Broshire mupiamupia wa kufila mu buambi
1. Mbroshire kayi utuafila mu ngondo wa 11? Mbamuenze bua tshinyi?
1 Mu Mpungilu wetu wa Distrike wa mu 2009 wa “Nuikale batabale,” bavua bapatule broshire mupiamupia uvua ne tshiena-bualu ne: La Bible—Quel est son message? Mu ngondo wa 11, bisumbu bionso nebimufile bua musangu wa kumpala mu buambi. Kadi mmunyi muikala broshire eu mua kuambuluisha bantu ba mu teritware yetu? Bantu ba bungi nangananga badi mu bitendelelu bidi kabiyi bitaba Yezu ki mbamanye malu a bungi a mu Bible to. Ke bua tshinyi, mu dibeji 3 dia broshire eu, badi balejamu ne: broshire eu mmuenza bua “kumvuija muntu Bible mu kabujima kende.”
2. Mmushindu kayi utuafila broshire eu?
2 Mushindu wa kumufila: Tudi mua kuamba ne: “Udi pebe wela meji kayi bua tshidi Bible wamba mu mvese eu. [Bala 2 Timote 3:16.] Bantu ba bungi badi bitaba mêyi aa, kadi bakuabu badi bamba ne: Bible mmukanda muimpe patupu, kena ne bua nsongo bukuabu to. Kadi wewe udi wela meji kayi bua Bible? [Lekela muntu andamune.] Nansha tuetu mu tshitendelelu kayi, tumanye ne: kudi malu mimpe adi atusaka bua kudilongela Bible. [Mubadila tshikoso tshia ntuadijilu tshidi mu dibeji 3.] Paudi wenda ubala tshikepeshilu tshia Bible tshidi tshilenga ku muoyo bikole tshidibu baleje mu broshire eu, neumone ne: Bible mujime udi ne tshiena-bualu anu tshimue.”
3. Mmunyi mutudi kabidi mua kufila broshire nangananga mu teritware udi bantu mu bitentendelelu bidi kabiyi bitaba Yezu?
3 Bantu ba muaba utudi tuyisha bobu bikale mu bitendelelu bidi kabiyi bitaba Yezu, tudi nansha mua kuamba ne: “Buebe wewe mêyi adibu bamba mu Mifundu (anyi mukanda wa tshijila) aa adi umvuija tshinyi? [Bala Musambu wa 37:11.] Pakumbana mulayi eu, pa buloba nepikale mushindu kayi? [Lekela muntu andamune.] Mulayi wa mu Bible eu udi ukolesha bantu ba mu bisamba bionso ne ba mu bitendelelu bionso ku muoyo ne udi ubapesha ditekemena.” Bala tshikoso tshidi ku ntuadijilu kua dibeji 3 ne fila broshire.
4. Leja mutudi mua kuenza mudimu ne broshire eu bua kutuadija kulonga Bible ne bantu.
4 Tuadija kulonga Bible ne bantu: Patudi tupinganyina muntu, tudi mua kumuvuluija malu a mu tshiena-bualu tshituvua bayukile musangu mushale, kuambulula tshikoso tshimue anyi bibidi ne kumuela nkonko idi ku ndekelu kua tshitupa tshituvua basungule. Kadi bituikala basue kupesha muntu mukanda wa Bible ulongesha diakamue, tudi mua kumubadila malu adi pa tshizubu tshia ndekelu tshia broshire, kumupesha mukanda, kumulomba bua asungule tshiena-bualu tshidi tshimusankisha ne kulonga nende tshikoso tshimue anyi bibidi mu nshapita au. Muntu yonso enze muende muonso bua kufila broshire eu mu ngondo wa 11.