Tutabalele diakidila mu Tshivulukilu

¹ Bidimu bishale ebi, amu mubuedi umue mu Tshivulukilu pa basatu ke uvua mumanyishi wa lumu luimpe. Nebikale pamu’apa bia muomumue tshidimu etshi. Bamue badi mua kulua mu tshibilu etshi basakibue ku mubelu wa mulunda anyi mulela wabo kampanda musombele muaba mukuabo, bakuabo pabo bikale babikidibue kudi mumanyishi kansanga wa mu tshisumbu. Bakuabo kabidi bakadi bangata batismo, kadi kabatshiyi badifila kabidi mu mudimu. Tudi tuakidila ne muoyo mujima aba badi banemeka dîyi-dituma dia Yezu: “Tungunukayi ne kuenza nunku bua kumvuluka.”—1 Kol. 11:24; Lomo 15:7.

² Bena mudimu wa diakidilangana badi ne bua kuikala ne mbabi bua kujingila buonso dilua dimpe, nangananga muenyi, patshidiye ubuelelaku mu Nzubu wa Bukalenge. Kadi, tudi mua kulonda tuetu buonso njila wa diakidila benyi mu Tshivulukilu. (Lomo 12:13) Mmushindu kayi?

³ Dilolo adi, bamue nebikale ne mudimu wa bungi wa kuya kukeba bantu badiakaje bimpe. Bakuabo nebikale mua kufika kumpala kua dîba bua kuakidila benyi badi nkayabo. Padi muenyi ubuela mu Nzubu wa Bukalenge, tumuakidile mu bulunda ne tutuadije diyukila nende. Tumuebeje bikalaye mumanye kampanda muena mu tshisumbu. Pikalabi nanku, tumukulupile too ne palua muine mumanyishi awu. (Tangila Luka 10:35.) Biapangaye kumanya muntu, bua tshinyi kubenga kumulomba bua kusomba netu pamue mu kupita kua tshisangilu? Tumumvuije mudimu udibo bakuata ne diampa ne mvinyo mu tshisangilu etshi. Udi mua kuikala ne dijinga dia diambuluisha dietu bua kukeba mvese ya mu Mifundu mitela kudi ngamba-malu.

⁴ Tshivulukilu tshimane kujika, tumumanyishe se: dikalaku diende nditusankishe. Tudi mua kuandamuna ku nkonko idiye mua kuela pa bidi bitangila mudimu wetu. Bituamutabalela pa nkayetu, netuikale mua kutuadija diyukidilangana pa Bible ku Nzubu wa Bukalenge anyi kukuabo. Bana betu bena mbabi bakatuadija malonga a Bible matambe buimpe pa kudianjila kuela tshiidia etshi tshimpe. Kumpala kua kupatukaye mu Nzubu wa Bukalenge, tumuleje bakuabo ne tumulombe ne musangelu bua kuluaye kabidi.

⁵ Tudi tuakidila ne disanka bana betu basuibue ba bakaji ne ba balume badi kabayi babuela pa tshibidilu mu bisangilu anyi kabatshiyi kabidi badifila mu buambi kukadi matuku. Pamutu pa kubebeja tshivua tshibapumbishe, tubaleje amu se: dikalaku diabo didi dituenza disanka. Pamu’apa lungenyi kampanda lua mu diyuki dia Tshivulukilu ludi mua kubasaka bua kuakaja malanda abo ne Yehowa. Diakidila dia musangelu ne diditatshisha dilelela bituabalamina pamu’apa nebilenge mitshima yabo. Tubamanyishe se: netusanke kubamona tshiakabidi.—Lomo 1:11, 12.

⁶ Muyuki wa pa buawu muikala ne tshiena-bualu tshia “Ndekelu wa bitendelelu bia dishima ukadi pabuipi” newenjibue mu bivule bia ku bisumbu mu dia 23 Tshisanga. Tubikile mu diyuki edi buonso bikala babuele mu Tshivulukilu ne tudilongolole bua buobo kuikalaku. Tudi batekemena se: buonso babuela mu bisangilu ebi bia pa buabi nebadiumvue bimpe ne nebalabule nsombelu wa musangelu wa buena muntu udi munkatshi mua tshisamba tshia Yehowa.—Mus. wa 133:1.