Ulame lungenyi luebe
1. Mpuilu wa tshijengu wa tshidimu tshia mudimu tshia 2013 udi ne tshiena-bualu kayi? Mbamulongolole bua tshinyi?
1 Yezu wakalongesha bayidi bende bua kunangabu Yehowa ne muoyo wabu wonso ne anyima wabu yonso ne lungenyi luabu luonso. (Mat. 22:37, 38) Mbalongolole mpungilu, mpuilu wa pa buende ne wa tshijengu wa tshidimu etshi bua kutuambuluisha bua tulengeje tshitudi munda. Vuluka ne: tshiena-bualu tshia mpungilu wa distrike tshivua ne: “Ulame mutshima webe.” Mpuilu wa pa buende udi ne tshiena-bualu ne: “Ulame kondo kebe ka muoyo.” Mpuilu wa tshijengu neikale ne tshiena-bualu ne: “Ulame lungenyi luebe” (tshiangatshila mu Matayo 22:37). Mbalongolole mpuilu wa tshijengu eu bua kuambuluisha muntu yonso bua akonkonone bimpe meji ende, bua ikale asankisha Yehowa bikole.
2. Mu mpuilu wa tshijengu, neukebe mandamuna a nkonko kayi?
2 Malu alongeshabu: Pawabuela mu mpuilu eu, ukebe mandamuna a nkonko minene eyi:
• Mmunyi muudi mua kuepuka ngelelu wa ‘meji wa bantu?’
• Mmunyi mutudi mua kuambuluisha bua kumbusha tshilamba tshidi tshifofomija meji a bantu badi kabayi bamanye Nzambi?
• Mmeji kayi atudi ne bua kuikala nawu?
• Mmasanka kayi adi afumina ku dielangana dia meji dimpe?
• Mmunyi mutudi mua kulekela Yehowa bua alombole lungenyi luetu?
• Mmunyi mudi balume, bakaji, baledi ne bana mua kuvuija dîku diabu dia disanka?
• Mmunyi mutudi mua kuikala badiakaje bua dituku dia Yehowa?
• Kulongolola meji etu bua mudimu kudi kumvuija tshinyi?
• Bantu badi batumikila bidibu balonga badi bapeta masanka kayi?
3. Mbimpe kubuela mu mpuilu matuku onso, kuteleja ne ntema yonso ne kutumikila bitualonga bua tshinyi?
3 Satana udi uluisha lungenyi luetu, mmusue kulunyanga. (2 Kol. 11:3) Nunku, tudi ne bua kulama lungenyi luetu, ne kutangila bimpe meji atudi tuela. Tudi ne bua kutungunuka ne kuleja meji a Kristo, ne kuluangana ne malu mabi a mu buloba ebu bunyanguke. (1 Kol. 2:16) Nanku, udilongolole bua kubuela mu mpuilu wa tshijengu eu matuku onso abidi. Uteleje ne ntema yonso. Kutumikila malu adi ne mushinga wa bungi alongeshabu nekutuambuluishe bua kulongolola meji etu bua kuyisha ne tshisumi.—1 Pet. 1:13.