Buambi: Ndisanka ne lumu
1 Mudimu wa lumu luimpe udi disanka ne lumu bidi Yehowa mutupeshe. (Lomo 15:16; 1 Tim. 1:12) Ke mushindu utudi tumona mudimu eu anyi? Kupita kua dîba anyi kutuseka kua bantu netu kabiena ne bua kupepeja mushinga wa mudimu eu ku mêsu kuetu nansha. Bantu bakese tshianana mbadi ne disanka dia kuikala ne dîna dia Nzambi. Mmunyi mutudi mua kuangata disanka edi ne mushinga?
2 Buambi bua lumu lua Bukalenge kabuena butukokela dianyishibua kudi bena bulongolodi ebu nansha. Ba bungi badi bangata mudimu wetu ne ndengama kabidi ne bipukapuka. Bakuabu badi baupepeja ne bautuila nkanana. Dibenga edi didi mua kufumina kudi bena mudimu netu, kudi bena mutumba anyi kudi bana betu mu dîku. Ku mêsu kua bakuabu tudi bu batatakane anyi bapange lungenyi. (Yone 15:19; 1 kol. 1:18, 21; 2 Tim. 3:12) Kuakula kuabu bua kututekesha kudi kabidi ne tshipatshila tshia kufuatakaja tshisumi tshietu ne kutusaka bua kubenga disanka dietu edi dia mudimu. Satana ke udi mpokolo wa lungenyi lubi elu, bualu “mmufofomije tshieledi tshia lungenyi tshia badi babule ditabuja, bua kabakenkeshibu kudi butoke bua lumu luimpe lua butumbi.” (2 Kol. 4:4, NW) Mmunyi mutudi tuandamuna?
3 Bidi bikengela tulame mu lungenyi se: mudimu wa buambi bua lumu lua Bukalenge udi ne mushinga mukole kupita yonso itudi mua kuenza lelu’eu. Tudi tumanyisha lumu lua lupandu ludi bantu kabayi mua kumanyina ku ngenzelu mukuabu. (Lomo 1O:13-15) Tshidi ne mushinga nkuanyishibua kudi Nzambi kadi ki nkudi bantu. Mmuenenu mubi udi kudi bantu pa mudimu wetu wa buambi kêna mua kutupangisha bua kumanyisha lumu luimpe ne dikima.—Bienzedi 4:29.
4 Yezu wakangata ne mushinga mukole disanka divua diende dia kuenza disua dia Tatuende. (Yone 4:34) Wakadifila ne muoyo mujima mu mudimu wende ne kavua mulekelele mpokolo mishilashilangane ya ditanaji anyi baluishi bende bua kumupumbisha. Buambi bua lumu lua Bukalenge buvua pa muaba wa kumpala mu nsombelu wende. (Luka 4:43) Tudi ne bua kumuidikija, ndîyi-ditutumina. (1 Petelo 2:21) Pa kuenza nanku, netuikale “benzejanganyi ba mudimu ne Nzambi.” (1 Kol. 3:9) Tudiku tuleja ne: tudi tuanyisha menemene disanka ditupesha edi anyi? Tutuku tukeba mushindu wa kumanyisha lumu luimpe kudi bantu netu mu dîba dilongolola mu programe wetu nansha mu mpukapuka anyi? Bu mutudi Bantemu ba Yehowa, tudi ne bua kuikala badiakaje bua ‘kuenza dimanyisha dia patoke bua dîna diende.’—Eb. 13:15, NW.
5 Mmuenenu wetu ke udi utufikisha ku dienza mudimu muvule anyi mukese. Tutuku ne dianyisha diondoke bua bionso bidi Yehowa utuenzela anyi? Tudiku tukuna mu mitshima yetu dinanga dia Yehowa, bua tuetu kudifila bikole mu mudimu wende anyi? Bituikala tueleela meji pa mabenesha atudi nawu lelu ne makuabu adi Yehowa mutulaye bua matuku atshilualua, netumvue dinanga dibodiame bua Mufuki wetu. Dinanga dia mushindu’eu neditusake bua kuleja, mu mishindu yetu yonso, dinanukila ne kuikala ne tshibidilu bua kumanyisha Bukalenge. Tshisumi tshietu netshisokolole dinanga dietu kudi Yehowa ne kudi bantu netu.—Mako 12:30, 31.
6 Tudi tuleja mushinga utudi tuambika tshintu kampanda ku mushindu utudi tutumika natshi ne mushindu utudi tuakula bualu buatshi. Tutu tuambika bushuwa disanka dietu dia kuamba lumu lua Bukalenge mushinga mupitshile anyi? Tutu tutumbisha mudimu wetu anyi? Tutu bapangadije bua kusuminyina mu mudimu eu wa mushinga, nansha kuikala buluishi anyi? Tuetu banange disanka dilenga edi dia mudimu, netuikale bushuwa ne tshisumi ne mutshima wetu newikale wonso ku mudimu eu.—2 Kol. 4:1, 7.