Tukuatayi mudimu bimpe ne broshire mupiamupia

¹ Mu mpuilu wetu wa distrike wa musangu mushale, tuvua ne disanka dia bungi pa kupeta broshire wa Quand la mort frappe un être aimé (Padi muntu uudi munange ufua). Broshire eu udi mua kusankisha bantu ba nsombelu yonso, bualu bavule badi bakenga bua dijimija muntu udibo banange. Foto ne bimfuanyi bia broshire eu bidi bikoka ntema bidi ne bua kufikisha ku dimushila bantu kakuyi lutatu. Dizola dia mpatshi didi dileja dibiishibua dia Lazare ku bafue didi dileja ‘dijinga dikole dia Yezu dia kulongolola binyangu bikebesha kudi lufu.’ Tshimfuanyi tshidi pa dibeji dijima didi dilonda tshidi tshileja muanda wa disanka wa dibiishibua ku lufu mu bulongolodi bupiabupia. Neusanguluje mitshima ya aba badi ne kanyinganyinga!

² Broshire eu neambuluishe bikole bua kukolesha bena lufuila ku muoyo. Mmuenza bua diyukidilangana. Nkonko miela bua kuzangika ngenyi ya mushinga mmifunda mu kazubu ku ndekelu kua tshitupa tshionso, pamutu pa kuinshi kua dibeji. Tudi mua kukuata mudimu ne “Nkonko ya kueleela meji” eyi mu mushindu utuamona mukumbanyine bua muntu utudi tulonga nende Bible.

³ Mu makumbula mapiamapia, tusungulayi bua kukonkonona ngenyi miangata mu broshire. Pamu’apa, netumone bikumbane bua kuleja mutuyukidishi tshikebelu mu dibeji 2 ne kumulomba bua kusungula tshiena-bualu tshidi tshimusankisha. Tutabalelayi bua kuandamuna ku majinga a muntu ne muntu. Tulekele muntu umvuije nyanji yende, pashishe tumuleje dikankamija didi broshire ufila. Tshitupa tshionso tshidi ne mvese ya bungi idi ishindika ditekemena dietu.

⁴ Ka-tshiena-bualu ka mu dibeji 5, “Kudi ditekemena dilelela” kadi kazangika dilaya didi dikankamija pa bidi bitangila bafue, dilaya didi diashila pa Bible. Ebi bidi ne bua kukoka ntema bua kukonkonona tshitupa etshi “Ditekemena dia bushuwa bua bafue,” mu mabeji 26-31. Kazubu ka mu dibeji dia 27 kadi kafila mikuabo “Mvese idi ikolesha ku muoyo.” Muena mu lufuila neajingulule lukasa ne: Yehowa udi bushuwa “Nzambi wa busambi buonso.”—2 Kol. 1:3-7.

⁵ Ne bukalanga buonso, bitupa bidi munkatshi bidi biakula pa ngandamuinu mishilangane idi lufu lua munangibue lujula. Bidi bileja mushindu wa kutshimuna kanyinganyinga ne diambuluisha didi bakuabo mua kufila mu bikondo bu nunku bia dikenga. Kazubu ka mu dibeji dia 25 kadi ne tshiena-bualu tshia “Diambuluisha bana mua kuakama lufu.” Kadi ne bua kuambuluisha menemene baledi badi ne bua kuakama lutatu elu.

⁶ Tuikale tuetu bine misangu yonso ne broshire umue, ne tukuate nende mudimu mu bumanyishi bua mu mpukapuka. Bumue netujinge kabidi kukumbula miaba ya mu teritware wetu bua kufila imue broshire kudi bena mudimu wa ku nkita bua kuikalabo bakolesha ku muoyo mêku adi mafuishe. Anyi tudi mua kuyukila ne bukalanga ne bantu badi bafuishe ku nkita padibo bapinganuna ku lukita lua munangibue wabo kampanda.

⁷ Tudi ne disanka mudi Yehowa muikale Nzambi “udi usamba badi babunguluja panshi.” (2 Kol. 7:6) Tudi tuangata “kusamba buonso badi mu madilu” bu disanka dia pa buadi.—Yesh. 61:2.