Tuikale tusamba badi mu madilu
1. Bua tshinyi tudi ne bua kukolesha bantu badi bafuishe?
1 Padi muntu ufuisha muntu uvuaye munange bikole, udi umvua kanyinganyinga ka bungi, nangananga padiye kayi mumanye ne: Bukalenge bua Nzambi budiku. (1 Tes. 4:13) Bantu ba bungi batu badikonka ne: ‘Bua tshinyi bantu batu bafua? Padibu bafua, batu baya penyi? Nemmonanganaku kabidi ne muanetu udi mufue eu anyi? Ngenyi idi ilonda kuinshi eku eyi neyituambuluishe bua kukolesha bantu batudi tupeta mu buambi badi bafuishe balela anyi balunda babu.—Yesh. 61:2.
2. Muntu yeye mutuambile ne: udi ne madilu, tudi amu ne bua kumuyisha malu a bungi anyi?
2 Diyisha ku nzubu ne ku nzubu: Muntu utudi tupeta udi mua kutuambila ne: mmufuishe muntu mu dîku diabu matuku adi panshi aa. Muntu utudi bapete eu utshidi anu ne muadi kuisu anyi? Balela bende batshidi mu nzubu badila anyi? Pikalabi nanku, ki mbimpe kushala muaba au mutantshi mule to, ubashiye. (Mua. 3:1, 7) Pamuapa tudi mua kumuleja mudibi bitunyingalaja petu ne kumupesha trakte udi wakula bua lufu anyi tshibejibeji nansha broshire; pashishe tulayangana nende. Tudi mua kulua kumutangila mu tshikondo tshiakanyine bua kumusamba ne malu adi mu Bible.
3. Pikalaku mushindu, mmvese kayi itudi mua kubadila muntu udi mu madilu?
3 Misangu mikuabu, tudi mua kumona bikumbana bua kuyisha muntu malu a bungi dia kumpala ditudi tupetangana nende. Kadi dîba adi kadiena dikumbane bua kubenga ngenyi mibi idiye nayi to, tudi mua kumubadila tshidi Bible mulaye bua dibika dia bantu ku lufu. (Yone 5:28, 29) Anyi tudi mua kumuambila tshidi Bible wamba bua tshidi bafue. (Muam. 9:5, 10) Kumubadila mvese udi wakula bua dibika bia bantu ku lufu kudi mua kumukolesha. (Yone 11:39-44) Tudi kabidi mua kumubadila mêyi avua Yobo muakule adi aleja muvuaye mutekemene kudi Yehowa. (Yobo 14:14, 15) Kumpala kua kulayangana nende, tudi mua kumushila broshire wa Ntshinyi tshidi tshitufikila patudi tufua?, wa Padi muntu uudi munange ufua, anyi broshire mukuabu nansha trakte udi wakula bua lufu. Tudi mua kumushila kabidi mukanda wa Bible ulongesha, kumuambila malu adi mu nshapita 6, ne kumulaya bua kulua kukonkonona malu aa musangu udi ulonda.
4. Mbikondo kayi bikuabu bitudi mua kusamba bantu?
4 Bikondo bikuabu: Bantu badi kabayi Bantemu ba Yehowa badi mua kulua ku Nzubu wa Bukalenge padibu benza muyuki wa dijika mufue anyi? Nudi mua kulongolola bua kubapesha mikanda yetu idi mua kubasamba. Mu imue miaba, bena nzubu itubu balongoluela bitalu kumpala kua kubijika batu banyisha bua kuikala ne mikanda ya nunku ya kupesha badi bafuishe. Imue misangu, mamanyisha a lufu atubu bafunda mu bikandakanda mmafikishe bana betu bakuabu ku difundila bantu badi bafuishe mikanda ya mêyi makese a dibasamba nawu. Tshilejilu, pavua tatu mukuabu uvua mufuishe muena kuende mupete mukanda uvuabu bamutumine ne trakte munda, wakaya ne muanende wa bakaji kua muanetu uvua mumutumine mukanda, e kumukonka ne: “Wewe ke uvua muntumine mukanda eu anyi? Bualu ndi nkeba kumanya malu makuabu a bungi a mu Bible.” Tatu au ne muanende wa bakaji bakabanga kulonga Bible ne kubuela mu bisangilu bietu.
5. Bua tshinyi tudi ne bua kuikala tukeba bikondo bia kusamba badi mu madilu?
5 Muambi 7:2 udi wamba ne: ‘Kubuela mu nzubu wa madilu kudi kupita kubuela mu nzubu wa bidia bia dibanji buakane.’ Muntu udi ne madilu udi mua kuteleja Dîyi dia Nzambi bimpe kupita muntu udi muditue mu masanka. Tuetu bonso tudi ne bua kuikala tukeba bikondo bikumbane bia kusamba bantu badi bafuishe.