Ukadi mumanye tshiwasungula anyi?

Bungi bua mpitadi idi ipanda bantu kakuyi dibela mashi budi buenda anu buvula. Ukadi mumanyaku mishindu ya luondapu idiku mpindieu idi muntu mua kusungula padiye kayi musue bua bamuele mashi anyi? Mbimpe wewe kuyimanya bua ulue kusungula ne meji onso ngondapilu kampanda dîba dia kukuondopabu anyi kukupandabu. Utangile filme wa Pas de sang: la médecine relève le défi. Pashishe usambile bua kukonkonona biudi mumone ku diambuluisha dia nkonko idi kuinshi eku.​—Dimanyisha: Bu mudi filme eu muikale imue miaba uleja mudibu bapanda bantu, mbimpe baledi bikale ne budimu padibu bamutangila ne bana batekete.

(1) Mbualu kayi bunene butu Bantemu ba Yehowa babengela bua kubelabu mashi? (2) Tshitu Bantemu ba Yehowa bakeba padibi bikengela kudiondapisha ntshinyi? (3) Mbukenji kayi budi nabu mubedi yonso padibu basua kumuondopa? (4) Bua tshinyi kusungula ngondapilu ya kabayi bakuela mashi ki mbutatakane anyi kulengulula kua muoyo webe? (5) Padi mashi apatuka mapite bungi, baminganga badi ne bua kuanji kuenza malu kayi manene abidi? (6) Tela malu manene anayi a kuenza bua kuondopa anyi kupanda muntu bimpe kabayi bamuela mashi. (7) Mmushindu kayi udi badoktere mua (a) kukepesha bungi bua mashi adi aya panshi, (b) kulobelela bungi bua tubulu tua mashi tukunze (anyi globile mikunze), (c) kuvudija mashi mu mubidi, ne (d) kuenza bua kubenga kujimija mashi adi apatuka mu mubidi wa muntu? (8) Umvuija ngondapilu udibu babikila ne: (a) diengulula dia mashi (hémodilution) ne wa (b) dibenga kujimija mashi adi apatuka mu mubidi wa muntu. (9) Tshiudi ne bua kumanya ntshinyi bua ngondapilu yonso udibu mua kukuondopa nende padibu kabayi bakuela mashi? (10) Muntu udi baminganga kabayi mua kupanda bipepele badiku mua kumupanda kabayi bamuela mashi anyi? (11) Leja bualu buimpe budi baminganga benda benza mu malu a diondopangana matuku etu aa.

Kuitaba imue ya ku mishindu ya diondopangana idibu baleja mu filme eu mbualu bua muntu kudisunguilaye nkayende bilondeshile kondo kende ka muoyo kalongesha kudi Bible. Ukadi mudisunguile mushindu wa luondapu uudi umona muimpe buebe wewe ne bua bana bebe ne muuje karte ka Instructions médicales (DPA) anyi? Bua kumanya malu a bungi, ubale bimpe bimpe “Nkonko ya babadi” mu Tshibumba tshia Nsentedi tshia dia 15 Kabalashipu 2004 ne tshia dia 15 Kasuamansense 2000. Pashishe, bua wewe nkayebe kusungula ngondapilu uwitaba anyi uwabenga, bala malu adi mu tuzubu mu tshisakidila tshia Mudimu wetu wa Bukalenge wa Kasuabanga 2006 tshidi tshiamba ne: “Tshingenza ntshinyi pikalabu bakeba kungela tuntu tukese tua mu mashi anyi bakeba kungondapa ne ngondapilu idi ilomba mashi anyi meme muine?” Ku ndekelu, ufunde malu audi mudisunguile au bimpe mu karte kebe ka Instructions médicales (DPA). Udi ne bua kumvuija bena Kristo baudi musungule bua kukuakuila ne balele bebe badi kabayi Bantemu ngondapilu uudi mudisunguile.