Bantemu ba Yehowa—Ditabuja mu tshienzedi, tshitupa tshia 1: Dipatuka mu mîdima
Mu Bible batu bafuanyikija butoke ne bulelela, mîdima ne dishima. (Mus. 43:3; Yesh. 5:20) Satana ke wakabueja mîdima pa buloba: dîba diakashimaye Eva. Pashishe, kuluaye kutangalaja mîdima eyi pa buloba bujima. (Buak. 12:9) Filme wa Les Témoins de Jéhovah—la foi en action, 1re partie: la sortie des ténèbres (Bantemu ba Yehowa—Ditabuja mu tshienzedi, tshitupa tshia 1: Dipatuka mu mîdima) udi uleja muakatuadija butoke bua Nzambi kukenkesha mu mîdima. (Yesh. 60:1, 2) Paudi ujikija kumona filme eu, tetabi mua kuandamuna nkonko eyi:
1) Pakafua bapostolo, mîdima mikole yakalua mushindu kayi? 2) Mu bidimu bia 1100, tshiakaleja bantu ne: bitendelelu kabivua bilongesha bulelela ntshinyi? 3) Henry Grew ne George Storrs bavua banganyi? 4) Kuvua malu avua mafikile Charles Russell, owu kumuelesha meji. Mmalu kayi au? 5) Muanetu Russell ne tatuende ne bamue balunda babu bavua balonga Bible mushindu kayi? Bakafika ku dimona ne: Bible udi wamba tshinyi? 6) Kasumbu kabu ka dilonga dia Bible kakafika ku didisangisha ne ka Nelson Barbour munyi? Kadi bua tshinyi muanetu Russell wakalua kuditapulula ne Barbour? 7) Tshiakenzeka mu ngondo wa 7 wa 1879 bua butoke kutuadijilula ntshinyi? 8) Pakapita matuku, Balongi ba Bible bavua benza tshinyi bua kumuangalaja lumu luimpe? 9) Bidimu bia bungi kumpala, Balongi ba Bible bakamanyisha ne: mbualu kayi buvua ne bua kuenzeka mu tshidimu tshia 1914? 10) Pakafua muanetu Russell, Balongi ba Bible bakapeta ntatu kayi? 11) Pavuabu bapatule muanetu Rutherford ne bena diende mu buloko, Balongi ba Bible bakenza tshinyi? 12) Filme eu mmukuambuluishe bua kukolesha dianyisha diebe bua bulongolodi bua Yehowa mushindu kayi? 13) Filme eu mmukoleshe dipangadika diebe dia kutungunuka ne kuyisha nansha mu ntatu mushindu kayi? 14) Leja mutudi mua kuambuluisha balela betu ne balongi ba Bible ne bantu bakuabu ne filme eu.
Balongi ba Bible abu mbatushile bumpianyi butambe buimpe be! Nansha muvuabu mu bulongolodi buvua mu mîdima mu malu a Nzambi, bavua ne dikima ne tshisumi bua kukenkesha butoke. Tulondayi tshilejilu tshiabu, ‘tuendayi bietu bu bana ba munya.’—Ef. 5:8.