“Nuikale ne lukunukunu mu mitshima yenu”
1. Ngikadilu kayi utudi ne bua kuikala nende mu mudimu wetu wa diyisha?
1 Kakuena tshitupa tshia mudimu wetu wa buena Kristo tshidi ne bua kushala tshimane to. Bible udi utukankamija ne: “Nuikale ne lukunukunu mu mitshima yenu; nukuatshile Nzambi mudimu.” (Lomo 12:11) Kadi kudi malu a bungi adi mua kukepesha tshisumi tshietu mu mudimu wa diyisha. Mmunyi mutudi mua ‘kusonsola’ tshisumi tshietu ne musangelu wetu bua mudimu wetu wa Bukalenge?—2 Tim. 1:6, 7.
2. Ndiumvuangana kayi didi pankatshi pa didilongela Bible ne mudimu wa diyisha muenza ne tshisumi?
2 Kudilongela Bible: Muyishi muimpe wa Bukalenge bua Nzambi ngudi munange mikenji ya Nzambi ne umvua malongesha adimu amutuila mu muoyo wende. (Mus. 119:97) Patudi tujingulula malu a mushinga mukole mu Bible dîba ditudi tudilongela, adi asonsola mioyo yetu, avudija lukunukunu luetu. Dinanga dia Nzambi udi utupa malongesha aa ne dijinga dietu dia kuyisha bakuabu lumu luimpe bidi bitusaka bua kumutumbisha ne kujukuila bakuabu bualu bua dîna diende. (Eb. 13:15) Bulelela, patudi tuyisha lumu luimpe ne tshisumi, tudi tuleja mutudi bumvue mushinga walu bimpe.
3. Ndiambuluisha kayi didi nyuma wa Nzambi nadi mu mudimu wetu wa diyisha?
3 Lomba Nzambi nyuma wende: Mudimu wetu wa diyisha kawena upatula bipeta bilenga ku bukole buetu tuetu to. Lukunukunu lulelela ndua kudi nyuma wa Nzambi padiye utuludika kakuyi tshipumbishi. (1 Pet. 4:11) Kusemena pabuipi ne Mpokolo wa ‘bukole bunene,’ nekutupetesha bukole bua mu nyuma bua kuyisha ne dikima dionso. (Yesh. 40:26, 29-31) Pavua mupostolo Paulo mupete ntatu mu mudimu wende, ‘wakapeta dikuatshisha dia kudi Nzambi.’ (Bien. 26:21, 22) Nyuma muimpe wa Yehowa udi ufila bukole udi mua kutuambuluisha bua kuikala ne lukunukunu mu mudimu wetu; nanku tudi ne bua kulomba Nzambi bua kutupaye.—Luka 11:9-13.
4. Mmalu kayi mimpe adi tshisumi tshietu mua kulela? Kadi tudi ne bua kudimuka mushindu kayi?
4 Tshisumi tshietu tshikole mu mudimu wa diyisha Bukalenge tshitu misangu mivule tshijula bena Kristo netu bakuabu pabu lukunukunu lukole. (2 Kol. 9:2) Mu teritware, bitu pamuapa bipepele bua bantu kuitaba mukenji utudi tubambila ne dishindika ne musangelu wonso. Kadi ku lukunukunu luetu alu tusakidilaku bukalanga ne bupole. (Tito 3:2) Misangu yonso, tudi tukeba mua kunemeka batudi tuyikila nabu ne kubalekela budikadidi bua kudisunguilabu tshidibu basue.
5. Mubelu wa kudi Nzambi utudi ne bua kudienzeja bua kutumikila mmubelu kayi?
5 Bu mutudi bamanyishi ba Bukalenge, ‘tuikalayiku anu ne lukunukunu mu mitshima yetu.’ Tudijule tshisumi pa kudilongela Bible ne kulomba Yehowa misangu yonso mu masambila, bualu yeye ngudi mua kutupa nyuma muimpe wa bukole. Mushindu eu ke utudi mua kukumbaja mudimu wetu ne ‘nyuma muimpe ne kumanya kujalama.’—1 Tes. 1:5.