Teleja, ulonge
1. Tudi ne bua kudienzeja bikole bua kuteleja ne kulonga mu mpungilu wa distrike bua tshinyi?
1 Mu matuku makese emu, mpungilu ya distrike bua 2013 neyituadije. Kudi midimu ya bungi itukadi batuadije kuenza bua kulongolola malongesha adi atangila majinga adi nawu bana betu pa buloba bujima. Ukadiku mudilongolole bua kubuela mu matuku onso asatu a mpungilu eu anyi? Mpungilu idi ne bantu ba bungi idi mua kubueja bantu mu ditanaji, nanku mbimpe kudienzeja bikole bua kutuma ntema ya bungi ku malu adibu balongesha. Bu mutudi tuenza mêba a bungi kupita atutu tuenza mu bisangilu, mbimpe kushala anu balame ntema yetu mutantshi mule. Kuenza luendu ne malu makuabu bidi kabidi mua kututshiokesha. Tshidi mua kutuambuluisha bua kushala ne ntema bua kuteleja ne kulonga ntshinyi?—Dut. 31:12.
2. Leja mutudi mua kulongolola mutshima wetu bua malu alongeshabu mu mpungilu.
2 Kumpala kua mpungilu kutuadija: Mbateke programe wa mpungilu mu site wetu wa www.jw.org. Mu programe eu mudi biena-bualu bia miyuki yonso ne mvese umue anyi ibidi minene bua muyuki onso. Bituikala tutu tuenza mudimu ne Enternete, kudianjila kubala malu aa nekutuambuluishe bua kulongolola mutshima wetu bua malu alongeshabu. (Eze. 7:10) Kanuenaku mua kuyukila malu ikalabu mua kulongesha mu mpungilu bua muntu yonso wa mu dîku dienu ikale muindile mpungilu eu ne muoyo kuulu kuulu anyi?
3. Tshidi mua kutuambuluisha bua kuteleja bimpe menemene ntshinyi?
3 Patudi mu mpungilu: Koku mushindu, udi mua kuya kusesuka kumpala kua mpungilu kutuadija. Ukange telefone webe paudi mu mpungilu bua ntema yebe kayinyanguki padi bantu bakubikila anyi bakufundila mesaje, peshi bua muoyo webe kawukusaki bua kufundilangana pebe mesaje. Biobi bikengela bua telefone webe ikale buashi, wenze bua kanyangi ntema ya bakuabu padibu bakubikila. Wewe wenza mudimu ne ordinatere wa ku bianza mu mpungilu, wenze bua kanyangi ntema ya bakuabu. Kuikadi udia anyi unua padi mpungilu wenda wenzeka to. (Muam. 3:1) Ushale mutangile ngamba-malu. Padibu babala mvese, ulondeshe mu Bible webe. Funda malu manene mu miaku mikese.
4. Mmunyi mudi baledi mua kulongesha bana babu mua kuteleja ne kulonga?
4 Tudi basue kabidi bua bana betu bateleje ne balonge. Nsumuinu 29:15 udi wamba ne: ‘Muana udibu balekela nkayende udi ufuishisha mamuende bundu.’ Nanku, mbimpe bua bena mu dîku kusombabu pamue bua baledi bikale bajadike ne: bana babu badi balonda bidibu balongesha, pamutu pa kuikalabu benda bayukila, bafundilangana mesaje ne benda batua eku ne eku. Nansha buobu batshidi bapuekele menemene kabayi mua kumvua malu onso adibu balongesha, baledi badi mua kulongesha bana babu mua kushala batabale ne kusomba talalaa.
5. Mbimpe kuambulula malu atudi balonge mu mpungilu bua tshinyi? Mmunyi mutudi mua kuenza nanku?
5 Padi programe wa dituku dionso ujika: Walukile kumbelu kumpala kua dîba. Ulale kumpala kua dîba bua wikishe bimpe menemene. Kuambulula malu auvua muteleje nekukuambuluishe bua kushala muavuluke matuku a bungi. Nanku, nebiambuluishe bena mu dîku dienu nuenu nuangata minite mikese dilolo dionso bua kuyukila malu avuabu balongeshe. Paudi uya mu restoran ne balunda bebe, kuenaku mua kuya ne dibeji diuvua mufundile malu manene ne kuambila bantu bualu bumue anyi abidi avua matambe kukusankisha anyi? Panudi nupingana kumbelu, nuyukile mu Ntendelelu wenu wa mu Dîku bua mushindu unudi mua kutumikila malu anuvua balonge mu dîku dienu. Nudi kabidi mua kukeba dîba lumingu luonso bua kuikala kubala amue malu adi mu mikanda idi mipatuke.
6. Kubuela mu mpungilu patupu ke kudi ne bualu anyi? Umvuija.
6 Biakudia bia bungi kabiena mua kuambuluisha mubidi bimpe bikala muntu kayi mubidie ne babikudimune mu tshifu. Ke mudibi kabidi bua biakudia bia bungi biatupeshabu mu mpungilu wa distrike. Bua biakudia ebi kukuambuluishabi bimpe menemene, ubuele mu tshitupa tshionso tshia mpungilu, wikale uteleja ne ntema yonso ne utumikile malu atualonga.