadija kubalongesha Bible. Tudi mua kuenza tshinyi bua kutuadija kulongesha muntu Bible patudi tumupinganyina?
2. Leja mushindu utudi mua kuyisha ne trakte wa Kuenaku musue kupeta mandamuna bua kutuadija kulonga Bible ne muntu utuvua bashile bibejibeji patudi tumupinganyina.
2 Mua kuyisha ne trakte eu: Tudi mua kuamba ne: “Bibejibeji bimvua mukushile bidi bisaka bantu ba miaba yonso ne ba mu bitanda bionso bua kulonga Bible. [Pesha muntu trakte wa Kuenaku musue kupeta mandamuna a nkonko eyi anyi? ne muleje nkonko idi pa mutu.] Tangila imue nkonko minene idi Bible wandamuna bimpe menemene. Ukadiku mudiele nansha lumue lua ku nkonko eyi anyi?” Wewe mumane kumvua diandamuna dia muntu, nubale nende mu trakte eu diandamuna dia lumue lua ku nkonko yende, nubale mvese umue wa ku idibu bafunde. Tumumvuije pashishe ne: etshi ntshilejilu tshikese tshia malu adi Bible wamba; umupeshe mpindieu mukanda wa Bible ulongesha. Tudi mua kukonkonona nende bikoso bia ntuadijilu bia nshapita udiye musungule mu tshikebelu tshia mukanda eu. Anyi tudi mua kukonkonona nende tshiena-bualu tshidi tshiakula malu a bungi a buena atuvua babale nende mu trakte. Imue ya ku miaba itudi mua kukonkonona nende nyoyi eyi:
• Nzambi utu mutunange anyi? (dib. 9-11, tshik. 6-10)
• Makenga ne mvita nebijike anyi? (dib. 12, tshik. 12-13)
• Padi muntu ufua utu uya penyi? (dib. 59-60, tshik. 7-8)
• Netumonaku kabidi bantu batudi bafuishe anyi? (dib. 71, tshik. 13-15)
• Ndi mua kuenza tshinyi bua Nzambi kuteleja masambila anyi? (dib. 166-167, tshik. 5-8)
• Mmunyi mundi mua kupetaku panyi disanka? (dib. 9, tshik. 4-5)
3. Bilondeshile nsombelu, mmushindu kayi utudi mua kushintulula mushindu wetu wa kuyikila ne bantu?
3 Kadi pikalaku kakuyi mushindu wa tuetu kutuadija kulongesha muntu Bible ne kumuleja mututu tulonga mukanda wa Bible ulongesha anu musangu wa kumpala utudi tumupinganyina, tudi pamuapa mua kupunga nende dîyi bua kumupinganyina ne kutungunuka ne muyiki wetu. Bilondeshile muikala muntu mua kusankidila bulelela, tudi mua kuenza bua kuyikidila nende pa nkonko ya bungi mu trakte misangu bungi kampanda itudi tumupinganyina kumpala kua tuetu kumuleja mukanda wa Bible ulongesha. Tuenzayiku mudimu bimpe ne trakte eu wa mushinga mukole mu ngondo wa dikumi mujima bua kutuadija kulonga Bible ne bantu ne bua kuambuluisha bantu ba muoyo mutoke bua ‘bamanye bulelela.’—Yone 8:31, 32.