Mbualu kayi buudi ne bua ‘kuditumbishila’?
1. Mbualu kayi budi mua kutusaka bua kuikala ne disanka padi ngondo ujika?
1 Patubu balomba bantu bua kufila luapolo lua mudimu ku ndekelu kua ngondo yonso, utu ‘uditumbishila’ wewe ne tshinyi? (Gal. 6:4) Nansha wewe mpanda-njila wa pa buende udi ufila mêba 130 ku ngondo yonso anyi wewe muambi wa lumu udibu banyishile bua kufila minite 15, tuetu bonso tudi ne bua kuikala ne disanka bua mudimu utudi benzele Yehowa ne muoyo wetu wonso.—Mus. 100:2.
2. Bua tshinyi tudi ne bua kudifila bikole mu dienzela Yehowa mudimu?
2 Bu mudi Yehowa muikale Mukalenge mutambe bunene, mmukumbane bua tuetu kumupesha tshintu tshidi tshitambe buimpe. (Mal. 1:6) Bu mutudi bamunange, tuvua badilambule kudiye bua kuenza disua diende. Nanku, bua tuetu kupeta tshia kuditumbishila natshi padi dituku dijika anyi padi ngondo ujika, tudi ne bua kuikala batuishibue ne: tudi bafile “mamuma a kumudilu” patudi benze mudimu ne dîba dietu, bipedi bietu ne bukole buetu mu mudimu wa Yehowa. (Nsu. 3:9) Kadi pikalabi ne: kondo ketu ka muoyo kadi katuambila mutuvua mua kuenza kupitshisha apu, mbimpe tutangile tshitudi mua kuenza bua kuakaja.—Lomo 2:15.
3. Ki mbimpe wewe kudifuanyikija ne bakuabu bua tshinyi?
3 ‘Kudifuanyikiji ne muntu mukuabu’: Ki mbimpe kudifuanyikija ne bakuabu anyi ne wewe nkayebe tshikondo tshiuvua ne makanda a bungi to. Malu atu ashintuluka. Bantu bonso kabatu ne makanda a mushindu umue to. Misangu ya bungi kudifuanyija kutu kufikisha ku ditembangana anyi ku didimona katuyi ne mushinga to. (Gal. 5:26; 6:4) Yezu kavua ufuanyikija bantu to. Pamutu pa kubafuanyikija, uvua wela muntu ne muntu kalumbandi bilondeshile tshivuaye mukokeshe bua kuenza.—Mâko 14:6-9.
4. Mu lusumuinu lua Yezu lua ntalanta, tudi tupeta malongesha kayi?
4 Mu lusumuinu lua Yezu lua ntalanta, muena mudimu yonso uvua mupete ntalanta ‘bu mudi lungenyi luende.’ (Mat. 25:15) Pavua mfumu wa mudimu mupingane, wakabalomba luapolo lua mudimu. Wakela aba bavua benze mudimu bimpe kalumbandi bilondeshile makanda abu ne nsombelu wabu, kubuelabu mu disanka dia mukalenge wabu. (Mat. 25:21, 23) Bu mutudi tuyisha petu bikole, tuikale bashindike ne: Nzambi udi utuanyisha, ne tudi ne tshia kuditumbishila natshi.