Tudiku mua kutamba kutumbisha Yehowa mu Tshisanga anyi?

¹ Mufundi wa Misambu Davidi uvua ne dijinga dilelela dia kutumbisha Yehowa mu mushindu uvua mumukumbanyine, ke bualu kayi wakamba ne: “Nengimbile Yehowa bikole ne mukana muanyi, ne nemmutumbishe munkatshi mua bungi buvule bua bantu.” (Mus. wa 109:30) Tshisanga nngondo muimpe mutambe bua ‘kusakidila ku ditumbishibua diende’ pa kudifila bikole mu buambi. (Mus. wa 71:14) Tudi tupangadija bua kuikala munkatshi mua aba bavule badi benza nunku pa kudisanga mu milongo ya bampanda-njila bambuluishi anyi?

² Tudilongololayi bituadije mpindieu: Nsumuinu 21:5 udi utuvuluija ne: “Mapangadija a munangi wa mudimu adi afika bushuwa ku tshipeta tshimpe.” Nunku, bidi bikengela kulomba diambuluisha kudi Yehowa mu masambila, pa kudianjila kuangata ne mushinga bipatshila biende. (Nsum. 3:5, 6) Pashishe tukonkonone ne ntema yonso programe wetu bua kujadika mashintuluka adi ne bua kuenjibua bua kukumbaja mêba abidi bu muayene ku dituku mu buambi. Pa “kudisumbila” tshikondo pa midimu mikuabo, tudi mua kutamba kudifila mu buambi.—Ef. 5:16.

³ Tuyukidilangane ne tukuatshishangane mu mudimu: Mupostolo Paulo wakamba bua bamue ne: bavua buende yeye “mpokolo wa dikankamija” mu dikumbaja dia mudimu wende. (Kolos. 4:11) Tuakulayi pa mapangadija etu ne aba badi ne dijinga dia kutuadija mudimu wa bumpanda-njila buambuluishi mu Tshisanga. Dikuatshisha diabo ne dikala nabo pamue nebipeteshe mashintakajangana manene a mu nyuma. Mutangidi wa mudimu udi mua kuandamuna ku nkonko yetu pa bidi bitangila bisangilu bua buambi ne teritware idiku.

⁴ Bamue badi ne mushindu wa kuikala bampanda-njila bambuluishi ku diambuluisha dia dieleshangana maboko ne dikuatshisha dia dîku diabo. Midimu ya ku mbelu idi mua kuabanyibua mu mushindu mushilangane bua tshikondo tshîpi. Nebikengele pamu’apa kushintulula tshiakabidi tshikondo tshilongolola bua kuyenza. Diyukidilangana pa malu aa mu dîku didi mua kutuambuluisha bua tuetu kukumbaja tshipatshila tshietu. Bua kulubuluka, bidi bikengela diyukidilangana ne dikuatshishangana dimpe mu mudimu.

⁵ Tushale ne dieyemena: Katuedi meji lukasa ne: nsombelu wetu kêna utushila pa tuetu kuikala bampanda-njila bambuluishi. Bansonga batshidi balonga, bena pansio, ba-inabanza, bamfumu ba mêku badi batumika ku dîba ne ku dîba mu midimu ya ku mubidi mbadipangishe amue malu ku budisuile bua kuluabo bampanda-njila bambuluishi mu Tshisanga. Badi banyishe mêyi a mufundi wa Misambu a se: “kudi bantu bakane ditumbisha ndiakanyine,” ne kabivua bitamba kubakolela bua kuenza madikolela a pa mutu adi akengedibua bua kukumbaja mêba 60 mu buambi. (Mus. wa 33:1) Nansha bituapanga kusanganyibua munkatshi mua bampanda-njila bambuluishi, bua tshinyi kubenga kulabula disanka diabo pa kumanyisha bipitshidile?

⁶ Bua bavule, kutuadija mudimu wa bumpanda-njila buambuluishi mu Tshisanga kuvua diela tshiidia bua kupita ku mudimu wa bumpanda-njila bua pa tshibidilu. Bu mukavuabo bamane kuvudija mudimu wabo, bakamona bua se: bivua bipepele menemene bua kutuadija mudimu wa bumpanda-njila bua pa tshibidilu.

⁷ Eyowa, Tshisanga nngondo mukumbanyine menemene bua mudimu wa teokrasi wa bungi. Udi ne ndekelu ya mbingu itanu ya kabamba, mbuena kuamba ne: matuku a disambombo atanu ne a dia lumingu atanu. Tudi mua kutuadija midimu yetu mu dindadinda ne nansha kuyenza mu mêba a dilolo. Tudi basue kuenza muetu muonso bua kutumbisha Nzambi wetu Yehowa. Mudimu wa bumpanda-njila buambuluishi mu Tshisanga ng’umue mushindu mutambe buimpe wa kuleja dianyisha dietu bua bienzedi biende bivule bituenzela ku bulenga bukena butuakanyine.