‘Munya wenu uteme ku mêsu kua bantu’

1. Tudi ne diakalenga dia kuenza tshinyi?

¹ Kutuadijila mu dinda too ne ku dilolo, bulengele bua butoke budi bumueneka budi butumbisha Yehowa Nzambi. Kadi Yezu wakambila bayidi bende bua kuikala ne butoke anyi “munya wa muoyo.” (Yone 8:12) Kuikala ne butoke ebu ndiakalenga dia pa buadi didi dituambika bujitu bunene. Yezu wakamba ne: ‘Munya wenu uteme ku mêsu kua bantu’ bua ubambuluishe. (Mat. 5:16) Bu mudi bantu lelu mu mîdima mikole mu malu a Nzambi, badi dijinga ne butoke ebu bikole menemene. Kadi anu bu Yezu, mmunyi mutudi petu mua kukenkesha butoke ebu?

2. Mmunyi muakaleja Yezu mushinga wa kukenkeshila bantu butoke ebu?

² Tuyishayi: Yezu wakakuata mudimu ne dîba diende, bukole buende ne makuta ende bua kukenkesha butoke bua bulelela kudi bantu miaba yonso ivuabu, bu mudi: ku nzubu, mu njila ne ku mikuna. Yezu uvua mumanye bimpe ne: butoke ebu buvua mua kuambuluisha bantu bikole. (Yone 12:46) Bua kukenkesha bantu ba bungi, Yezu wakalongolola bayidi bende bua ‘kuikala munya wa buloba.’ (Mat. 5:14) Bavua bakenkeshila bantu munya anyi butoke ebu pavuabu benzela bantu malu mimpe ne babambila malu malelela a mu Dîyi dia Nzambi.

3. Bua kuleja ne: tudi bamanye mushinga udi nawu butoke bua bulelela, tudi mua kuenza tshinyi?

³ Bantu ba Nzambi badi bambula bujitu bua ‘kuenda bu bana ba munya’ ne muoyo umue, ne badi bayisha bantu muaba wonso udibu. (Ef. 5:8) Kubala patupu Bible anyi mikanda yetu muaba udi bantu, bu mudi mu dikisha ku mudimu anyi mu tulasa kudi mua kutupesha njila wa kutuadija kuyikila malu a Nzambi. Ke muakatuadija muanetu wa bakaji mukuabu dilonga dia Bible ne kupesha balongi babu mikanda 12 nanku.

4. Bua tshinyi ‘kutemesha munya wetu’ kudi kumvuija kabidi kuikala ne ngikadilu mimpe?

⁴ Malu mimpe: Kukenkeshila bantu butoke, kudi kabidi kulomba kuenza malu mimpe dituku dionso. (Ef. 5:9) Ngikadilu mimpe ya bena Kristo itu imueneka ne lukasa padibu mu tulasa, ku mudimu anyi muaba udi bantu; nunku mushindu wa kuyikila malu a mu Bible utu umueneka. (1 Pet. 2:12) Tshilejilu, ngikadilu mimpe ya muana wa bidimu bitanu yakasaka mulongeshi wabu bua kubikila baledi bende. Mulongeshi eu wakabambila ne: “Katshia tshitu muanji kumona muana ne dijinga dia kuenza malu mimpe nunku to!” Kakuyi mpata, mudimu wetu wa buambi ne ngikadilu yetu milenga bitu bikoka bantu ku “munya wa muoyo” ne bitumbisha Nzambi.