Mudimu wa dibikila bantu udi upatula bipeta bimpe

Mbingu isatu kumpala kua mpungilu kutuadija, netuenze mudimu wa dibikila bantu ba muaba utudi badi banyisha bulelela bua balue kubuela mu mpungilu. Tudi ne malu mimpe adi atusaka bua kubikila bantu tshidimu etshi. Bantu batu babuela mu mpungilu bualu bavua bapete dibeji dia dibikila batu bakema bikole bua miyuki ya mu Bible itubu bumvua, bua mutubu balongolole bimpe bibambalu bia midimu kudi bena budisuile ne bua bienzedi bietu bimpe ne buobumue budi munkatshi muetu. (Mus. 110:3; 133:1; Yesh. 65:13, 14) Nansha nanku, mudimu wetu wa dibikila bantu udiku mua kupatula bipeta bimpe nangananga miaba idi bantu badi banyisha bulelela ne bua kuenza luendu bua kuya ntanta mile bua kubuela mu mpungilu anyi?

Panyima pa mpungilu wa distrike wa 2011, biro bia filiale kampanda biakapeta mukanda mufunda kudi mamu mukuabu uvua musangane dibeji dia dibikila mu tshiibi tshiende. Misangu ya bungi pavua Bantemu ba Yehowa bakokola ku tshiibi, uvua ubasokoma. Wakafunda ne: “Mvua ne nzubu muimpe be! ne mulume wa nsongo, mvua ngela meji ne: mvua ne bintu bionso bivua mua kumpetesha disanka. Diakabi, tshivua anu ne disanka to, tshivua mumanye bua tshinyi ndi ne muoyo to. Ngakangata mashinyi, meme kuenza luendu lua kilometre 320 bua kuya kubuela mu mpungilu mu Disambombo.” Mpungilu wakamusankisha bikole, kubikilaye bayende bua kumuambila ne: uvua ne bua kulala bua kubuela kabidi mu mpungilu mu Dia lumingu. Wakamba kabidi ne: “Mvua muteleje miyuki yonso, meme kupetangana ne Bantemu ba Yehowa ba bungi, ke meme kuangata dipangadika dia kutungunuka.” Pakapinganaye kuende, wakatuadija kulonga Bible, panyima pa ngondo inayi kuluaye muambi wa lumu luimpe udi kayi muanji kutambula. Udi wamba ne: “Ndi ne disanka dia bungi mumvua mupete dibeji dia dibikila ku tshiibi, bualu mpindieu ndi mumanye bimpe bua tshinyi ndi ne muoyo.”

Bamue bantu batuapesha dibeji dia dibikila nebabuele mu mpungilu. Nanku, wenze mudimu wa mushinga mukole eu ne tshisumi. Wangate mabeji a dibikila nawu bantu adi mashale bua kuya nawu muaba unuenzela mpungilu bua kuyisha nawu padi mpunga umueneka.

[Kazubu mu dibeji 5]

Mushindu utuabanya mabeji a kubikila nawu bantu

Bua kumona mua kuyisha mu teritware yonso mujima, mbimpe tuakule mêyi makese. Tudi mua kuamba ne: “Muoyo webe au! Tudi tuenda tuabanya mabeji aa pa buloba bujima bua kubikila bantu. Diebe dibeji ndiodi edi. Pawabala, neupete malu makuabu a bungi.” Ikala ne disanka. Panudi nuabanya mabeji aa mu Disambombo anyi mu Dia lumingu, nudi mua kupesha kabidi bantu bibejibeji pikalaku mushindu.