“Nuikale ne mitshima ya luse”
1. Bantu badi dijinga dikole ne tshinyi lelu?
1 Katshia katshia bantu bungi nunku kabatu banji kuikala dijinga ne kubaleja luse mushindu eu to! Bua malu makole adi matangalake lelu, bantu kabena ne disanka to, badi ne dibungama dikole, mbapange ne wa kukuatshila bualu. Bu mudi bantu ba bungi dijinga ne diambuluisha, tuetu bena Kristo tudi ne bua kuleja mutudi basue kubambuluisha. (Mat. 22:39; Gal. 6:10) Tudi mua kuenza tshinyi?
2. Telabi mushindu mutambe bulenga wa kuleja bakuabu luse.
2 Mudimu udi ulomba luse: Anu Nzambi nkayende ke udi mua kutusamba bimpe menemene. (2 Kol. 1:3, 4) Bu mudi Yehowa muikale uditeka pa muaba wa bakuabu, udi utulomba bua ‘kuleja bakuabu mutshima wa luse’; mmutupeshe mudimu wa kutuadila bantu netu lumu luimpe lua Bukalenge buende. (1 Pet. 3:8) Kuyisha bikole ke mushindu mutambe buimpe wa kusamba ‘badi batamba kunyingalala,’ bualu Bukalenge bua Nzambi ke ditekemena dimuepele bua bantu badi bakenga lelu. (Yesh. 61:1) Bua luse ludi nalu Yehowa bua bantu bende, ukadi pa kumusha bulongolodi bubi ebu bua kuteka bulongolodi buimpe butambe.—2 Pet. 3:13.
3. Mmunyi mutudi mua kuidikija Yezu mu dimona dietu dia bantu?
3 Ikala umona bantu bu mudi Yezu ubamona: Pavua Yezu uyisha musumba wa bantu, kavua umona bantu anu mu tshibungi to. Uvua umona muvua muntu yonso wa kudibu dijinga ne kukolesha malanda ende ne Nzambi. Bavua bu mikoko ivua kayiyi ne mulami wa kuyilombola to. Yezu uvua umvua ku muoyo kumusama bua bivuaye umona, ke bualu kayi uvua ubalongesha ne lutulu. (Mâko 6:34) Tuetu bikale petu tumona majinga a muntu ne muntu, netumumvuile luse lulelela. Luse nelumuenekele mu diakula dietu ne ku mpala wetu. Tuetu ne luse, netuteke mudimu wa buambi kumpala kua malu etu onso, netukebe miaku ya kusamba nayi muntu ne muntu bilondeshile majinga ende.—1 Kol. 9:19-23.
4. Bua tshinyi mbimpe tuetu kuikala ne mitshima ya luse?
4 Misumba ya bantu ba mu matunga onso badi bitaba mukenji wa Bukalenge bua Nzambi ne badi basanka bua mutudi tubaleja luse. Tuetu tutungunuka ne kuikala ne mitshima ya luse, netutumbishe Yehowa Tatu wetu wa luse, netumusankishe kabidi.—Kolos. 3:12.