Mua kuenza mudimu ne broshire wa Badi benza disua dia Yehowa lelu mbanganyi?
Broshire eu mmuenza bua kuleja balongi ba Bible bulongolodi bua Nzambi
1. Tela malu asatu adibu benzele broshire wa Disua dia Yehowa.
1 Ukadiku mutuadije kuyisha ne broshire mupiamupia wa Badi benza disua dia Yehowa lelu mbanganyi? Mbenze broshire bua: 1) balongi ba Bible bibidilangane ne Bantemu ba Yehowa, 2) bamanye midimu yetu, ne 3) bamanye mudi bulongolodi buetu buenda. Mu dibeji dionso dia broshire wa Disua dia Yehowa eu mudi dilongesha dimue ditudi mua kukonkonona mu minite itanu too ne ku dikumi tshianana, misangu yonso itudi tujikija kulonga ne mulongi.
2. Umvuija malu adi mu broshire eu.
2 Mushindu udibu bamuenze: Mbakosolole broshire eu mu bitupa bisatu, tshitupa tshionso tshidi tshiakula bua bumue bua ku malu adi atangila bulongolodi bua Yehowa atukadi batele. Malongesha onso adi 28. Mitu yawu ya bualu idi bu nkonko. Tu mitu tua bualu ke tudi tuandamuna lukonko alu; tudi ne maleta mafiikisha. Mudi foto ya mu matunga mapite pa 50, idi ileja mudi mudimu wetu wenzeka pa buloba bujima. Ku ndekelu kua malongesha a bungi kudi tuzubu tua: “Malu makuabu,” tudi ne amue malu audi mua kulomba mulongi bua kuenza.
3. Leja mutudi mua kuenza mudimu ne broshire wa Disua dia Yehowa.
3 Mua kuenza nende mudimu: Leja muntu lukonko, mbuena kuamba ne: mutu wa bualu wa dilongesha. Pashishe, panudi nubala nende dilongesha adi, utambe kuimanyina pa biambilu bia tu mitu tua bualu; mbabifunde ne maleta mafiikisha bikole. Bua kujikija, wele nkonko ya diambulula idi kuinshi kua dibeji. Nudi mua kubala dilongesha dionso dijima anyi kubala ku tshitupa ku tshitupa, ne kumvuija. Wikale ne busunguluji bua kumanya mvese iudi ne bua kubala. Kupu muoyo bua kumvuija foto ne tuzubu tua “Malu makuabu” to. Mbimpe kukonkonona malongesha anu mudiwu malondangane. Kadi, pikalabi bikengela kuandamuna ku dijinga dia mulongi, kabikutondi bua kutumpika dilongesha ne kuya ku dikuabu to. Tshilejilu, pikala mpuilu anyi mpungilu pabuipi, nudi mua kukonkonona dilongesha dia 11.
4. Bua tshinyi udi ne disanka bua broshire mupiamupia eu?
4 Patudi tulonga Bible ne muntu, tudi tumuambuluisha bua kumanya bimpe Tatu wetu wa mu diulu. Kadi, bidi bikengela tumulongeshe kabidi bua amanye bulongolodi bua Yehowa. (Nsu. 6:20) Tudi ne disanka dia bungi bua broshire mupiamupia eu, mupepele bua kuenza nende mudimu.