Tshidi mua kuambuluisha bena mu mêku ntshinyi?
1. Leja muvua dituku dia Nsabatu diambuluisha mêku a bena Isalele.
1 Yehowa uvua muele mukenji wa Nsabatu ne meji mimpe a kuambuluisha bena mêku. Bena Isalele bavua banji kulekela midimu yabu ya bianza bua kuela meji bua bulenga bua Yehowa ne bua malanda abu nende. Baledi bavua bapeta dîba dia kubueja mikenji ya Nzambi mu mitshima ya bana babu. (Dut. 6:6, 7) Nunku lumingu luonso, dituku dia Nsabatu ke dituku divua nadi bena Isalele bua kuditua mu malu a Nzambi.
2. Nsabatu udi utulongesha tshinyi?
2 Yehowa katu kabidi ulomba mêku lelu bua kunemeka Nsabatu nansha. Kadi mukenji eu udi utuleja mudi Nzambi umona malu. Utu munange bikole bua bantu bende badie nende malanda mimpe. (Yesh. 48:17, 18) Umue mushindu udi Yehowa uleja mudiye musue bua tuetu kudia nende malanda lelu, nku Ntendelelu wa mu Dîku.
3. Tutu tuenza Ntendelelu wa mu Dîku bua tshinyi?
3 Bua tshinyi tutu tuenza Ntendelelu wa mu Dîku? Mu ngondo wa 1 wa 2009 tuakabanga kuenza Dilonga dia Mukanda dia Tshisumbu dituku dimue ne Kalasa ka Mudimu wa Nzambi ne Tshisangilu tshia Mudimu. Bumue bualu buvua butusake bua kushintulula malu buvua bua kuambuluisha bena mêku bua kutuadija kuenza ntendelelu mu dîku dituku kampanda lumingu luonso, bua kukolesha malanda abu ne Yehowa. Bakalomba dîku dionso bua kuteka dilonga dia dîku mu dituku ne dîba divua dilonga dia mukanda dienzeka anyi kuditeka dikuabu dituku bua kuyikila malu a Nzambi ne kulonga Bible bimpe bimpe, bilondeshile majinga a dîku diabu.
4. Ntendelelu wa mu Dîku udi ne bua kuenza anu dîba dimuepele anyi? Umvuija.
4 Bua kubuela mu dilonga dia mukanda, tuvua tukeba dîba dia kudilongolola bua kuowa mâyi, kuvuala bilamba, ne kuenza malu makuabu. Nanku bua ba bungi, kubuela mu dilonga dia mukanda kuvua kutuangata mêba a bungi. Mpindieu mbatushile mêba onso au bua kutendelela Yehowa mu dîku. Nunku, katuedi mukenji wa kuenza Ntendelelu wa mu Dîku anu mu dîba dimuepele to. Kadi tuikalayi tutangila majinga a bena dîku dietu bua kumanya mutantshi utudi ne bua kulonga Bible.
5. Mbimpe kupitshisha dîba dionso mu diyikila malu pamue anyi? Umvuija.
5 Mbimpe nuenu kupitshisha dîba dionso anu mu diyikila malu pamue anyi? Padi bantu badi baselangane anyi bena mu dîku balonga malu a Nzambi pamue, badi bakoleshangana. (Lomo 1:12) Bena mu dîku badi balua kunangangana bikole. Nunku, kuyikila malu a Nzambi ke bualu butambe bunene mu Ntendelelu wa mu Dîku. Kadi muntu yonso wa mu dîku udi pende mua kudilongela Bible mu tshikondo atshi. Tshilejilu, nuenu bamane kujikija kuyikila, dîku didi mua kushala pamue, kadi muntu yonso utungunuka ne kulonga biende bintu, bu mudi kulongolola bisangilu anyi kubala bibejibeji. Amue mêku atu alekela bisanji bikanga mutantshi wonso au.
6. Diyukidilangana didi mua kuenzeka mushindu kayi?
6 Diyukidilangana didi mua kuenzeka mushindu kayi? Kabiena anu bikengela kudienza mu nkonko ne mandamuna to. Bua kulengeja Ntendelelu wa mu Dîku, ba bungi batu bamuenza bu mututu tuenza bisangilu bia munkatshi mua lumingu: Batu bakosa malu a kuyikila mu bitupa kampanda, babienza mishindu mishilashilangane. Tshilejilu, badi mua kubala Bible pamue, kulongolola bimue bitupa bia bisangilu, ne kuenza manaya a tshilejilu bua mudimu wa buambi pamue. Dibeji 6 didi ne bimue bilejilu.
7. Baledi badi ne bua kuenza bua bana badiumvue mushindu kayi?
7 Baledi badi ne bua kuenza bua bana badiumvue mushindu kayi? Bena mu dîku badi mua kulonga bimpe anu koku kuikale dinanga ne bantu bobu bakula badilekelele. Tshilejilu padiku mushindu, nudi mua kulongela imue misangu pambelu. Nudi mua kuanji kuimanyika dilonga bua katupa kîpi, padibi bikengedibua. Nudi mua kudia biakudia panudi nujikija kulonga. Etshi ki ntshikondo tshia baledi kutandisha anyi kunyoka bana to, kadi badi mua kuakula bua tshibidilu tshibi anyi bualu kampanda bubi budi buenzeke mu dîku. Kadi kutu amue malu a muana atu alomba kuyikila nende pa nkayende bua kubenga kumufikisha munda anyi kumufuisha bundu ku mêsu kua bana bakuabu. Ntendelelu wa mu Dîku ki ntshikondo tshia bantu kuikala ne mpala mikanga anyi kuikala ne buôwa to, kadi ntshikondo tshia bantu kuikala ne disanka anu bu Nzambi utudi tutendelela.—1 Tim. 1:11.
8, 9. Mmunyi mudi bamfumu ba mêku mua kudilongolola?
8 Mfumu wa dîku udi ne bua kuenza tshinyi bua kudilongolola? Nebiambuluishe bena mu dîku pikala mfumu wadi ulongolola kumpala kua dîba malu aluabu kuenza mu Ntendelelu wa mu Dîku ne mushindu wenzabu. (Nsu. 21:5) Mbimpe mulume ikala uyikila ne muena kuende kumpala kua kuenza programe eu. (Nsu. 15:22) Nuenu bamfumu ba mêku, kanuenaku imue misangu mua kuyikila ne bana benu kumpala kua kuenza programe anyi? Nuenu nuenza nunku, nenumanye majinga a bana benu.
9 Mfumu wa mu dîku kena ne bua kupitshisha mêba a bungi lumingu luonso bua kudilongolola to. Mbimpe kuikalaku bintu kampanda bia kuenza lumingu luonso. Ki mbimpe mfumu wa dîku ikale lumingu luonso ulua amu ne programe mupiamupia to. Mbimpe ikale udilongolola dîba dionso didibu bajikija kulonga, bualu utshidi muvuluke majinga a bena mu dîku. Bamue bamfumu ba mêku batu benza programe mu kabeji muikale ne malu onso patoke, bakalamika muaba kampanda udi bena mu dîku bonso mua kumona. Bena mu dîku batu bumvua disanka, bapeta tshikondo tshia kudilongolola.
10. Bana betu badi nkayabu badi mua kuenza tshinyi dituku dia Ntendelelu wa mu Dîku?
10 Kadi meme muikale nkayanyi? Bantu badi nkayabu badi mua kudilongela Bible dituku dia Ntendelelu wa mu Dîku. Mu programe wabu kamupangiki dibala dia Bible, dilongolola bisangilu ne dibala dia Tshibumba tshia Nsentedi ne Réveillez-vous! Bamue batu kabidi basakidila didilongela dia tshiena-bualu kampanda mu buondoke. Imue misangu, badi mua kubikila muanetu umue anyi dîku kampanda bua kuyikila malu a Nzambi.
11, 12. Telaku amue malu mimpe atudi tupeta patudi tuenza Ntendelelu wa mu Dîku lumingu luonso.
11 Ng’amue masanka kayi atudi tupeta patudi tuenza Ntendelelu wa mu Dîku lumingu luonso? Aba badi badifila ne muoyo mujima mu ntendelelu mulelela badi badia bulunda bukole ne Yehowa. Bena mu mêku mudibu benza Ntendelelu wa mu Dîku badi kabidi balua balunda. Muntu mulume kampanda ne muena kuende badi baleja malu mimpe adibu bapete, bamba ne: “Tudi bampanda-njila; katuena ne bana to. Kadi tutu tuindila tshikondo tshia Ntendelelu wa mu Dîku ne muoyo kulu kulu. Tutu tudiumvua balamatangane bikole ne tudiumvua kabidi balamakane ne Tatu wetu wa mu diulu. Patutu tujuka mu dinda dituku edi, tutu tuambilangana ne: ‘Kupu muoyo! Lelu ndia Ntendelelu wa mu Dîku!’”
12 Programe wa kutendelela Nzambi mu dîku eu udi kabidi wambuluisha mêku adi bantu ne midimu ya bungi. Tshilejilu, umvua tshiakamba mamu mukuabu udi udikoleshila bana bende babidi eku muikale mpanda-njila wa pa tshibidilu: “Bidimu bishale, katuvua tuenza dilonga dietu dia mu dîku bimpe to. Tuvua tudienza imue misangu, malu kaayi malondangane bimpe, bualu mvua ndiumvua mupungile. Kakuvua mushindu wa meme kuenza malu onso to. Ke bualu kayi ndi nnufundila bua kunuela tuasakidila wa manza tente bua munudi benze programe wa Ntendelelu wa mu Dîku. Mpindieu tudi tulonga Bible mu dîku lumingu luonso, bidi bituambuluisha.”
13. Tshidi mua kuenza ne: Ntendelelu wa mu Dîku ambuluishe anyi abenga kuambuluisha bena dîku dienu ntshinyi?
13 Ntendelelu wa mu Dîku udi anu bu Nsabatu, bualu Tatu wetu wa mu diulu ke udi mutuenzelaye bua kuambuluisha bena mêku. (Yak. 1:17) Malanda a bena Isalele ne Nzambi avua akola anyi ateketa bilondeshile malu avuabu benza mu dia Nsabatu. Malu atudi petu tuenza dituku didibu batushile bua kutendelela Nzambi mu dîku dietu adi mua kukolesha anyi kutekesha malanda etu ne Nzambi. (2 Kol. 9:6; Gal. 6:7, 8; Kolos. 3:23, 24) Tuetu tuenza Ntendelelu wa mu Dîku bu mudibi bikengela, netuambe petu anu bu muakamba mufundi wa Musambu wa 73 ne: ‘Kadi bidi bimpe bua meme kusemena pa buipi ne Nzambi. Ngakuvuija Mukalenge Yehowa tshinyemenu tshianyi, bua mmanye bianyi mua kuambila bantu bua midimu yebe yonso.’—Mus. 73:28.
[Lungenyi lunene lua mu dibeji 5]
Ntendelelu wa mu Dîku ki ntshikondo tshia bantu kuikala ne mpala mikanga anyi kuikala ne buôwa to, kadi ntshikondo tshia bantu kuikala ne disanka anu bu Nzambi utudi tutendelela
[Kazubu mu dibeji 6]
LAMA
Amue malu a kuenza
Bible:
• Balayi imue nshapita ya mu dibala dia Bible dia ku lumingu. Bilondeshile mudi nshapita, muntu umue udi mua kubala mêyi a mufundi wa mukanda, banga babala mêyi a bantu bakuabu.
• Enzayi dinaya dia malu adi mu nshapita kampanda.
• Lomba muntu yonso adianjile kubala nshapita inudi ne bua kubala ne alongolole nkonko ibidi anyi isatu. Pashishe nukebayi pamue mandamuna a nkonko ya muntu yonso.
• Ikala ufunda lumingu luonso mvese kampanda pa kabeji, mpindieu nuteta kumukuata ku muoyo ne kumumvuija. Ikalayi nulama tubeji atu, bua nuikale nuditeta lumingu luonso bua kumanya bungi bua mvese inukadi bakuate.
• Nudi mua kulonda dibala dia Bible ku tshisanji, nuenda nulondesha mu Bible yenu.
Bisangilu:
• Nulongolole tshitupa tshia bisangilu pamue.
• Nuimbe misambu idi mu programe wa bisangilu lumingu alu.
• Muntu yeye ne mudimu mu Kalasa ka Mudimu wa Nzambi anyi dinaya dia tshilejilu mu Tshisangilu tshia Mudimu, nupeshangane ngenyi anyi muntu ambulule mudimu wende kumpala kua dîku dijima.
Majinga a mu dîku:
• Nudi mua kulonga malu a mu mukanda wa Les jeunes s’interrogent anyi wa Longa malu.
• Enzayi manaya adi aleja mua kupita ne tshilumbu kampanda tshidi mua kujuka mu tulasa.
• Enzayi manaya a muledi udienza bu muana, muana udienza mu muledi; mmumue ne: bana babala mikanda mikuabu bua kulua kumvuija baledi tshiena-bualu kampanda.
Mudimu wa buambi:
• Enzayi manaya a mua kutuadija kuyikila ne bantu mu buambi mu Disambombo anyi mu Dia lumingu.
• Yikilayi bua kumanya tshidi dîku dienu mua kuenza bua kuvudija mudimu mu tshikondo tshia Tshivulukilu anyi mu dikisha dia balongi.
• Ushile muntu yonso minite mikese ya kukeba mandamuna a nkonko itu bantu bela mu buambi, pashishe nuenze manaya a tshilejilu.
Malu makuabu:
• Balayi tshiena-bualu kampanda tshia mu tshibejibeji tshia ngondo unudi.
• Lomba muntu yonso adianjile kubala tshiena-bualu tshidi tshimusankisha mu tshibejibeji tshia ngondo unudi bua alue kutshiumvuija.
• Imue misangu, nudi mua kubikila muena Kristo umue anyi bena dibaka mu Ntendelelu wenu wa mu Dîku; nuenu basue, nudi kabidi mua kubela imue nkonko.
• Nutangile filme yetu bua kuyukidilangana bua malu adimu.
• Nuyikile tshiena-bualu tshia “Les jeunes s’interrogent” anyi tshia “Apprenons en famille” mu Réveillez-vous!
• Nuyikile pa tshiena-bualu tshia “Buenu nuenu bansonga” ne tshia “Longesha bana bebe” mu Tshibumba tshia Nsentedi.
• Balayi ne yukilayi bua tshitupa kampanda tshia Annuaire wa tshidimu tshinudi anyi mukanda udi mupatuke mu mpungilu wa distrike udi ufuma ku dijika.
• Nuenu babuele mu mpungilu anyi mpuilu, nulue kuyikila bua malu manene anudi bakuate.
• Tangilayi tshintu kampanda tshidi Yehowa mufuke, mpindieu yikilayi bua kumanya ngikadilu ya Yehowa iditshi tshinuleja.
• Enzayi tshintu kampanda nuenu bonso, bu mudi kuenza karte, kuenza tablo anyi tshimfuanyi kansanga.