Enza nende mudimu dîba dionso
1. Trakte wa Kupeta mandamuna a nkonko udi ne mushinga kayi?
1 Bavua bapatule trakte wa Kuenaku musue kupeta mandamuna a nkonko eyi anyi? bua kutuambuluisha bua kutuadija kulonga Bible ne bantu. Udi kabidi utuambuluisha bua kukuna ntete ya bulelela. (Muam. 11:6) Tumonayi imue mishindu idi mua kutuambuluisha bua kuenza nende mudimu bimpe.
2. Mmunyi mutudi mua kuenza mudimu ne trakte eu bua kutuadija kuyikila ne bantu?
2 Mua kutuadija muyuki: Udi mua kupesha muntu trakte, kumuleja nkonko isambombo idi pa mutu, pashishe kumuebeja ne: “Leja lukonko ludi lukoka ntema yebe ku nkonko yonso eyi.” Padiye ukulejalu, nubale nende diandamuna dia mu trakte didi Bible ufila, nubale kabidi mvese umue wa ku idi mu diandamuna adi. Umubadile malu adi mu dibeji dia ndekelu anyi umuambilewu mu tshikoso, pashishe umupeshe mukanda wa Bible ulongesha. Nansha yeye mubenge mukanda, ukadi mumane kuangata trakte wambuluisha bua bulelela kuasabu miji mu muoyo wende.—Mat. 13:23.
3. Muntu yeye kayi ne dîba, tudi mua kuenza tshinyi?
3 Padi muntu kayi ne dîba: Udi mua kuamba ne: “Bu muudi kuyi ne dîba, ndi nkushilaku trakte eu. Mudi nkonko isambombo minene itu bantu ba bungi badiela ne mandamuna adi Bible nkayende ufila bua nkonko eyi. Pangapingana kabidi, netuyukile malu adimu.”
4. Leja tshitudi mua kuamba patudi tupesha muntu trakte mu njila.
4 Patudi tuyisha mu njila: Udi mua kuamba ne: “Muoyo webe au! Ukadiku mudiebeje lumue lua ku nkonko eyi anyi? [Lekela muntu andamune.] Trake eu udi ufila mandamuna malelela adi afumina mu Bible.” Muntu yeye ne dîba, nudi mua kukonkonona nende diandamuna dimue mu trakte ne kumupesha mene mukanda wa Bible ulongesha.
5. Padi bantu kabayi kumbelu, ntshinyi tshitudi mua kuenza imue misangu?
5 Padi bantu kabayi kumbelu: Mu teritware mikuabu, bamanyishi batu bela mikanda muinshi mua bibi bia bantu badi kabayi kumbelu. Pikalabi nanku mu teritware wenu, nudi imue misangu mua kushila penu bantu trakte wa Kupeta mandamuna a nkonko muinshi mua tshibi. Paudi upingana, udi mua kuamba ne: “Dituku adi patuvua bapite muaba eu, katuvua bakusangane to, ke tuetu kuela trakte eu muinshi mua tshibi. Ku nkonko yonso idi pa mutu apa, nduepi luudi musue kupeta diandamuna dialu?”
6. Tshidi tshienza bua trakte wa Kupeta mandamuna a nkonko ikala tshiamu tshia mudimu tshimpe ntshinyi?
6 Trakte wa Kupeta mandamuna a nkonko udi umvuija bulelela mu mushindu mupepele udi umvuika bimpe. Udi usankisha bantu ba mu bitendelelu bionso ne miaba yonso. Mmupepele bua kuyisha nende, bualu nansha bana ne bamanyishi bapiabapia badi mua kumupesha bantu. Utu wenzaku nende mudimu padi mpunga umueneka anyi?