Tubakidilayiku!
1. Ntshikondo kayi tshimpe tshiatupetesha mpunga wa kuyisha? Bua tshinyi?
1 Kakutu mpunga muimpe mutambe ututu nende wa kuyisha bu tshikondo tshia Tshivulukilu to. Umanye ne: Tshidimu etshi tudi bindile bantu bapite pa miliyo dikumi bua kubuela netu mu Tshivulukilu, bua kumvuabu mudi mulambu wa Yezu utuleja dinanga mu mishindu minene ibidi. (Yone 3:16; 15:13) Nebamanye masanka adi mulambu udi Yehowa mufile ubapetesha. (Yesh. 65:21-23) Kadi, ki ngamba-malu nkayende wayisha dituku adi to. Tuetu bonso netuyishe bikole patuikala tuakidila bantu ne disanka dia bungi.—Lomo 15:7.
2. Leja mutudi mua kuakidila benyi ne disanka.
2 Pamutu pa kusomba mupuwe muindile bua programe atuadije, kuenaku mua kukeba bua kudimanyisha kudi bantu badi pabuipi nebe anyi? Bantu batudi babikile badi mua kumona bibatonda bualu ki mbamanye mutu tshisangilu etshi tshienzeka to. Kadi tuetu ne mimuemue, tubela muoyo ne disanka, nebadiumvue bimpe menemene. Bua kumanya bikala muntu mmulue bualu bavua bamupeshe dibeji dia dibikila, tudi mua kumuebeja bua kumanya ni mmusangu wende wa kumpala wa kubuela mu bibilu bietu anyi ni mmumanye muanetu kampanda mu tshisumbu. Bua tshinyi kubenga kumulomba bua kusomba pamue nebe bua nubale nende mvese mu Bible webe ne nuimbe nende misambu mu mukanda webe wa misambu? Binuikala ku Nzubu wa Bukalenge, mbimpe kunyungulukaku nende kakese bua amone mudi Nzubu wetu wa Bukalenge. Padi muyuki ujika, udi mua kumulomba bua kuandamuna nkonko yende. Bikala tshisumbu tshienu ne bua kupatuka lukasa bua kushila tshikuabu muaba, udi mua kumuebeja ne: “Udi musanke anyi? Ndi mua kukupetela penyi bua tuetu kuyikila kabidi.” Pashishe numvuangane bua kumonangana dituku dikuabu. Bakulu batabalele nangananga bamanyishi bakadi balekele kuyisha badi balue mu Tshivulukilu bua kubakankamija.
3. Bua tshinyi mbimpe kudienzeja bua kuakidila bantu mu Tshivulukilu?
3 Bua bantu ba bungi batudi babikile, nebikale musangu wa kumpala wa kumonabu disanka, ditalala ne buobumue kudi bantu ba Yehowa badi benze bu badi mu Mparadizu. (Mus. 29:11; Yesh. 11:6-9; 65:13, 14) Bantu batudi babikile, nebavuluke tshinyi panyima pa Tshivulukilu? Nebilondeshile mushindu utuvua babakidile.