Katutu tuangata konje to!
1. Bua tshinyi tudi tuamba ne: bena Kristo ba kumpala kabavua bangata konje to?
1 Bena Kristo ba kumpala bavua bayisha lumu luimpe ne tshisumi. Bavua bayisha bantu muaba wonso uvuabu babapeta, ‘kabayi balekela’ to. (Bien. 5:42) Nunku, katuena mua kuela meji ne: pavuabu bumbuka ku nzubu umue bua kuya ku mukuabu, bavua babenga kuyisha bantu bavuabu basambakena nabu mu njila. Kabidi, panyima pa bobu bamane kujikija buambi kabavua mua kubenga kuyisha pavua mpunga umueneka dîba divuabu basumba bintu mu tshisalu to. Anu bu Yezu, kabavua banji kuangata konje to!—Mâko 6:31-34.
2. Kuikala Ntemu wa Yehowa kudi kumvuija tshinyi?
2 Kuikala anu badilongolole: Dîna ditudi nadi dia Bantemu ba Yehowa kadiena amu dileja tshitudi tuenza to; kadi didi kabidi dileja tshitudi tuetu bine. (Yesh. 43:10-12) Ke bualu kayi tudi anu badiakaje bua kuyisha, nansha patudi katuyi ku nzubu ne ku nzubu. (1 Pet. 3:15) Utuku wanji kuela meji bua mpunga idi mua kumueneka bua wewe kuyisha ne kukeba tshiudi mua kuamba anyi? Utuku amu ne mikanda ya kupesha muntu yonso udi mua kusankidila bulelela anyi? (Nsu. 21:5) Utu uyisha anu ku nzubu ne ku nzubu, anyi peshi utu kabidi uyisha mu nsombelu mikuabu padiku mushindu?
3. Mmushindu kayi utudi mua kubikila buambi bua patudi tuyisha mu njila, miaba idi mashinyi imanyina, mu parke, miaba idibu basumbishila bintu ne miaba mikuabu?
3 Kuyisha “muaba udi bantu”: Mupostolo Paulo udi wamba ne: uvua uyisha ‘muaba uvua bantu’ bunguile ne ku nzubu ne ku nzubu. (Bien. 20:20) Nunku “kuyisha muaba udi bantu” ntshiambilu tshidi tshiakanyine patudi tuyisha mu njila, miaba itu mashinyi imanyina, mu parke, miaba idibu bapanyina bintu ne mikuabu miaba. Kakuyi mpata, kuyisha ku nzubu ne ku nzubu kutshidi anu mushindu wetu munene ne muimpe mutambe wa kuyisha bantu. Kadi tshivua bena Kristo ba kumpala bakeba, mbantu, ki nnzubu to. Bavua bakeba mushindu wonso uvua umueneka bua kuyisha bulelela: muaba uvua bantu, pavua mpunga upeteka, ne ku nzubu ne ku nzubu. Tulondayi tshilejilu tshiabu.—2 Tim. 4:5.