Mua kuenza mudimu ne broshire wa Lumu luimpe lua kudi Nzambi
Broshire eu mmuenza bua kutuambuluisha bua kuenza makumbula mapiamapia ne kutuadija malonga a Bible
1. Bua tuetu kuenza makumbula mapiamapia ne kutuadija kulongesha bantu Bible, bavua bapatule broshire kayi mu Mpungilu wa Distrike wa “Ulame mutshima webe”?
1 Mu Mpungilu wa Distrike wa “Ulame mutshima webe,” tuvua basanke bikole patuvua bapete broshire mupiamupia udi utuambuluisha bua kupinganyina bantu ne kutuadija kulonga nabu Bible. Broshire wa Lumu luimpe lua kudi Nzambi mmupingane broshire wa Utulomba. Mmufuanangane nende bualu udi pende ne malongesha mîpi. Nenku tudi mua kulombola malonga a Bible nansha bimanyine kuulu. Mu broshire wa Utulomba muvua malu atubu balomba bena Kristo bua kuenza, adi mua kukolela balongi bapiabapia bua kuitaba; kadi broshire mupiamupia eu udi utamba kuakula bua lumu luimpe ludi mu Bible.—Bien. 15:35.
2. Mbapatule broshire wa Lumu luimpe bua tshinyi?
2 Mbapatule broshire eu bua tshinyi? Bana betu ba bungi bavua balombe tshintu tshivua mua kukoka bantu ku bulelela ne kubafikisha ku mukanda wa Bible ulongesha (mukanda wetu munene wa kulongesha nawu bantu Bible). Misangu ya bungi bantu batu batshina kubala mikanda batu bitaba bua kulonga Bible ku diambuluisha dia broshire. Bualu bukuabu: bitu bipepele menemene bua kukudimuna broshire mu miakulu ya bungi.
3. Broshire eu mmushilangane ne mikanda mikuabu ya kulonga nayi ku tshinyi?
3 Mushindu udibu bamuenze: Mbafunde mikanda yetu ya bungi ya kulonga nayi Bible mu mushindu wa muntu kuyibala ne kumvua malongesha a mu Bible nansha kabayi bamumvuije. Kadi kabiena nanku bua broshire eu to. Bua kumumvua bidi bikengela mulongeshi umvuije malu adimu. Nanku, patudi tumupesha muntu, mbimpe tukonkonone nende tshikoso tshimue anyi bibidi. Bikoso mbîpi, nanku tudi mua kubikonkonona ne muntu bimanyine kuulu, kuende anyi ku muaba wende wa mudimu. Nansha mudibi bikengela kutuadija ne dilongesha dia 1, tudi mua kutuadija dilonga muaba kayi onso.
4. Mmunyi mudi broshire eu utuambuluisha bua kulongesha bantu Bible diakamue?
4 Mu mikanda yetu ya bungi, mandamuna a nkonko atu mu bikoso. Kadi, bua broshire eu, mandamuna a nkonko adi nangananga mu Bible. Bantu ba bungi batu basue kumanyina malu mu Bible, pamutu pa kuamanyina mu mikanda yetu. Ke bualu kayi, ki mbatele mêyi a mvese pa kuamba yonso to. Mvese eyi nya kubadila anu mu Bible. Bidi biambuluisha balongi bua kumonabu ne: malu adibu balonga adi afumina kudi Nzambi.—Yesh. 54:13.
5. Bua tshinyi mbimpe mulongeshi adilongolole dituku dionso kumpala kua kulonga ne muntu?
5 Broshire eu kena umvuija mvese yonso to. Bua tshinyi? Bualu mbamuenze bua kukankamija mulongi bua kuelaye nkonko, ne bua mulongeshi kuenzaye mudimu ne dimanya diende dia kulongesha. Ke bualu kayi tudi ne bua kuikala tudilongolola bimpe dituku dionso ditudi tulonga ne muntu. Kadi wamanya! Kuakudi bia bungi to! Tutu basue kumvuija mvese. Kadi mbimpe kulomba mulongi bua umvuije tshidi mvese wamba. Tuetu tuela nkonko bimpe, mulongi neamanye mua kumvuija mvese.—Bien. 17:2.
6. Leja mutudi mua kuenza mudimu ne broshire eu: a) muaba udi bantu ne mpata bua malu a Nzambi ne bua Bible? b) patudi tuyisha ku nzubu ne ku nzubu? c) bua kutuadija kulonga Bible ne muntu diakamue? d) patudi tupinganyina bantu?
6 Tudi mua kufila broshire eu dîba kayi dionso anu bu mututu tuenza ne mikanda mikuabu ya kulombola nayi malonga a Bible, nansha bobu kabayi bamutele mu mikanda ya kufila mu ngondo au. Ba bungi nebasanke bua kutuadija kulonga nende Bible ne bantu nansha bimanyine kuulu. Anu muvuabu bumvuije kabidi mu mpungilu wa distrike, kuenza nende mudimu patudi tupinganyina bantu bavua baleje dijinga kudi “bushuwa mua kuvuija mudimu wa kupinganyina bantu muimpe menemene.”—Bala tuzubu tudi mu dibeji 5-7.
7. Bua kulombola dilonga dia Bible ku diambuluisha dia broshire eu, udi mua kuenza tshinyi?
7 Mua kulombola dilonga dia Bible: Bua kutuadija dilonga, tudi mua kuanji kubala nkonko idi mifunda mu maleta mafiikisha; nkonko eyi idi ne nomba mifunda kumpala kuayi. Pashishe, kubala bikoso ne mvese udi anyi idi mifunda mu maleta maladika. Wele nkonko ne bukalanga bua kuambuluisha muntu bua umvue tshidi mvese yamba. Kumpala kua kuya ku tshitupa tshikuabu, ulombe muntu bua andamune lukonko ludi lufunda ne maleta mafiikisha bikole bua wewe kujadika bikalaye mumvue malu. Matuku a kumpala anudi nupinganyina bantu, mbimpe kukonkonona nabu lukonko lumue lua ku idi mifunda ne maleta mafiikisha bikole. Mu kupita kua matuku, nudi mua kuvudija bikoso, kutuadija kulonga too ne dilongesha dijima.
8. Leja tshitudi mua kuamba patudi tusua kubala mvese. Bua tshinyi?
8 Mvese idibu bafunde ne: “bala” ke idi itamba kuandamuna buludiludi nkonko idi mifunda mu maleta mafiikisha. Paudi usua kubala mvese, ki mbimpe kuamba ne: “Mupostolo Paulo wakafunda ne,” anyi ne: “Tangila tshikavua Yelemiya muambe.” Bualu patudi tuamba nanku, muntu udi mua kuela meji ne: mêyi atudi tubala nga bantu. Mbimpe kuamba ne: “Dîyi dia Nzambi didi diamba ne,” anyi ne: “Tangila tshikavua Bible muambe.”
9. Bidi bikengela kubala mvese yonso patudi tulonga ne muntu anyi?
9 Mbimpe kubala anu mvese idibu bafunde ne: “bala” anyi? Peshi mbimpe kubala mvese yonso? Bualu butudi tuakuila ke buatuleja mvese ya kubala. Mvese yonso idi ne tshidibu bayifundile. Mvese yonso udi ne bualu buimpe bunudi mua kuakuila. Kadi pikala mulongi kayi ne dîba, kayi wanyisha bulelela anyi kayi mumanye mua kubala bimpe, apu tudi mua kubala anu mvese idibu bafunde ne: “bala.”
10. Ndîba kayi ditudi mua kubuela mu mukanda wa Bible ulongesha?
10 Dîba dia kubuela mu mukanda wa Bible ulongesha: Tuetu bamane kulonga misangu mikese ne batuadije kulonga bimpe, tudi mua kubuela mu mukanda wa Bible ulongesha anyi kulonga kujikija broshire eu. Bamanyishi badi ne bua kuikala ne busunguluji bua kumanya dîba didibu mua kubuela mu mukanda. Patudi tubuela mu mukanda wa Bible ulongesha, nebikengele kutuadija ku mbangilu kuawu anyi? Kakuena mukenji to. Bantu mbashilangane. Nansha nanku, bua kuambuluisha balongi ba bungi, mbimpe kabidi kulonga biena-bualu bimue bimue abi mu buondoke mu mukanda wa Bible ulongesha.
11. Bua tshinyi tudi ne bua kuenza mudimu bimpe ne broshire mupiamupia eu?
11 Bu mudi bantu kabayi ne lumu luimpe lelu pa buloba, tudi ne diakalenga dinene dia kubamanyisha lumu lutambe buimpe, kubambila ne: Bukalenge bua Nzambi bukadi bukokesha, ne bukadi pa kulongolola malu pa buloba. (Mat. 24:14; 2 Pet. 3:13) Tudi bajadike ne: ba bungi badi bumvua lumu elu nebitabe pabu mêyi avua Nzambi mufundishe aa: ‘Mona makasa a muntu udi ulua ne lumu luimpe bu mudiwu malengele pa mikuna, udi umuangalaja lumu lua ditalala, udi ulua ne lumu lua diakalengele, udi umuangalaja lumu lua lupandu, udi wambila Siona ne: Nzambi webe udi ukokesha!’ (Yesh. 52:7) Tuenzayiku mudimu ne broshire eu bua kuyisha bantu ba mu teritware wetu badi ne nyota lumu luimpe lua kudi Nzambi elu.
[Kazubu mu dibeji 5]
Muaba udi bantu babenga Bible ne malu a Nzambi:
● Mu imue miaba bamanyishi batu bamba ne: bantu kabatu basue kumvua ubatelela “Nzambi” anyi “Bible” to. Mu miaba ya nunku, panudi nuyukila ne muntu bua musangu wa kumpala, mbimpe kuakula malu adi bantu ba muaba au bajinga. Tshilejilu, dijinga dia kuikala ne mbulamatadi muimpe, kudibu mua kupetela diambuluisha bua mêku, ne bua malu atudi batekemene. Tudi mua kutuadija kulonga broshire wa Lumu luimpe patukadi bayukile misangu nansha mikese ne muntu tumuleja tshidi tshitujadikila ne: Nzambi udiku ne bua tshinyi Bible mmukanda wa kueyemena.
[Kazubu mu dibeji 6]
Patudi tuyisha ku nzubu ne ku nzubu:
● “Ndi mulue kukutangila bua kukuleja ne: mbipepele bua kumanya tshidi Nzambi mulongoluele bantu kumpala eku. Ukadiku mudiebeje bikala Nzambi mua kumbusha ntatu yetu anyi? [Lekela muntu andamune.] Mukanda eu udi uleja muaba uudi mua kupetela diandamuna dia lukonko elu mu Bible. [Umupeshe broshire, pashishe nubale nende tshikoso tshia kumpala mu dilongesha dia 1, nubale kabidi Yelemiya 29:11.] Mpindieu buebe wewe, bidiku bisua kumueneka ne: Nzambi mmusue bua tuikale ne nsombelu muimpe mu matuku atshilualua anyi? [Lekela muntu andamune.] Wewe musue, udi mua kushala ne mukanda eu. Musangu udi ulonda netukonkonone tshikoso tshibidi bua kupeta diandamuna didi Bible ufila bua lukonko elu: ‘Mmunyi muikala Nzambi mua kumbusha tshidi tshikebeshe ntatu ya bantu?’” Musangu wa kumpala unudi nupetangana ne muntu, yeye ne dîba dia bungi, nudi mua kubala ne kukonkonona nende tshikoso tshibidi ne kubala mvese isatu idimu. Numvuangane bua kulua kuandamuna lukonko luibidi lua mu dilongesha edi.
● “Bantu ba bungi batu basue kusambila nangananga patu malu abakuata.” Utuku pebe usambila anyi? [Lekela muntu andamune.] Buebe wewe: Nzambi utu uteleja masambila onso anyi kudi amue adi kayi amusankisha? [Lekela muntu andamune.] Mukanda eu udi uleja mushindu utudi mua kupeta diandamuna dia nkonko eyi mu Bible. [Umupeshe broshire, pashishe nukonkonone nende tshikoso tshia kumpala tshidi mu dilongesha dia 12, nubale mvese idibu bafunde ne: “bala.”] Ki mbimpe bua mudi Nzambi musue kututeleja anyi? Kadi bua disambila kutuambuluishadi menemene, bidi bikengela kumanya Nzambi bimpe. [Ubulule mu dilongesha 2, umuleje tu mitu tua bualu.] Wewe musue, ndi mua kukushila mukanda eu, musangu walonda netubale mandamuna adi Bible ufila bua nkonko ya mushinga mukole eyi.”
● “Ndi mulue kukutangila bualu bantu badi badiebeja bua kumanya tshiatufikila kumpala eku. Buebe wewe, malu nealongoloke anyi? [Lekela muntu andamune.] Bantu ba bungi batu bakema patubu bumvua ne: Bible udi ne lumu luimpe ludi mua kutupesha ditekemena anyi disanka. Tangila tshilejilu imue nkonko idi Bible wandamuna.” Umupeshe broshire, pashishe umulombe bua asungule lukonko ludi lumusankisha bikole ku idi mu dibeji dia ndekelu. Mpindieu, nuye nende mu dilongesha adi, wangate lukonko lua kumpala bua kumuleja mututu tulonga ne bantu. Numvuangane bua dituku dinudi mua kulua kuandamuna lukonko ludi lulonda mu dilongesha adi.
[Kazubu mu dibeji 7]
Tuadija kulonga ne muntu diakamue:
● “Ndi mulue kukutangila mu minite mikese bua kukuleja mushindu mupiamupia wa kulonga Bible. Broshire eu udi ne malongesha 15. Adi aleja muaba uudi mua kupeta mandamuna a nkonko ya mushinga mukole mu Bible webe. [Umuleje pa tshizubu tshia kumpala ne tshia ndekelu.] Ukadiku mutete bua kumvua tshidi Bible wamba anyi? [Lekela muntu andamune.] Ndi musuaku kukuleja ne: malongesha aa mmapepele. [Nukonkonone tshikoso tshia kumpala tshia lukonko 3 mu dilongesha 3; nubale Buakabuluibua 21:4, 5. Pikalabi biakanyine, nudi mua kukonkonona tshikoso tshidi tshilonda ne mvese idibu bafunde ne: “bala.”] Wewe musue, ndi mua kukushila mukanda eu. Tudi tukulomba bua kutuadija kulonga Bible nansha musangu umue ku lumingu. Wewe musue, udi mua kutungunuka ne kulonga. Musangu udi ulonda, tudi mua kukonkonona dilongesha dia kumpala. Ndiodi edi, didi anu mu dibeji dimue tshianana.”
[Kazubu mu dibeji 7]
Mu makumbula mapiamapia:
● Patudi tupinganyina muntu uvua muanyishe bulelela, tudi mua kumuambila ne: “Tudi ne disanka dia bungi mutudi tumonangana kabidi. Ndi mukutuadile mukanda udi ne mandamuna adi Bible ufila bua nkonko ya bungi ya mushinga mukole. [Umupeshe broshire, umulombe bua atangile pa tshizubu tshia ndekelu.] Ntshiena-bualu kayi tshidi tshikusankisha bikole? [Lekela muntu andamune. Pashishe, nuye mu dilongesha didiye musungule.] Ndi musuaku kukuleja mudi mukanda eu ukuambuluisha bua kupeta mandamuna a mu Bible.” Bu tshilejilu, nukonkonone nende tshikoso tshimue anyi bibidi ne mvese idibu bafunde ne: “bala,” bua kumuleja mutu dilonga dienzeka. Udi mumone! mbipepele bua kutuadija kulonga Bible ne muntu! Umushile broshire, numvuangane bua kumupinganyina. Panudi nujikija dilongesha dijima, nudi mua kukonkonona dikuabu didi muntu musungule anyi nudi mua kutuadija ne dia kumpala.