Tuikalayi ne lutulu mu mudimu wetu
1. Mmushindu kayi uvua Yehowa muleje bantu lutulu luende?
1 Nzambi udi wenzela bantu malu ne lutulu lua bungi. (Ekes. 34:6; Mus. 106:41-45; 2 Pet. 3:9) Tshimue tshilejilu tshinene tshia dinanga ne lutulu lua Nzambi tshidi tshimuenekela mu mudimu wa kuyisha lumu luimpe. Yehowa mmuenze mudimu ne bantu kukadi bidimu bitue ku 2 000. Kadi too ne lelu eu, utshidi anu utungunuka ne kukoka bantu badi basue kuikala mu malanda mimpe nende kudiye. (Yone 6:44) Mmunyi mutudi mua kuikala ne lutulu mu mudimu wetu, anu bu Yehowa?
2. Patudi tuyisha mu teritware wetu, mmunyi mutudi mua kuleja lutulu?
2 Mudimu wa ku nzubu ne ku nzubu: Tudi tuidikija lutulu lua Yehowa patudi tuyisha mu teritware mudi bantu kabayi banji kuleja dinanga dia bulelela, ‘katuyi tulekela.’ (Bien. 5:42) Tudi tuleja lutulu nansha padibu kabayi batuteleja, padibu batuseka anyi batuluisha mu buambi. (Mâko 13:12, 13) Tudi tuleja lutulu patudi tutungunuka ne kumiamina ntete ya bulelela mâyi nansha padibi bikole bua kupeta bantu badi banyisha bulelela.
3. Bua tshinyi tudi ne bua kuikala ne lutulu patudi tupinganyina bantu anyi tulonga nabu Bible?
3 Malonga a Bible: Kukolesha tshikunyibua kutu kulomba lutulu. Tudi mua kutshitabalela, kadi katuena mua kutshikolesha lukasa to. (Yak. 5:7) Bia muomumue, kukolesha malanda ne Nzambi kutu kulua ku kakese ku kakese. (Mâko 4:28) Tshilejilu, bidi mua kukolela bantu batudi tulongesha Bible bua kulekela malongesha ne bilele bidi Bible ubenga. Ki mbimpe kuenzeja mulongi ku makanda bua kushintulukaye to. Bidi bikengela kuikala ne lutulu bua kulekela dîba dia nyuma wa Nzambi kushintulula muoyo wa mulongi.—1 Kol. 3:6, 7.
4. Leja mudi lutulu mua kutuambuluisha bua kuyisha bimpe balela betu badi kabayi Bantemu.
4 Balela betu badi kabayi bena Kristo: Nansha mutudi tukeba ne muoyo wetu wonso bua balela betu kuitababu bulelela, bua kuleja lutulu, tudi ne bua kuindila tshikondo tshimpe tshia kubayisha, eku katuyi tubambila malu a bungi musangu umue to. (Muam. 3:1, 7) Kadi tudi ne bua kubalongesha bikole ku bienzedi bietu bimpe, tuindila bua kubayisha ne lutulu ne kanemu ka bungi padi mpunga umueneka. (1 Pet. 3:1, 15) Kakuyi mpata, mudimu muenza ne lutulu newikale muimpe mutambe, neusankishe Tatu wetu wa mu diulu.