Ukadi mudilongolole bua mpukapuka idi mua kukufikila anyi?
Mpukapuka itu ifika diakamue, muntu kayi mumanye. (Yak. 4:14) Nanku muntu udi mudimuke utu udianjila kudilongolola bikole. (Nsu. 22:3) Ukadi musungule mushindu udibu mua kukondopa anyi? Udi mufunde dipangadika edi mu karte kebe anyi? Bua kutuambuluisha, mbapatule filme wa Soigner sans transfusion—Besoins et droits du patient (filme muibidi wa mu DVD wa Des alternatives à la transfusion—Documentaires). Paudi utangila filme eu, wikale wenda ukeba mandamuna a nkonko idi kuinshi eku. Kadi bu mudi filme eu muikale ne imue miaba idibu baleja mudibu bapanda bantu, baledi badi ne bua kuikala ne budimu padibu bamutangila ne bana babu ba batekete.
1) Bamue baminganga kabatshitu bela bantu mashi bua tshinyi? 2) Fila bilejilu bisatu bia bantu bavuabu bapande kadi kabayi babele mashi to. 3) Tshidi tshienze bua baminganga ba bungi bitabe bua kupanda bantu kabayi babela mashi ntshinyi? 4) Ntshinyi tshidi malu adibu bakonkonone mu imue mpitadi matuku aa maleje bua tshilumbu tshia dielangana dia mashi? 5) Padibu bela bantu mashi, nnjiwu kayi idi mua kumueneka? 6) Ntshinyi tshidi baminganga ba bungi bafike ku diamba bua bulenga bua diondopa bantu kabayi babela mashi? 7) Tshitu tshikepesha mashi mu mubidi ntshinyi? Bidi bikengela kuenza tshinyi bua kuambuluisha mubedi udi mashi makepele? 8) Badi mua kuvudija globile mikunze mu mubidi wa mubedi mushindu kayi? 9) Badi mua kuenza malu kayi bua mashi kaapatuki a bungi padibu bapanda muntu? 10) Ngondapilu ya kubenga kuela mashi idi mua kukumbanyina bana bakese anyi bantu badi mu njiwu ya lufu anyi? 11) Tshimue tshia ku bikadilu binene bimpe tshidi munganga ne bua kuikala natshi, ntshikadilu kayi?
Bu mudi kuitaba imue ya ku ngondapilu idibu baleja mu filme eu kuikale dipangadika dia muntu nkayende ne kondo kende ka muoyo, kuindidi anu pafika mpukapuka bua kuleja ngondapilu uudi musue to. Bua kuangata dipangadika dimpe, ubale mukanda wa “Dinanga dia Nzambi” mu nshapita wa 7; ubale ne mikanda mikuabu idibu balejamu ne Mudimu wetu wa Bukalenge wa Kasuabanga 2006. Biwikale mutambule, ufunde mpindieu malu audi musungule au mu karte kebe ka DPA. Wikale ne karte aka dîba dionso.
[Lungenyi lunene lua mu dibeji 3]
Ukadi musungule mushindu udibu mua kukondopa anyi? Udi mufunde dipangadika edi mu karte kebe anyi?