Tutuadijayi malonga a Bible ne mukanda wa Kuikala ne muoyo wa kashidi
1 Dinanga bua muntu netu didi ne bua kutusaka bua kumona tshiakabidi pa lukasa aba badi ne nzala ne nyota ya bulelela bua kubambuluisha. (Mat. 5:6) Tudi ne bua kujingulula kadikenke nansha kakese ka disankidila nansha dikese ne kudikolesha bituikale katuyi basue kudimona dijima. Bua kuenza nunku, tudi ne bua kudilongolola.
2 Tshipatshila tshietu netshikale tshia kutuadija malonga a Bible. (Mat. 28:20) Mpatukilu ya kumpala ya mukanda wa Kuikala ne muoyo wa kashidi ivua ne miaku eyi ku mbuelelu: “Nunku, mukanda wa dilonga eu mmukumbanyine buonso, bansonga ne bakulakaje, nansha bikalabo ne dimanya kayi dia mukanda.” Bulelela, mushindu udibo bafunde mukanda eu udi utekesha dilombola dia dilonga ne wambuluisha too ne bapiabapia bua kudifila mu mudimu eu. Netukumbane mua kutuadija malonga a Bible bituenza makumbula mapiamapia mimpe.
3 Mmunyi mutudi mua kutuadija malonga? Mu dikumbula dietu, pa tshibidilu, bidi bimpe kutuadija diyukidilangana pa bualu kampanda, anyi lukonko kansanga lutuvua bajule mu dipetangana dietu dia kumpala. Pamu’apa, tuvua bakula pa ngikadilu udi nende bafue ne bajule lukonko elu: “Nditekemena kayi didiku bua banangibue betu badi bajimine? ” Tumvuije bua se: dibiishibua ku lufu ki nditekemena dikena tshishimikidi; Bible udi ulonda mu miaba ya bungi mabiishibua akavua menzeke. Tukonkonone bimfuanyi mu mabeji a 167-9. Pashishe tuyukidilangane pa malu adi mu bikoso 1 ne 2, mu dibeji dia 166. Bialeja muntu disankidila, tumvuangane nende bua kumumona tshiakabidi bua kutungunuka ne diyukidilangana.
4 Pamu’apa uvua muyukile ne tatu anyi mamu kampanda bavua baleje diditatshisha diabo bua ntatu idi yenda ivula idibo bapetangana nayi mu dikolesha dia bana. Udi mua kuamba, tshilejilu, mu mêyi ebe nkayebe nunku:
◼ “Baledi buonso batu bajinga kupetesha bana babo bilenga bidiku. Bible udi ne mibelu idi mua kufikisha baledi ku diambuluisha bana babo bua kuikala ne nsombelu udi usankisha, nsombelu udi ne tshipatshila. Bua bualu ebu, tudi tukankamija bikole mêku bua kulonga Bible popamue. [Koka ntema pa tshikoso tshia 23, dibeji dia 246.] Dimanya dipeta nunku nedipeteshe dîku dijima mabenesha a tshiendelele.” Ubala Yone 17:3. Umvuija mukuyukidishi bua se: udi mudiakaje bua kupingana ne kuleja dîku diende mushindu wa kutuadija dilonga.
5 Biwikala nsonga anyi mumanyishi mupiamupia, ne biwikala musangu wa kumpala muakule mu mêyi makese pa ditekemena dia Mparadizu, udi mua kubulula mukanda mu dibeji 3 ne kuamba, tshilejilu, mu miaku mipepele nunku:
◼ “Bible udi ulaya ne: badi benza disua dia Nzambi badi mua kutekemena kuikala ne muoyo mu bulongolodi bu mudi ebu, muikala diakalenga ne ditalala. Mukanda eu udi uleja tshitudi ne bua kuenza bua kupeta masanka aa.” Umvuija mu tshikoso mushindu utu dilonga dienzeka ne umuleje mudidio dienzeka.
6 Bu mutudi balongi ba Yezu, tudi ne tshia kuambuluisha muntu netu. (Lomo 10:14) Bituikala bashiye mukanda, anyi bituikala amu bayukidilangane bilenga patupu ne muntu kampanda, tudi ne dibanza dia kudima dijinga diende dia kumanya bivule. (Mat. 9:37, 38) Bituenza mudimu wetu bu mudibi bikengela, buonso nebikale mua kupetelaku masanka.—1 Tim. 4:16.