Netutuadije kubikila bantu mu Tshivulukilu mu dia 17 ngondo 3
1. Netubange kuenza tshinyi mu dia 17 ngondo 3?
1 Tutu tuenza Tshivulukilu tshidimu tshionso bua kuambila bantu bua lufu lua Yezu. (1 Kol. 11:26) Nanku tutu basue bua bantu bakuabu kubuelamu netu bua kumvua mudi Yehowa mutunange pakafilaye mulambu bua kutupikula nawu. (Yone 3:16) Bua tshidimu etshi, netutuadije kubikila bantu mu Disambombo dia matuku 17 a ngondo 3. Udiku muindile ne muoyo kulu kulu bua kuyisha bikole anyi?
2. Mmunyi mutudi mua kufila mabeji a dibikila nawu bantu?
2 Tshitudi mua kuamba: Mbimpe kuakula mêyi makese. Tshilejilu, tudi mua kuamba ne: “Muoyo webe awu! Tudi balue kunupesha dibeji dia kunubikila nadi mu tshibilu tshinene tshikala mua kuenzeka pa buloba bujima mu dia matuku 5 a ngondo 4. Nebenze muyuki bua kumvuija tshidi lufu lua Yezu lutuenzele ne tshidi Yezu wenza mpindieu. Dibeji edi didi dileja muaba ne dîba dituikala mua kudisangisha.” Patudi tuabanya mabeji aa mu Disambombo anyi mu Dia lumingu, tufile kabidi bibejibeji padibi biakanyine.
3. Tudi mua kuenza tshinyi bua kubikila bantu ba bungi menemene?
3 Bikila bantu ba bungi: Kipatshila ketu nka kubikila bantu ba bungi menemene. Ke bualu kayi mbimpe ubikile balongi bebe ba Bible, bantu bakuabu bautu uyisha, balela bebe, bena mudimu nebe, balongi nebe, bena mutumba benu ne bamanyangana nabu bakuabu. Bakulu nebanuleje mua kuyisha mu teritware. Patutu tubikila bantu mu Tshivulukilu tshidimu tshionso, kutu kupatuka bipeta bimpe. Tshilejilu, pakafika mamu mukuabu mu Tshivulukilu, umue wa ku bana betu bavua bakidila benyi wakamulomba bua kumuambuluisha bua kupeta muntu uvua mumubikile. Kadi mamu wakamuambila ne: kavua mumanye muntu nansha umue muaba au to. Bavua bamupeshe dibeji dia dibikila mu dinda kudi muntu uvua wenda ushiya ku nzubu ne ku nzubu.
4. Tshidi ne bua kutusaka bua kuabanya mabeji bikole ntshinyi?
4 Bumue, bamue bantu baudi mubikile nebalue mu Tshivulukilu, kadi nansha bobu kabayi balue, udi anu mubayishe bualu uvua mubapeshe mabeji aa. Mabeji aa neabaleje ne: Yezu udi Mfumu munene mpindieu. Paudi uyisha bikole, udi uleja bantu ne: udi ne dianyisha dia bungi bua mulambu wa Yezu. (Mu bantu aba mudi: bena mu teritware wenu, bena Kristo nebe, ne nangananga Yehowa.)—Kolos. 3:15.