Ambuluisha bantu bua bateleje Nzambi

1. Mu Mpungilu wa Distrike wa ‘Bukalenge bua Nzambi bulue,’ bavua bapatule broshire kayi? Bua tshinyi idi ne mushinga wa bungi?

¹ Mu mpungilu wa distrike wa ‘Bukalenge bua Nzambi bulue,’ tuvua bapete broshire mipiamipia ibidi: wa Teleja Nzambi bua upete muoyo wa tshiendelele ne mukuabu mupepeja wa Teleja Nzambi. Bu mudi broshire eyi kayiyi ne malu a bungi, mbipepele bua kuyikudimuna mu miakulu mikuabu ne lukasa luonso. Ke bualu kayi pakapatulabu broshire wa Teleja Nzambi bua upete muoyo wa tshiendelele, bakanyisha bua kumukudimuna mu miakulu 431.

2. Broshire eyi neyambuluishe banganyi?

² Broshire eyi neyambuluishe nangananga banganyi? Tukonkononayi malu atu enzeka miaba ya bungi adi alonda aa:

• Mumanyishi wa lumu luimpe udi uyukila ne muntu bua musangu wa kumpala anyi padiye umupinganyina, kadi udi umona ne: udiye uyukila nende kena mumanye kubala anyi udi ubala bibi.

• Mumanyishi wa lumu luimpe udi uyisha bantu badi bakula muakulu utudi katuyi banji kukudimuna mikanda anyi bakudimune anu mikanda mikese. Peshi bantu ba bungi badi bakula muakulu kampanda bimpe, kadi kabayi bamanye kuwubala.

• Mumanyishi udi wakula muakulu wa tumama bua kuyisha tumama tudi mu teritware wende.

• Muledi udi ujinga kulongesha muanende mutekete Bible, kadi muana kena muanji kumanya mua kubala.

3. Mbenze broshire wa Teleja Nzambi mushindu kayi?

³ Mushindu udibu benze broshire eyi: Mbafunde malu makese menemene mu broshire wa Teleja Nzambi. Mbafunde ngenyi minene misangu ya bungi mu tshiambilu tshimue tshianana ne mvese umue kuinshi kua dibeji dionso. Mbamuenze nanku bua tshinyi? Elabi meji ne: mbakupeshe mukanda mufunda mu muakulu uudi kuyi mumanye kubala, imue misangu mu mfundilu uudi kuyi mumanye. Nansha wowu ne bimfuanyi bimpe, udiku mua kukusankisha anyi? Kawakusankisha bantu ba bungi to. Bia muomumue, patubu bapesha bantu batu kabayi bamanye kubala bimpe mikanda ya kubala, bitu bibatonda. Ke bualu kayi mu dibeji dionso mudi bimfuanyi bizola bimpe menemene. Kudi tumiketa tudi tuambuluisha bua kuyukila ne muntu kumbukila ku tshimfuanyi tshimue kuya ku tshikuabu.

4. Mbenze broshire wa Teleja Nzambi bua upete muoyo wa tshiendelele mushindu kayi?

⁴ Broshire wa Teleja Nzambi bua upete muoyo wa tshiendelele udi ne bimfuanyi bia muomumue ne bidi mu broshire wa Teleja Nzambi. Mbamuenze bua kulonga ne bantu badi ne lutatu lua kubala anyi batshidi balonga mua kubala. Mulongeshi udi kabidi mua kuikala ne broshire wa Teleja Nzambi bua upete muoyo wa tshiendelele nansha mulongi yeye muikale ne wa Teleja Nzambi. Mu mabeji onso abidi mudi mandamuna a lukonko ludi ku mutu lua ku dia bakaji. Mudi kabidi bimfuanyi ne diumvuija ne mvese. Kuinshi kua amue mabeji mu ditumba kudi kazubu kadi ne makuabu malu manene ne mvese inudi mua kukonkonona ne mulongi bilondeshile lumvu luende.

5. Tudi mua kufila broshire eyi dîba kayi? Mushindu kayi?

⁵ Mua kuenza nayi mudimu: Wewe mumone ne: mbimpe kufila broshire eyi paudi uyisha ku nzubu ne ku nzubu, udi mua kuyifila nansha bobu kabayi batulombe bua kuyifila ngondo au. (Bala kazubu ka “Mua kufila broshire eyi.”) Udi mua kumufila paudi upinganyina muntu, umuambila ne: udi ne tshintu tshia kumupesha; pashishe umupesha broshire.

6. Bua kulombola dilonga dia Bible ne broshire eyi, tudi mua kuenza tshinyi?

⁶ Bu mudi broshire wa Teleja Nzambi kayi muenza ne nkonko, ki ngua kulonga mu nkonko ne mandamuna bu mututu tuenza ne mukanda wa Bible ulongesha to. Mu miaba ya bungi, bantu batu basue kuteleja malu adibu babalondela. Nanku wenze mudimu ne bimfuanyi bua kulondela bantu malu adibu bafunde mu Bible. Umvuije tshidi bimfuanyi bileja. Wikale ne musangelu. Lomba mulongi bua aleje bidiye umona ne mudiye wela meji. Ubale mvese idi kuinshi kua dibeji, umueleshishe meji bua tshidiyi yamba. Umuele nkonko bua kumubueja mu muyuki ne bua kujadika ne: mmumvue. Bikalaye ukadi ne broshire wa Teleja Nzambi bua upete muoyo wa tshiendelele, nubale nende malu adimu ne mvese panudi nuakula bua tshimfuanyi tshionso.

7. Leja muudi mua kuambuluisha mulongi bua kuya kumpala.

⁷ Ambuluisha mulongi bua kuya kumpala: Tudi batekemene ne: dilonga dienu nedijule mulongi dijinga dia kulonga mua kubala bua kudipetelaye nkayende dimanya dia Yehowa. (Mat. 5:3; Yone 17:3) Nanku, binuikala nulonga broshire wa Teleja Nzambi, wewe mumone pamuapa ne: mulongi ukadi mukumbane, nudi mua kutuadija kulonga nende broshire wa Teleja Nzambi bua upete muoyo wa tshiendelele. Nansha nuenu balonge bajikije broshire kayi wa ku ibidi eyi, mulongi kakukumbana bua kutambula to. Bua yeye kutambula, udi ne bua kulonga kabidi mukanda wa Bible ulongesha anyi mukanda mukuabu udi muakanyine, bua kupeta dimanya dikumbane.

8. Bua tshinyi udi ne dianyisha bua broshire mipiamipia eyi?

⁸ Bantu badi ne bua kuteleja Mfumu wa diulu ne buloba bua bobu kushala ne muoyo kashidi. (Yesh. 55:3) Yehowa mmusue ne: ‘bantu [ba mishindu] yonso,’ ne aba badi kabayi bamanye kubala bamuteleje. (1 Tim. 2:3, 4) Ndianyisha kayipu ditudi nadi bua broshire eyi idi ituambuluisha bua kulongesha bantu mudibu mua kuteleja Nzambi!

[Kazubu mu dibeji 3]

Mua kufila broshire eyi

Uleje muntu mu dibeji 2-3, umuambile ne: “Udiku musue kuikala ne muoyo mu muaba wa buena eu anyi? [Lekela muntu andamune.] Mukanda wa Nzambi [anyi mukanda wa tshijila] udi ulaya ne: Nzambi ukadi pa kuvuija buloba muaba mulengele, wa ditalala, wikala kawuyi masama nansha bupele. Tangila tshitudi ne bua kuenza bua kusombamu. [Bala Yeshaya 55:3, udi ku mutu kua dibeji 3.] Mvese eu udi utuambila bua ‘kulua’ kudi Nzambi ne ‘kumvua’ tshidiye wamba. Kadi mmunyi mutudi mua kuteleja Nzambi?” Ubulule mu dibeji 4-5 bua kuyukila nende bua diandamuna dia lukonko elu. Yeye kayi ne dîba, umushile broshire, nuvuangane nende bua kulua kuluandamuna musangu udi ulonda.