Tudimayi disankidila bua mukanda wa Kuikala ne muoyo wa kashidi
1 Patudi tukumbula bantu, tudi tumona pa tshibidilu mudibo baluangana ne “ntatu ya mu bulongolodi ebu bua malu.” (Mako 4:19) Tudi ne bua kuakama mudimu mukole: kujula dijinga diabo dia kumanya bivule ku diambuluisha dia dileja didi disaka ku diela meji. Ku ntuadijilu, bantu ba bungi badi amu ne ntema mikese ku mukenji wetu. Pa kuakula bualu kampanda budi butangila muoyo wabo, tudi mua kujula dijinga diabo dia kumanya bivule pa mukenji wa Bukalenge. Bua kutuadija mayukidilangana, mushindu mutambe buimpe udi wa kusungula ngenyi idi ilengelela mu mukanda wa Kuikala ne muoyo wa kashidi. Tudi mua kuamba tshinyi?
2 Udi mua kutuadija nunku:
◼ “Bu wewe ne mushindu, ndutatu kayi lua bubungamija bua mu tshikondo tshietu etshi luwajinga kujikija? [Lekela muntu andamune ne, pikalabi biakane, wanyishe bua se: atshi tshidi kabidi mmuenenu wa bantu ba bungi.] Too ne mpindieu, bamfumu ba mbulamatadi badi amu bu badi bajikija kakese malu mavule ne makolakane adiku lelu’eu. Kadi kudi Kampanda udi ne bukokeshi ne disua dia kumana ntatu yonso idi isuya bukua-bantu. Mona tshidi Musambu wa 145:16 wamba. [Bala mvese ne leja bimfuanyi mu mabeji 11-13.] Tshikoso tshia 14 pa dibeji dia 14 tshidi tshiakula pa ngenyi ituafumi ku ditela ne tshijika ne lukonko elu: ‘Kadi ndiba kayi? ’ ” Umvuija se: mukanda eu newandamune ku lukonko elu ne uuleje bikala muntu muleja disankidila.
3 Anyi, tshilejilu, udi mua kuamba nunku:
◼ “Pamu’apa ukadi mujingulule tshidi kushala mu maboko mutupu kumvuija kunyima kua lufu lua munangibue webe. Uvua mua kuikala pamu’apa mu dibungama ne kuyi ne pa kuashila ne kabiyi mpata uvua mueleela meji pa nkonko eyi: [Bala nkonko ya mu tshikoso 1, dibeji dia 76.] Kabiena mua kukolesha ku muoyo bua kumanya mandamuna ku nkonko eyi anyi? Bumue neukankamane pa kumanya se: Bible udi ufila ditekemena dilelela bua buonso badi bafue. [Bala Yone 5:28, 29.] Mukanda eu udi utuambuluisha bua kumanya ngikadilu udi nende bafue ne ditekemena didiku mu matuku atshilualua.” Akula lukasa pa nshapita wa 8 ne wa 20. Bikala mukuyukidishi muleje disankidila, umulombe bua nukonkonone nende mukanda eu.
4 Pamu’apa, udi mua kupeta mushindu wa kumanyisha mu mpukapuka. Nunku, tshilejilu, udi mua kuamba mu mêyi ebe nkayebe ne:
◼ “Mu tshikondo tshietu etshi, bantu badi mu ntatu ya bungi, ne kabiyi mpata udi mua kuikala ne yebe. Diakabi, mbimueneke bua se: badi kabayi ne bualu ke badi batamba kukenga. Udiku wela meji bua se: dimue dituku Nzambi neajikije makenga wonso aa anyi? [Lekela muntu andamune.] Ndi musue kukuleja tshidi Nzambi mulaye bua kukumbajila buonso badi bamusadila. [Bala Musambu wa 37:40, pashishe ubulule mukanda wa Kuikala ne muoyo wa kashidi mu dibeji dia 99.] Mukanda eu udi umvuija bua tshinyi Nzambi mmulekelele malu mabi ne mushindu waluaye kuajikija.”
5 Biwikala mumanyishi mutshikale nsonga, udi mua kuleja mukanda pa kukuata mudimu ne bimfuanyi mu mabeji 156-8. Udi mua kuanji kuela lukonko elu:
◼ “Neunange kuikala ne muoyo pa buloba bu mudi ebu anyi? [Lekela andamune.] Tshionso tshia ku bimfuanyi ebi bitambe bulenga ntshishindamene pa dilaya dienza mu Bible, Dîyi dia Nzambi. [Leja mvese mifunkuna.] Mukanda eu neukuambuluishe bua kumanya bivule pa dilaya didi Nzambi muenze bua kukudimuna buloba buonso mparadizu. Udi ne mamanyisha a muoyo ne mmuakanyine kuulamina dîba.”—Yone 17:3.
6 Patudi tufila mukanda, katupu muoyo bua kuleja mutuyukidishi mushinga wa mapa ne kumuambila bua tshinyi mushinga eu udi ulombibua.