Bibejibeji bietu mbienza bua kukoka ntema ya bantu
1. Mupika wa lulamatu ne wa budimu udi widikija Paulo mushindu kayi?
1 Anu bu muvua mupostolo Paulo uyisha lumu luimpe bua kumona mua kupeta ‘bantu bonso,’ ke mushindu udi kabidi mupika wa lulamatu ne wa budimu ukuata mudimu ne bibejibeji bietu bua kupeta bantu ba mishindu yonso ne ba bitendelelu bishilashilangane. (1 Kol. 9:22, 23) Bua tuetu kuenza mudimu bimpe ne Tshibumba tshia Nsentedi ne Réveillez-vous!, bidi bikengela kumvua ne kumanya bimpe bantu badibu babifundila.
2. Batu bapatula Réveillez-vous! bua kukoka bantu kayi?
2 Réveillez-vous!: Badi bapatula tshibejibeji etshi bua bantu ba buena bavua Paulo muyishe pavuaye wakula ne “Bena Atena.” (Bien. 17:22) Bantu abu kabavua bamanye malu a bena Kristo to; kabavua bamanye malu avua mu Bible bimpe to. Bia muomumue, bantu badibu bafundila Réveillez-vous! mbamanye Bible kakese anyi ki mbamumanye to. Badi mua kuikala kabayi bamanye malongesha a bena Kristo, kabayi banange bitendelelu anyi kabayi bamanye mushinga udi nawu Bible. Kipatshila ka kumpala ka Réveillez-vous! nka kutuisha bantu bua bitabe ne: Nzambi udiku. Réveillez-vous! udi kabidi usaka bantu bua bitabe ne: Bible mmukanda wa Nzambi, bua bamanye ne: Bantemu ba Yehowa mbashilangane ne bitendelelu bikuabu.
3. Tshibumba tshia Nsentedi badi batshienzela banganyi ne banganyi?
3 Tshibumba tshia Nsentedi: Batu bapatula Tshibumba tshia Nsentedi tshia bantu bonso bua bantu batu banemekaku Nzambi ne Bible. Mbamanye Bible ndambu, kadi kabena bumvua malongesha ende bimpe menemene to. Mbenze bu bantu badi Paulo ubikila ne: “badi batshina Nzambi.” (Bien. 13:14-16) Badi bapatula Tshibumba tshia Nsentedi tshia kulonga bua Bantemu ba Yehowa. Paulo uvua wela meji ne: bantu bavuaye ufundila mikanda yende bavua bamanye Dîyi dia Nzambi, bavua ne dimanya dijalame dia bulelela. (1 Kol. 1:1, 2) Bia muomumue, badi bafunda malu adi mu Tshibumba tshia Nsentedi etshi bua bantu batu babuela mu bisangilu, badi bamanye Bantemu ne mayisha abu.
4. Bua tshinyi tudi ne bua kubala nimero yonso ya bibejibeji bia kufila mu buambi?
4 Nansha mututu tufila bibejibeji bia bungi pamue, tutu tuakula bua malu adi mu tshimue tshianana. Nanku mbimpe udifundile tshipatshila tshia kuikala kubala malu adi mu tshibejibeji tshionso. Wewe ubibala bionso, neubifile mu mushindu muimpe mutambe.