Bienzedi bietu bidi bitumbisha Nzambi
1. Bitu bipepele bua bantu kumanya ne: tudi tuya mu mpungilu bua tshinyi?
1 Bitu bipepele bua bantu kumanya ne: tudi tuya mu mpungilu. Mu bimenga bia bungi mutu mpungilu yenzeka, bisanji ne bikandakanda bitu bituadija kumanyisha bantu bua mpungilu. Bantu batu basombele muaba ututu tuenzela mpungilu batu bamona benyi ba bungi bavuale kamanyinu ka pa tshiadi. Malu adi alonda aa neatuambuluishe bua tuikale ne bienzedi bidi bitumbisha Nzambi patudi mu muaba udi mpungilu wenzekela.—1 Pet. 2:12.
2. Leja mudi mvuadilu muimpe mua kutumbisha Nzambi mu tshimenga tshidibu benzela mpungilu.
2 Mvuadilu muimpe: Bantu batu batumona patutu tuya mu mpungilu, batu bakema bua mutudi bavuale bimpe. Kadi, mushindu utudi bavuale patudi tuya kudia mu restoran, patudi tusumba bintu ne patudi tuya miaba mikuabu, udi mua kuambuluisha bantu bakuabu bua kumanya tshitudi menemene. Nansha mudibi kabiyi ne mushinga bua kuvuala anu bilamba bia bimpe menemene, tudi ne bua kuvuala bimpe, bilamba bidi bileja kanemu ne kubenga kuvuala buvualavi. Bantu badi batumona badi ne bua kumona mutudi bashilangane ne bantu badi kabayi batendelela. (Lomo 12:2) Tudi kabidi ne bua kuvuala kamanyinu ketu ka pa tshiadi, bualu nekambuluishe bua kumanyisha bantu bua mpungilu, bua kupeta mpunga wa kuyisha ne bua Bantemu bakuabu kutumanyabu.
3. Tudi mua kuleja bantu lutulu ne bukalanga mushindu kayi?
3 Lutulu ne bukalanga: Bu mudi bantu ba bungi bikale batangila anu abu malu ne kabayi ne dianyisha, lutulu ne bukalanga bietu nebisankishe bantu ba bungi badi batumona, bu mudi bena mudimu ba ku tshilala benyi ne ba mu restoran. (2 Tim. 3:1-5) Patudi tulamina bantu miaba anyi tukeba kuangata mikanda idi mipatuke, katuena ne bua kukeba diakalenga dietu nkayetu to, kadi tudi ne bua kukeba dia bakuabu. (1 Kol. 10:23, 24) Muntu kampanda uvua mubuele mu mpungilu bua musangu wende wa kumpala wakamba ne: “Tshiena muvuluke muyuki nansha umue uvuabu benze dituku adi to, kadi bienzedi bimpe bia Bantemu bitshidi binkemesha bikole.”
4. Bua tshinyi tudi ne bua kuenza mudimu bu badisuile mu mpungilu pikalaku mushindu?
4 Badisuile: Bena Kristo balelela mbamanyike bua lungenyi luabu lua kudifila ku budisuile. (Mus. 110:3) Udiku mua kuenza mudimu bu mudisuile mu mpungilu anyi? Mu mpungilu mukuabu, bana betu ba balume ne ba bakaji batue ku 600 bakenza mudimu bu badisuile bua kulongolola muaba uvua mpungilu ne bua kuenzekela. Bantu bavua batangila muaba au bakamba ne: “Katshia katshia katutu banji kumona bualu bua nunku! Mbikole bua kumona bantu bungi nunku benza mudimu bu badisuile.” Tudi bindile ne muoyo kuulu kuulu mpungilu wetu wa distrike wa 2013 ne mpunga utuikala nende wa kuteleja, kulonga malu a Nzambi ne kumutumbisha.
[Kazubu mu mabeji 3-6]
Malu a kuvuluka bua mpungilu wa distrike wa 2013
▪ Dîba: Programe neatuadije pa dîba dia 8:20 matuku onso asatu. Kadi bua mpungilu yenzeka mu bimenga binene ebi: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ne Tshikapa, yoyi neyikale ituadija pa dîba dia 9:20. Mu bimenga bikese, bantu nebabange kubuela muaba wa mpungilu mu 7:00, mu bimenga binene mu 8:00. Padibu bamba ne: mizike ikadi pa kubanga, tuetu bonso tuye bua kusomba pa miaba yetu bua mpungilu kutuadijaye bimpe. Mu bimenga bikese, mu Ditanu ne mu Disambombo, mpungilu neajike mu 15:55; kadi mu Dia lumingu, neajike mu 14:40. Mu bimenga binene, mu Ditanu ne mu Disambombo, neajike mu 16:55; kadi mu Dia lumingu, neajike mu 15:40.
▪ Dikuatshila miaba ya kusomba: Anu bantu badi ku nzubu kuenu, banudi benze nabu luendu pamue, anyi baudi ulonga nabu Bible ke baudi mua kukuatshila muaba.—1 Kol. 13:5.
▪ Biakudia bia mu midi: Tudi tunulomba bua kulua ne biakudia bungi bukumbanyine kadi bidi mua kudisha mubidi, bu mudi: mampa, mikata, bimuma (bibote), tumbele, benyi anyi tuto. Bua kuepuka njiwu, panudi nulua ne bintu bu mudi mâyi, kafe anyi tshiayi, nubiele mu bintu bidi kabiyi mua kutayika to. Mbakandike bua kulua ne maluvu adi akuatangana mu mpungilu. Tuetu balue ne bietu biakudia anyi bietu bia kunua, katuakukeba bua kusumba bintu kudi badi babipanyisha muaba wa mpungilu to. Kuepuka basumbishi ba bintu aba ndilongesha dinene, kudi kuleja mutudi ne mankenda. (Numanye ne: Bapanyi ba bintu bia kudia kabena ne bua kubuela nabi muaba udi mpungilu wenzekela to, nansha kakese.—Yone 2:13-17.
▪ Mankenda: Bitu bimueneka ne: bana betu batu baya kusumbila biakudia muaba wa mpungilu ke batu bimansha bintu bu mudi: mabeji, tubudimbu, tutotola ne bintu bikuabu. Muntu yeye musumbe biakudia kudi basumbishi ba bintu (bu mudi mbombo, bisukuita, tuto, makopo a misanyi anyi bintu bikuabu), udi ne bua kuya kuela tubudimbu ne mabeji anyi bizubu bia bintu ebi muaba udibu babilongoluele bua kubiela, pamutu pa kubiela panshi. Kadi tuetu bamone muntu muele bintu bu mudi tubudimbu anyi mabeji panshi, tubiangule, tubiele mu tshintu tshia kuela bintu bia butshiafu. Bana betu, bu nuenu mua kusua, tuenzayi muetu muonso bua kulamaku muaba utudi tuenzela mpungilu ne kumpenga kuawu kuonso ne mankenda. Mankenda ntshilumbu tshia muntu yonso udi ubuela mu mpungilu. Muntu yonso yeye muikale uditatshisha bua mankenda nunku, dituku dionso ku ndekelu kua mpungilu muaba utudi tumuenzela newikale ushala amu ne mankenda. Tudi basue kuleja ne: tudi ne ngikadilu ya buena ya Nzambi wa tshijila utudi tutendelela.—1 Pet. 1:15, 16; Ekes. 19:10; Dut. 23:14.
▪ Mapa: Bua kuleja dianyisha dietu bua malu onso adibu balongolole bua mpungilu, tuikalaku tuela makuta mu tushete tua mapa a mudimu wa pa buloba bujima tua ku Nzubu wetu wa Bukalenge anyi tudi muaba udi mpungilu wenzekela. Muntu yeye muele sheke wa makuta bu dipa mu mpungilu, udi ne bua kufundapu “Association ‘Les Témoins de Jéhovah’” bu muntu udiye upesha makuta au.
▪ Njiwu ne masama a tshimpitshimpi: Padi bualu bua disama dia tshimpitshimpi bumueneka dîba ditudi mu mpungilu, bikila muanetu wa ku bakididianganyi udi pabuipi nebe bua amanyishe diakamue bena Tshibambalu tshia diondopangana; dîba adi bana betu badi mu tshibambalu atshi badi mua kuteta kumona bukole bua disama ne kukeba tshia kuenza.
▪ Diangata manga: Pawikala ne masama kampanda, ulue ne manga ebe bungi bukumbane, bualu kabakuikala nawu mu mpungilu to. Bintu bu mudi nshingi ya bena disama dia diabete, nuyele muaba muimpe, kanuyedi muaba udibu bimansha bintu bia butshiafu bikuabu to, bualu idi mua kutapa bantu.
▪ Dikuata foto: Paudi ukuata foto dîba ditudi munkatshi mua mpungilu, kutemeshi midilu anyi flashe to. Kubikidi bakuatshi ba foto ba pambelu bua kulua kuyikuata muaba wa mpungilu to. Wewe mumone bena pambelu aba bakeba kukuatangana foto muaba wa mpungilu, kubalombi bua kukukuatabu pebe to.—Yone 2:13-17.
▪ Formilere ya Veuillez suivre l’intérêt (S-43): Tshikondo tshia mpungilu, padi muntu uleja dijinga dia kumanya malu makuabu, tuenzayi mudimu ne formilere wa S-43. Bamanyishi balue ne formilere mikese muaba udi mpungilu wenzekela. Paudi umuwuja, uye kumushiya ku Tshibambalu tshidi tshitangila malu a mikanda anyi kudi sekretere wa tshisumbu tshienu panuapingana mu tshisumbu.—Bala Mudimu wetu wa Bukalenge wa ngondo 11/2009, dibeji 4.
▪ Restoran: Paudi uya bua kudia mu restoran, wikale ne ngikadilu mimpe. Bilondeshile muaba unudi, udi mua kushila muena mudimu makuta adi ashala.
▪ Miaba itudi batudile: 1) Kanusombi anyi kanuladi mu nzubu bantu bungi bupite budi muntu udi munuakidile munuanyishile to. 2) Wewe mumone ne: kuakuya muaba uuvua mulombe bua kutudila, umanyishe kumpala kua dîba. 3) Kumpala kua wewe kulamba, lomba dianyisha kudi muena nzubu anyi kudi bana betu badi batangila malu a miaba ya kulala ku Nzubu wa Bukalenge, bua bakuleje tshia kuenza. 4) Bobu batuanyishile bua kuenza tshintu, katunekeshi to. Enza malu ne nkatshinkatshi. 5) Batendeledi ba Nzambi bonso badi ne bua kuikala ne mankenda. Dituku dionso, ikala ushiya muaba uuvua mulale ne mankenda, mulongolola kabidi bimpe. Bikalabu balongolole bua bana betu badi bafuma kule kutudilabu ku Nzubu wa Bukalenge, badi ne bua kumulama ne mankenda. 6) Uleje muanetu udi munuakidile anyi bana betu bakuabu banudi nabu muaba umue ngikadilu ya dimuma dia nyuma wa Nzambi.—Gal. 5:22, 23.
▪ Mudimu wa badisuile: Muntu yonso udi musue kuenza midimu eyi, udi mua kuya ku Tshibambalu tshia badisuile. Bana badi ne bidimu muinshi mua 16 badi pabu mua kuenza mudimu eu ne diambuluisha dia baledi babu anyi muntu mukole udi baledi babu banyishe.