Enza mudimu ne trakte bua kumuangalaja lumu luimpe
1. Leja muvua Bantemu benze mudimu ne trakte.
1 Kukadi matuku a bungi adi Bantemu ba Yehowa benza mudimu ne trakte bua kumuangalaja lumu luimpe. Mu 1880 Charles Russell ne bena diende bakatuadija kupatula trakte ivuabu babikila ne: Trakte ya balongi ba Bible (Angl.), bavua bayipesha babadi ba Tshibumba tshia Nsentedi bua bayabanyine bantu. Trakte ivua ne mushinga wa bungi, ke bualu kayi mu 1884 pavua Charles Russel mufundishe bulongolodi buetu kua mbulamatadi ne muleje muvuabu kabuyi ne tshipatshila tshia kuenda mushinga, kadi tshia kutuma malu a Bukalenge bua Nzambi kumpala, muaku “trakte” uvua mu dîna dia Zion’s Watch Tower Tract Society, ukadibu babikila ne: Watch Tower Bible and Tract Society of Pennsylvania. Patuakafika mu tshidimu tshia 1918, balongi ba Bible bakavua babanye trakte mipite pa miliyo 300. Tutshidi anu tuyisha bikole ne trakte.
2. Trakte itu mimpe bua tshinyi?
2 Trakte mmimpe bua tshinyi?: Trakte itu ne mekala mimpe, itu kabidi mimpe kumona. Malu makese adimu mmapepele bua kuumvua ne atu ambuluisha bantu. Atu asankisha muntu udi mua kuikala utshina bua kubala tshibejibeji anyi mukanda. Mbipepele nansha bua bana anyi bamanyishi bapiabapia kufilabu trakte. Trakte kayitu ne bujitu to; mbipepele bua kuyambula.
3. Londa bualu buudi mumanye anyi budi mu mikanda yetu budi buleja mushinga udi nawu trakte.
3 Bantu ba bungi mbafike ku dimanya bulelela ku diambuluisha dia trakte. Tshilejilu, mamu kampanda wa mu Haïti wakamona umue wa ku trakte yetu mu njila. Yeye kumuambula, kumubala, e kuambaye ne: “Ndi mupete bulelela!” Ke yeye kuya ku Nzubu wa Bukalenge, kutuadija kulonga Bible; pashishe kutambulaye. Bionso ebi anu bua bukole budi nabu Dîyi dia Nzambi buvua mu trakte.
4. Padibu batulomba bua kufila trakte mu ngondo kampanda, tuikale ne tshipatshila kayi?
4 Ku nzubu ne ku nzubu: Bu mudi trakte ituambuluisha bua kuyisha, neyikale munkatshi mua mikanda ya kuyifila ku ngondo kutuadijila ku ngondo wa 11. Tshipatshila tshietu ki ntshia kufila trakte tshianana to, kadi ntshia kutuadija kuyukila ne bantu. Patudi tupetangana ne muntu udi muanyishe bulelela anyi patudi tumupinganyina, tudi mua kumuleja mutu dilonga dia Bible dienzeka ne mukanda wa Bible ulongesha anyi mukanda mukuabu wa kulonga. Kadi, tudi mua kufila trakte ku nzubu ne ku nzubu mushindu kayi? Trakte yonso udi wende mushindu, nanku tudi ne bua kumanya bimpe trakte itudi tufila.
5. Tudi mua kufila trakte ku nzubu ne ku nzubu mushindu kayi?
5 Kumpala kua kufila trakte, tudi mua kuanji kumanya trakte ne kumanya teritware wetu. Tupeshe muntu trakte diakamue patudi tutuadija kuyukila nende. Pa mutu pa trakte padi mua kukoka ntema ya muntu. Anyi tudi mua kuleja muntu trakte mishilangane ne kumulomba bua asungule udi umusankisha. Muaba udi bantu belakana bua kunzulula biibi biabu, tudi mua kukuata trakte mu mushindu udi muntu mua kumona pa mutu pende anyi tudi mua kumulomba bua kumuelela kantu kampanda (trakte kampanda) katuvua basue kumupesha bua kumanya mmuenenu wende. Tshiena-bualu tshia trakte tshiotshi lukonko, tudi mua kumulomba bua atete kuandamuna. Anyi tudi mua kuela luetu lukonko ludi mua kumujula dijinga dia kumanya ne kumusaka bua kuyukila. Pashishe tudi mua kubala nende amue malu a mu trakte, kuanji kuimana muaba udi nkonko ne kumulomba bua akule pende. Nudi mua kubadila mvese idi ne ngenyi minene mu Bible. Panudi nujikija muyuki wenu, numvuangane dîba dia kupetangana. Bikala tshisumbu tshienu katshiyi tshishiya mikanda padi bantu kabayi kumbelu, nudi mua kushiya trakte muaba udi muntu mukuabu kayi mua kumona lukasa to.
6. Leja mutudi mua kuyisha ne trakte mu njila.
6 Kuyisha mu njila: Ukadiku muyishe ne trakte mu njila anyi? Mu njila, bamue bantu batu baya lusaka lukasa, kabayi basue kuimana bua kuyukila netu. Mbikole bua kumanya ni badi menemene ne dijinga dia kumanya. Pamutu pa kubapesha bibejibeji bitshidi bipatukilaku katuyi bamanye ni babibala, mbimpe tubapeshe trakte. Bu mudi pa mutu pimpe ne mêyi mafundapu mu tshikoso, bidi mua kusaka bantu bua kubala trakte nansha mu minite mikese idibu bapeta. Pikala bantu kabayi lukasa, tudi mua kuyukila nabu amue malu adi mu trakte.
7. Londa malu adi aleja mushindu utudi mua kuyisha ne trakte padi mpunga umueneka.
7 Kuyisha padi mpunga umueneka: Mbipepele bua kuyisha ne trakte padi mpunga umueneka. Tshilejilu, muanetu wa balume kampanda utu wela ndambu wa trakte mu mpaya dîba dionso dituye umbuka kumbelu. Padiye upetangana ne muntu bu mudi udi upanyisha mu makazen, udi umuambila ne: mmusue kumupesha tshintu tshia kubala, pashishe udi umupesha trakte. Pavua muanetu kampanda ne mukajende baye kuendakana mu tshimenga tshia New York, bakamona ne: bavua mua kupetanganamu ne bantu ba mu matunga mashilangane. Bakangata kakanda ka Nations ne trakte ndambu mu miakulu ya bungi. Pashishe, pavuabu bumvua muntu uvua upanyisha bintu ku mpenga kua njila anyi uvua musombe pabuipi nabu muaba utu bantu bajikijila lutetuku anyi mu restoran wakula muakulu muenyi, bavua bamupesha trakte mu muakulu wa kuabu.
8. Mmu ngumvuilu kayi mudi trakte mifuanangane ne mamiinu?
8 “Kuna mamiinu ebe”: Trakte mmifuanangane ne mamiinu. Tshidime utu ukuna mamiinu ende tshianana tshianana bualu ki mmumanye atoloka ne akola to. Muambi 11:6 udi wamba ne: ‘Kuna mamiinu ebe ne dinda, kuikishi dilolo; bualu bua kuena mumanye ni bidi bidiunda ngebi anyi mbiabia, anyi bubidi buabi nebidiunde.’ Nanku, tutungunukayi ne ‘kutangalaja dimanya’ ku diambuluisha dia tshiamu tshia mudimu tshimpe tshia kuyisha natshi etshi.—Nsu. 15:7, NW.
[Lungenyi lunene lua mu dibeji 3]
Bu mudi trakte ituambuluisha bua kuyisha, neyikale munkatshi mua mikanda ya kuyifila ku ngondo, kutuadijila ku ngondo wa 11