Bantu nebalonge malu mimpe be!
1. Pa kumusha muyuki, ntshinyi tshikuabu tshidi mua kusankisha bantu bikole? Umvuija.
1 Dîba kayi? Dilolo dia Tshivulukilu. Tudi badifile ne muoyo wonso bua kubikila bantu. Ki nganu malu adi bantu bumvua adi mua kubasankisha bikole to. Tshilejilu, mamu mukuabu uvua mubuele mu Tshivulukilu wakatamba kuakula bua malu avuaye mumone. Wakakula bua muvua muntu yonso ne bulenga, muvua muaba uvuabu benzele Tshivulukilu muikale ne mankenda, mulengeja bimpe, muibaka ne mulama bimpe kudi bantu ku budisuile. Nunku, ki nganu ngamba-malu nkayende to, kadi tuetu bonso tudi mua kulongesha bantu malu mimpe.—Ef. 4:16.
2. Leja mudi yonso wa kutudi mua kuambuluisha benyi.
2 Ela benyi muoyo ne disanka: Patudi tuela bantu muoyo ne disanka ne mimuemue, nebanyishe Bantemu. (Yone 13:35) Nansha muudi kuyi mua kuyikila ne benyi bonso, udi mua kudimanyisha ne bulenga kudi aba badi nebe pamue. (Eb. 13:1, 2) Wikale ukeba benyi badi bamueneka bu badi kabayi bamanye muntu to. Imue misangu bavua bababikile patuvua tuabanya mabeji a dibikila nawu bantu. Udi mua kuamba ne: “Eu ke musangu webe wa kumpala anyi?” Ubalombe bua kusomba nebe pamue, ne bua kuandamuna lukonko luonso ludibu nalu. Pikala tshisumbu tshienu ne bua kupatuka ne lukasa bua kushila tshisumbu tshikuabu muaba, udi mua kuamba ne: “Udi musanka anyi? Ndi mua kukupetela penyi bua tuetu kuyikila kabidi?”
3. Mmushindu kayi utudi mua kuakidila bantu badi kabayi bayisha kabidi?
3 Akidila bimpe bantu bakadi balekele kuyisha: Bamanyishi bakadi balekele kuyisha ne bantu batu balua anu mu Tshivulukilu nebikaleku pabu. Ubele muoyo; ubambile ne: udi ne disanka dia bungi bua kubamona. (Lomo 15:7) Bakulu badi mua kuya kubatangila ku mabu panyima pa matuku makese bua kubakankamija bua kubuelabu mu bisangilu. Tudi tusambila bua bantu badi balua mu Tshivulukilu batumbishe Nzambi, ki nganu bua malu adibu bumvua nkayawu to, kadi kabidi ‘bua midimu yetu mimpe idibu bamona.’—1 Pet. 2:12.