Ukadi muuje anyi?

Muuje tshinyi? Karte ka Instructions médicales (DPA) kadi Bantemu bonso bakadi batambule ne bua kuuja. Bu mutudi ‘katuyi bamanye malu ikaleku makelela,’ mbimpe tuetu kusungula kumpala kua dîba mushindu utudi basue bua batondope dîba ditudi ne disama anyi njiwu mikole idi ilomba bua batuele mashi. (Yak. 4:14; Bien. 15:28, 29) Bua kutuambuluisha, mbapatule bande wa video wa Soigner sans transfuser​—Besoins et droits du patient. Tangila bande eu, ela meji ku malu audi mulonge ku diambuluisha dia nkonko idi kuinshi eku.​—Dimanyisha: Bu mudi bande eu muikale ne imue miaba idibu baleja mudibu bapanda bantu, baledi badi ne bua kuikala ne budimu padibu bamutangila ne bana babu batekete.

(1) Bua tshinyi bamue baminganga kabatshitu bela bantu mashi? (2) Fila bilejilu bisatu bia bantu bavuabu bapande kadi kabayi babele mashi to. (3) Kudi baminganga bungi kayi pa buloba bujima badi bitabe bua kupanda bantu kabayi babela mashi? Bua tshinyi mbitabe bua kuenza nanku? (4) Ntshinyi tshidi malu adibu bakonkonone mu imue mpitadi matuku aa maleje pa tshilumbu tshia dielangana dia mashi? (5) Padibu bela bantu mashi, nnjiwu kayi idi mua kumueneka? (6) Ntshinyi tshidi baminganga ba bungi bafike ku diamba bua bulenga bua diondopa bantu kabayi babela mashi? (7) Tshitu tshikepesha mashi mu mubidi ntshinyi? Ndîba kayi didi njiwu kayiyiku nansha mashi wowu makepele? Bidi bikengela kuenza tshinyi bua kuambuluisha mubedi udi ne mashi makepele? (8) Badi mua kuvudija globile mikunze mu mubidi wa mubedi mushindu kayi? (9) Mmalu kayi adibu mua kuenza bua mashi kaapatuki a bungi padibu bapanda muntu? (10) Ngondapilu ya kubenga kuela mashi idi mua kukumbanyina bana bakese anyi bantu badi ne njiwu ya lufu anyi? (11) Ntshimue tshia ku bikadilu binene kayi bimpe tshidi munganga ne bua kuikala natshi? (12) Bua tshinyi mbimpe bena Kristo kudianjilabu kusungula mushindu udibu basue bua babondope kabayi babela mashi? Ntshinyi tshidibu mua kuenza?

Kuitaba imue ya ku mishindu idibu baleja mu bande eu ndipangadika didi muntu ne muntu ne bua kudiangatshila bilondeshile kondo kende ka muoyo kalongesha kudi Bible. Ukadi musungule mushindu uudi musue bua bakondope wewe ne bana bebe anyi? Ukadi muuje karte ka DPA anyi? Bua malu makuabu adi atangila tshilumbu etshi, bala bimpe bimpe mukanda wa “Dinanga dia Nzambi” mu nshapita wa 7; ubale ne mikanda mikuabu idibu bakulomba bua kubala mu nshapita wa 7 eu. Udi kabidi mua kubala tshisakidila tshia Mudimu wetu wa Bukalenge wa Kasuabanga 2006 tshidi tshiamba ne: “Tshingenza ntshinyi pikalabu bakeba kungela tuntu tukese tua mu mashi anyi bakeba kungondopa ne ngondapilu idi ilomba mashi anyi meme muine?” Ufunde bimpe mpindieu malu audi musungule mu karte kebe ka DPA. Umvuija bantu baudi musungule bua bababikile dîba diudi usama bikole ne bena dîku diebe badi kabayi Bantemu tshiudi muangatshile dipangadika edi bimpe.

[Kazubu mu dibeji 3]

• Ukadi musungule mushindu uudi musue bua bakondope wewe ne bana bebe anyi?

• Utu wendakana ne karte kebe ka DPA kuuja bimpe bua nansha pikala mpukapuka mienzeke anyi?