Unange mudimu webe bikole
1. Bantu ba bungi lelu batu bamona mudimu wetu wa buambi mushindu kayi?
1 Bantu ba bungi lelu batu bamona mudimu wetu wa buambi bu mudimu wa ‘bupote.’ (1 Kol. 1:18-21) Tuetu katuyi badimuke, tudi mua kuteketa mu mikolo ne kukepesha mudimu wetu. (Nsu. 24:10; Yesh. 5:20) Kadi tshidi mua kutusaka bua kunanga dikala Bantemu ba Yehowa ntshinyi?—Yesh. 43:10.
2. Bua tshinyi badi babikila mudimu wa buambi ne: ‘mudimu wa tshijila’?
2 ‘Mudimu wa tshijila’: Mupostolo Paulo wakabikila mudimu wa buambi ne: ‘mudimu wa tshijila.’ (Lomo 15:15, 16) Badi babikila mudimu wa buambi ne: ‘mudimu wa tshijila’ bua tshinyi? Bualu Yehowa udi ‘Wa tshijila.’ Patudi tuyisha, tudi tulua ‘benzejanganyi nende ba mudimu’; tudi kabidi tuenza bua dîna diende divuijibue dinsantu. (1 Kol. 3:9; 1 Pet. 1:15, NW) Yehowa udi umona diyisha dietu bu ‘mulambu wa kumutumbisha nawu’; nunku kuyisha ntshitupa tshinene tshia ntendelelu wetu.—Eb. 13:15.
3. Tshidi tshienza bua diyisha dia lumu luimpe dikale diakalenga dinene ntshinyi?
3 Anu bantu bakese tshianana ke badi ne diakalenga dinene dia kuyisha lumu luimpe. Banjelu badi mua kusanka bua kuyisha; ne badi mua kuyisha bimpe be! (1 Pet. 1:12) Kadi pabi Yehowa mmutusungule tuetu bantu bena bilema, ‘bintu biakafumbabu ne buloba,’ bua kuikala ne diakalenga dia pa buadi edi.—2 Kol. 4:7.
4. Tudi mua kuenza tshinyi bua kuleja ne: tudi tuanyisha mudimu wa buambi?
4 Mudimu wa kuenza ne lukasa: Bu mutudi tutua mudimu eu mushinga, tudi tuwumona bu tshintu ‘tshidi tshipite bulenga.’ (Filip. 1:10, Mukanda wa Mvidi Mukulu [Katolike]) Ke bualu kayi tudi tuyisha lumingu luonso. Tshilejilu, muimbi wa misambu udi ne dianyisha bua mudiye mu tshisumbu tshidi tshimanyike bikole udi ne bua kudilongolola musangu wonso udibu ne bua kuimba, ne udi ne bua kukeba bua kuakaja ngimbilu wende. Tuetu petu, tudi ne bua kuikala tudilongolola kumpala kua kuya mu buambi bua ‘kuludikila bantu njila mululame,’ ne tudi ne bua kudienzeja bua kuakaja ‘diyisha’ dietu.—2 Tim. 2:15; 4:2.
5. Nnganyi utu wanyisha mudimu wetu wa buambi?
5 Kulekedi ngikadilu mubi wa bantu ba bungi ukutekesha mu mikolo to. Uvuluke ne: kutshidi bantu ba bungi mu teritware wenu badi basue kuteleja. Kadi katuena tukeba kusankisha bantu to. Tudi tukeba kusankisha nangananga Yehowa; yeye mene udi ne dianyisha dia bungi bua mutudi badifile mu diyisha bantu.—Yesh. 52:7.