Nudilongolole bua Tshivulukilu ne mutshima wa disanka
1. Tshivulukilu ntshikondo tshia pa buatshi bua kuenza tshinyi?
1 Tshivulukilu netshienzeke mu Dibidi dia 26 wa ngondo 3 eu. Netshitupeteshe mushindu muimpe wa kusanka bua tshidi Nzambi muenze bua kutupandisha. (Yesh. 61:10) Nansha kabidi kumpala kua Tshivulukilu kuenzekatshi, kuikala ne disanka nekutuambuluishe bua kuikala badilongolole bimpe. Mushindu kayi?
2. Tshidi tshitusaka bua kulongolola malu bua Tshivulukilu ntshinyi?
2 Udilongolole bua Tshivulukilu: Didia dia Mukalenge ntshibilu tshia mushinga mukole, kadi tshitu tshienzeka mu mushindu mupepele. Nansha nanku, bidi bikengela kudianjila kudilongolola bua katulu kupua muoyo amue malu a mushinga mukole to. (Nsu. 21:5) Nudi ne bua kusungula dîba ne muaba muimpe wenzekela Tshivulukilu. Nukebe mampa ne mvinyo bidi biakanyine. Muaba unudi nuenzela Tshivulukilu wikale ne mankenda, mumana kulongolola bimpe. Ngamba-malu adilongolole bimpe menemene. Badi ne bua kuendesha mampa ne mvinyo badi ne bua kuikala bamanye bimpe tshidibu ne bua kuenza. Kakuyi mpata, nukadi benzenze malu aa. Tudi tulongolola malu onso au bimpe bualu tudi ne dianyisha bua mulambu wa Yezu.—1 Pet. 1:8, 9.
3. Leja mutudi mua kulongolola mutshima wetu bua tshibilu tshia Didia dia Mukalenge.
3 Ulongolole mutshima: Bidi bikengela kabidi kulongolola mutshima wetu bua kumvua bimpe mushinga udi nawu Tshivulukilu. (Eze. 7:10) Nanku mbimpe tukebe dîba dia kubala mvese idibu bafile bua Tshivulukilu, pashishe kuela meji bua malu avua mafikile Yezu mu matuku a kumpala kua lufu luende. Kuelangana meji bua lungenyi lua didifila luvua nalu Yezu nekutusake bua kumuidikija.—Gal. 2:20.
4. Mbualu kayi buimpe bua mulambu wa Yezu budi bukupesha wewe disanka dia bungi?
4 Lufu lua Kristo ludi lubingisha bumfumu bua Yehowa. Ludi lutupikula ku bubi ne ku lufu. (1 Yone 2:2) Ludi lutupetesha mushindu wa kudia malanda mimpe ne Nzambi ne wa kupeta muoyo wa tshiendelele. (Kolos. 1:21, 22) Ludi kabidi lutuambuluisha bua kukolesha dipangadika dia kukumbaja mutshipu wetu kudi Yehowa ne kushala bayidi balelela ba Kristo. (Mat. 16:24) Disanka dienu ditambe kuvula panudi nudilongolola ne panudi nubuela mu Tshivulukilu.