Nuanji kukeba bantu

1. Bua tshinyi mbalongolole teritware bilondeshile muakulu ne muakulu?

¹ Pakapeta bayidi ba Yezu nyuma muimpe mu Pentekoste wa mu 33, ‘bakabanga kuakula miakulu mikuabu,’ bayisha bantu bavua bafumine miaba ya kule. (Bien. 2:4) Nunku bantu 3 000 bakatambula. Bidi bimueneka ne: bantu ba bungi bavua bakula kabidi muakulu mukuabu: tshiena Ebelu anyi tshiena Greke. Kadi Yehowa wakenza bua bayishe muntu yonso mu muakulu wende wa ku dibele. Bumue bualu buvua mua kuikala busake Yehowa bua kuenza nanku budi ne: bantu batu batamba kuteleja lumu luimpe padibu babayisha mu muakulu wabu wa ku dibele. Ke bualu kayi lelu, mbalongolole teritware ya bisumbu bia muaba udibu bakula miakulu ya bungi bilondeshile muakulu ne muakulu. (Bulongolodi, dib. 107 §1-2) Kabatu bakosela tusumbu tua miakulu mienyi teritware to. Kadi tutu tuyisha bantu badi bakula muakulu watu badi mu teritware wa tshisumbu tshidi tshitutangila ne mu teritware ya bisumbu bidi pabuipi.

2. a) Mudimu wa dikeba bantu mmudimu kayi? Mmuaba kayi udi mudimu eu ne mushinga? b) Leja mudi bisumbu mua kuambuluishangana mu teritware udibu bakula miakulu ya bungi. c) Tuetu bapete muntu munange bulelela kadi wakula muakulu mukuabu, tudi mua kuenza tshinyi?

² Wewe musombele muaba udi bantu bonso bakula muakulu umue, udi mua kuyisha ku nzubu ne ku nzubu bipepele. Kadi, kabitu bipepele muaba udi bantu bakula miakulu ya bungi to. Bisumbu bia miakulu mikuabu bidi mua kuikala biyisha pabi mu teritware au. Nansha mudi bisumbu bikuabu mua kunuleja bantu badi bakula muakulu wenu, kasumbu kenu anyi tshisumbu tshienu ke tshidi ne bujitu bua kukeba bantu. (Bala kazubu ka “Ambuluishanganayi.”) Ke bualu kayi nudi ne bua kuditua mu dikeba bantu, nuenda nuebeja bua banuleje muaba udi bantu badi bakula muakulu wenu. Mudimu wa dikeba bantu eu tudi mua kuwenza mushindu kayi?

3. a) Mmunyi mudi tshisumbu mua kumanya muaba udibu mua kukebela bantu? b) Badi mua kuenza mudimu eu mêba bungi kayi?

³ Dilongololayi bua kuenza mudimu wa dikeba bantu: Malu adi enzeka muaba utudi adi mua kutuleja bungi bua mêba atudi mua kupitshisha mu mudimu wa dikeba bantu muaba udibu bakula miakulu ya bungi. Tshilejilu: bungi bua bantu badi bakula muakulu, bungi bua bamanyishi, bungi bua miaba ya kuyishila ikadi kasumbu anyi tshisumbu tshikale nayi. Ki mbimpe kuenza mudimu wa dikeba bantu mushindu umue miaba yonso to, kadi mbimpe kutamba kuimanyina muaba udi bantu ba bungi bilondeshile mikalu ya teritware wenu ne miaba idi kayiyi kule menemene to. Kadi kuikala ne programe muimpe wa kukeba bantu nekutuambuluishe bua kupetesha bantu ba bungi mushindu wa kubikilabu dîna dia Yehowa.​—Lomo 10:13, 14.

4. a) Mmunyi mutudi mua kulongolola mudimu wa dikeba bantu? b) Tudi mua kupeta bantu badi bakula muakulu wa tshisumbu tshietu mushindu kayi?

⁴ Bua kubenga kuyisha bantu bamue bamue, kasumbu ka bakulu (nangananga mutangidi wa mudimu) kadi ne bua kulongolola ne kulombola mudimu wa dikeba bantu. (1 Kol. 9:26) Mu tusumbu tua miakulu mienyi, muanetu wa balume mukumbane (nangananga mukulu anyi musadidi wa mudimu) udi kasumbu ka bakulu kasungule, udi mua kulombola mudimu au. Bisumbu bia bungi bitu bilongolole amue malu bimpe: tshilejilu, batu benza mudimu ne kakanda ka nimero ya telefone anyi ne Enternete bua kupeta mêna a bantu badi bakula muakulu au. Pashishe, badi bela bantu nshinga anyi baya kubatangila bua kumanya adrese idibu mua kuangata bu teritware yabu. Pikalabi bikumbane, bakulu ba tshisumbu tshidi tshitangila kasumbu badi mua kulongolola bua tshisumbu tshijima kuya mu dikeba bantu imue misangu.​—Bala kazubu ka “Mua kupeta bantu badi bakula muakulu wenu.”

5. a) Bua kuenza mudimu wa dikeba bantu, bamanyishi badi ne bua kutumikila mibelu kayi? b) Tshitudi mua kuambila bantu patudi mu mudimu wa dikeba ntshinyi?

⁵ Tudi ne bua kuikala ne tshipatshila tshimpe misangu yonso itudi tuenza mudimu wa kukeba bantu. Bu mudi mudimu eu muikale umue mushindu wa kuyisha, uvuale bimpe anu bu muutu uvuala pautu uya mu buambi. Bantu ba bungi batu bamona ne: kuyisha mu muakulu wa tshisumbu tshiabu padibu bakeba bantu kudi kuambuluisha bua kuikala ne musangelu ne bua kuakula muakulu au bimpe. Tudi mua kubala mêba atuvua benze patuvua tukeba bantu, kadi ki mpatuvua tulongolola tuarte tua teritware anyi tufunda mêna a bantu pa dibeji to. Patudi tupeta muntu udi wakula muakulu wa tshisumbu tshietu, tudi ne bua kudienzeja bua kumuyisha, pashishe tumanyishe diakamue mutangidi wa mudimu anyi muntu udiye musungule bua akajilule karte ka teritware. Mbimpe kuenza nanku nansha muntu muleje dijinga anyi kayi mudileje. Nansha mudi mudimu wa dikeba bantu ne mushinga, tuikale tuenza mishindu mikuabu ya mudimu wa buambi.​—Bala kazubu ka “Tshia kuamba mu mudimu wa dikeba bantu.”

6. Mudimu wa dikeba tumama udi ne ntatu kayi?

⁶ Ukebe tumama: Mudimu wa kukeba tumama udi ne yawu ntatu misunguluke, udi ulomba kudienzeja bikole ne kuikala ne muoyo mule. Katuena mua kumanyina kamama ku dîna didibu bakabikila, ku mushindu udi mubidi waku anyi ku mvuadilu waku to. Kabidi, balela ne balunda badi mua kusokoka anyi kuelakana bua kuambila mumanyishi malu adi atangila muanabu udi kamama. Mibelu ya mua kukeba tumama idi ilonda eyi idi mua kutuambuluisha kabidi patudi tukeba bantu badi bakula muakulu wetu.

7. a) Leja mutudi mua kuebeja bantu bua batuleje muaba udi tumama. b) Bua muntu kubenga kumona ne: tudi tukeba tumama ne meji mabi, tudi mua kuenza tshinyi?

⁷ Tusumbu ne bisumbu bia muakulu wa tumama mbipatule bipeta bimpe mu dikeba tumama ku nzubu. Udi mua kuebeja muntu bua akuambile ni mmumanye muena mutumba nende, muena mudimu wabu anyi mulongi wabu udi kamama. Muntu au udi mua kuikala mumanye muaba udi bana badi tumama. Imue misangu, udi ne mulela wende udi kamama. Ikala mumanye ne: bantu badi mua kumona bu udi ukeba kamama bua bunga bualu. Kadi udi mua kuenza bua bantu kabikadi ne buôwa wewe wamba malu malelela adi umvuika bimpe, uamba mu tshikoso ne mimuemue. Pavua bamue bamanyishi bebeja bantu ni mbamanye tumama, mbapete bipeta bimpe pavuabu baleje bantu abu matadi a dibala dia Bible anyi a filme ya muakulu wa tumama. Pashishe bavua bambila bantu ne: mbasue kumanyisha tumama malu mimpe adi Nzambi mulaye. Muntu yeye welakana bua kunuleja kamama, udi mua kuitaba bua kumanya adrese wenu anyi bua nuenu kushila kamama aku dibeji dia kukabikila mu bisangilu.

8. Mmunyi mudi tshisumbu tshidi pabuipi mua kuambuluisha tshisumbu tshia muakulu wa tumama?

⁸ Dituku dimue anyi abidi ku tshidimu, tshisumbu tshia muakulu wa tumama tshidi mua kulomba tshisumbu tshia muakulu mukuabu tshidi pamue nabu bua tshibambuluishe bua kukeba tumama mu tshitupa kampanda tshia teritware tshia mu tshimenga. Bena mu tshisumbu tshia muakulu wa tumama nebalombole tshisangilu tshia mudimu wa buambi. Nebafile mibelu ya mua kukeba tumama, nebenze kabidi dinaya. Pikalaku mashinyi, mu mashinyi onso muikale mumanyishi nansha umue wa mu tshisumbu tshia muakulu wa tumama, ikale ne karte kadi kaleja muaba wa kukebela tumama.

9. Leja mutudi mua kukeba tumama muaba ututu tupetelangana, tujikijila lutetuku anyi ututu tuya bua kupeta diambuluisha.

⁹ Tudi mua kukebela kabidi tumama muaba ututu tupetelangana, tujikijila lutetuku anyi tupetela diambuluisha kampanda. Mbimpe bamanyishi bavuale bilondeshile muaba udibu baya. Mbimpe kuyukila ne kamama kamue anyi tubidi ku luseke, pamutu pa kuyukila natu tuonso pamue. Nuenu bayukile bimpe, numvuangane bua munudi mua kupetangana.

10. Mmunyi mudi bamanyishi mua kukeba tumama mu miaba ya midimu?

¹⁰ Nudi kabidi mua kulongolola tuarte tudi tuleja miaba ya midimu ne kuya miaba ayi dîba dimpe. Tshilejilu, mu karte kamue mudi mua kuikala miaba ya dipanyishila kasolonyi. Mu kakuabu mudi mua kuikala nzubu ya disukula bilamba, restoran, nzubu ya tshilala benyi anyi miaba itubu benzela mudimu kampanda. Nuenu benze karte ne karte ne yaku midimu ya muomumue, bamanyishi badi mua kuyukila ne bantu mushindu umue, ne bidi mua kubambuluisha bua kumanyabu mua kuenza mudimu eu ne kuwupepeja. Tshilejilu, bu mutu nzubu ya tshilala benyi yakidila tumama, tudi mua kumvuija muntu utu wakidila bantu mutu mudimu wetu mu tshikoso, kumupesha ditadi dia DVD ne mabeji a dibikila nawu tumama mu bisangilu. Mu imue miaba ya midimu, tudi mua kuebeja bua batuleje bamue bena mudimu anyi bakiliya batu tumama. Pikalaku tulasa tua tumama mu teritware wetu, tudi mua kuya kufilaku matadi a DVD a mikanda yetu.

11. Bua tshinyi mudimu wa dikeba bantu mmushindu munene wa mudimu wetu wa buambi?

¹¹ Mudimu wa mushinga mukole: Kupeta bantu badi bakula muakulu wa tshisumbu tshienu mmudimu udi mua kuangata dîba dia bungi. Bu mudi kabidi bantu bamuangala, bakuabu balua, nsombelu udi mua kushintuluka diakamue, bifila lutatu bua kuakajilula tuarte tua teritware. Nansha nanku, mu miaba ya bungi lelu, mudimu wa dikeba bantu mmushindu munene wa kuyisha. Yehowa ke udi mutupeshe mudimu wa kuyisha; katu ne kansungasunga to. (Bien. 10:34) ‘Mmusue bantu [ba mishindu] yonso basungidibue, bafike ku dimanya dia malu malelela.’ (1 Tim. 2:3, 4) Nunku, tueleshanganayi diboko ne Yehowa bua kupeta bantu ba miakulu yonso badi ne “mitshima mimpe ne ya kalolo.”​—Luka 8:15.

[Kazubu mu dibeji 5]

Ambuluishanganayi

Padi tshisumbu anyi kasumbu ka muakulu muenyi kakeba ne: bakambuluishe bua kupeta bantu ba muakulu wabu, mbimpe mutangidi wa mudimu ebeje bakulu ba bisumbu bia miakulu mikuabu bidi nabu pabuipi. Mbimpe kuebeja anu bisumbu bidi pabuipi anyi bidi ne bantu ba bungi badi bakula muakulu wenu mu teritware wabi. Bisumbu ebi bidi ne bua kuambila bamanyishi badimu ne: padibu bapeta muntu udi wakula muakulu wa tusumbu tua muakulu muenyi, bafunde adrese, bamupeshe mutangidi wa mudimu bua yeye atumine tusumbu anyi bisumbu bidi bikeba diambuluisha abi. Batangidi ba mudimu badi mu bisumbu bidi bualu ebu butangila badi mua kukeba mushindu muimpe udibu mua kuenza mudimu pamue bua kuyisha mu teritware udibu bakula miakulu ya bungi bua kufikishabu bantu badi banyisha bulelela mu bisumbu bia miakulu yabu.

Padi bamanyishi bapeta muntu uleja dijinga menemene dia kulonga kadi wakula muakulu mukuabu (anyi kamama), mbimpe buuje diakamue formilere wa S-43, pashishe bamupeshe sekretere wa tshisumbu tshiabu. Nebiambuluishe bua kulongeshabu muntu malu a Nzambi ne lukasa luonso.​—Bala km 5/11 dib. 3.

[Kazubu mu dibeji 6]

Mua kupeta bantu badi bakula muakulu wenu

• Webeje bantu bakuabu bu mudi balongi ba Bible, balela bebe, bena mudimu benu ne bakuabu.

• Wenze mudimu ne kakanda ka nimero ya telefone bua kupeta mêna a bantu badi bakula muakulu au. Ku Enternete anyi kudi kumpanyi wa telefone, udi mua kupeta kakanda kadi ne mêna a bantu bilondeshile miaba idibu basombele.

• Ubakebe miaba itu bantu bakebela midimu, tshilejilu ku tshilaminu tshia mikanda, biro bia bena mbulamatadi ne mu iniversite; webeje ne budimu.

• Ubale tshikandakanda bua kupeta miaba idibu bakula bua midimu idibu balongolole kudi bantu badi bakula muakulu muenyi.

• Uye mu makazen ne miaba ya midimu iudi mua kusangana bantu batu bakula muakulu muenyi.

• Wewe mumone ne: bantu badi bakula muakulu wenu batu batamba kuya muaba kampanda utu bantu benzela midimu, ku biro binene kansanga bia tulasa tua iniversite anyi muaba kampanda utu mashinyi ambuila bantu, ulombe bantu badi batangila muaba au bua wikale wadija mikanda yetu muaba au.

• Pikalabi bianyishibue mu ditunga dienu, usumbe kakanda ka mêna a bangenda-mushinga anyi Programe wa ordinatere bua kumanya miaba ya bantu ku Enternete.

[Kazubu mu dibeji 7]

Tshia kuamba mu mudimu wa dikeba bantu

Tuakule ne dîyi dia bulunda ne muoyo mujima; tuleje muntu malu onso patoke bua katumonyi bu bantu badi ne meji mabi to. Mbimpe kuanji kuleja muntu mikanda ya mu muakulu au.

Wele muntu muoyo, umuambile ne: “Tudi tukeba bantu badi bakula muakulu wa ․․․․․ bua tubambile malu adi Bible mulaye. Udiku mumanye muntu utudi mua kuambila malu aa anyi?”

Paudi ukeba tumama, udi mua kuamba ne: “Muoyo webe au! Ndiku mua kukuambila bualu anyi? [Umuleje mu ka video ka ku bianza mudibu babala mvese kampanda mu Bible wa Traduction du monde nouveau​—Mu DVD.] Ke mudibu babala mvese eu mu muakulu wa tumama wa bena Amerike. Pa kumusha Bible, tudi kabidi ne filme mikuabu itudi tufila tshianana bua kulongesha tumama malu a Nzambi. Udiku mumanye kamama anyi muntu udi ne mapapa udi mumanye muakulu wa tumama anyi?” Muntu yeye muambe ne: tshiena mumanye, mbimpe umutelele miaba kampanda ikadiye nansha mumone tumama, bu mudi: ku mudimu, mu tulasa anyi mu kartié.