Tuikalayi ne tshisumi mu buambi
1 Katshia mu tshidimu tshia 1992, Bantemu ba Yehowa batu bapitshisha tshidimu tshionso etshi mêba mapite pa muliare mujima mu mudimu wa kuyisha ne kuvuija bantu bayidi. Tudi ne disanka dia bungi bua mutudi benzaku petu mudimu wa mushinga mukole eu.—Mat. 28:19, 20.
2 Bushuwa, butumbi ne tshianga bidi biya kudi Yehowa udi utuambuluisha mu mudimu wetu mu matuku a “malu makole” aa. (2 Tim. 3:1) Ntshinyi tshitudi ne bua kuenza bua kumona mua kutungunuka ne kuenza mudimu eu wa mushinga mukole ne tshisumi?
3 Kudi tshisumi tshifumina: Dinanga dikole ditudi banange Nzambi ne bantu netu, pamue ne dijinga dikole dia kukumbaja mutshipu utuvua baditshipe patuvua badilambule kudi Nzambi ke bidi bitusaka bua kuikala ne tshisumi mu buambi. (Mat. 22:37-39; 1 Yone 5:3) Dinanga didi ditusaka bua kudipangisha amue malu bua kumona mua kuyisha bikole.—Luka 9:23.
4 Dienzeje bua kuikala ne tshisumi: Muluishi wetu Diabolo udi wenza muende muonso bua kukepesha tshisumi tshitudi natshi bua mudimu wa buambi. Amue malu adiye wenza nawu mudimu bua kutupangisha bua kuyisha ne tshisumi ngowu aa: dibenga kututeleja dia bantu ba muaba utudi, malu a mu bulongolodi ebu adi afila ditanaji, ntatu ya mu nsombelu ne masama.
5 Nansha nanku, tudi ne bua kuenza muetu muonso bua kuikala ne tshisumi. Mbimpe tuetu kulama “dinanga [dietu] dia kumudilu.” Bua kudilama, tudi ne bua kuikala tubala Dîyi dia Nzambi dituku dionso ne tuelelapu meji ne tutumikila mibelu yonso idi Yehowa utupesha ku butuangaji bua ‘mupika wa lulamatu udi ne meji.’—Buak. 2:4; Mat. 24:45; Mus. 119:97.
6 Anu bu mudi milayi ya mu Bible ileja, dituku dikale Yehowa mua kubutula bantu babi ndisemene pabuipi bikole. (2 Pet. 2:3; 3:10) Ke bualu kayi, tuenzayi muetu muonso bua kuikala ne tshisumi mu mudimu wa buambi pa kumanyisha Bukalenge bua Nzambi pa buloba bujima ne kuvuija bantu bayidi mpindieu.