Netshisankishe nganyi?

1. Patudi tubala Tshibumba tshia Nsentedi anyi Réveillez-vous!, ntshinyi tshitudi mua kutabalela? Bua tshinyi?

¹ Mbalongolole Tshibumba tshia Nsentedi ne Réveillez-vous! bua mudimu wa kuyisha udi wenzeka pa buloba bujima. Ke bua tshinyi biena-bualu bidi biakula bua malu mashilashilangane. Patudi tubala tshiena-bualu tshionso mu tshietu Tshibumba tshia Nsentedi anyi Réveillez-vous!, mbimpe tutangile uditshi mua kusankisha; pashishe udilongolole bua kumupeshatshi.

2. Mbiena-bualu kayi bidi mu bibejibeji bietu bidi mua kusankisha bantu bakuabu bikole?

² Tshibumba tshia Nsentedi tshiudi mupete mpindieu, tshidiku tshiakula bua bualu bua mu Bible buuvua muyukile ne muena mudimu nebe anyi? Mudiku tshiena-bualu tshidi tshiakula bua nsombelu wa mu dîku tshidi mua kuambuluisha mulela webe kampanda anyi? Udiku mumanye muntu udi udilongolola bua kuya mu ditunga kampanda didibu bakuile mu Réveillez-vous! anyi? Kudiku tshimue tshia ku bibejibeji tshidi mua kusankisha bantu badi benza midimu kampanda anyi bena mbulamatadi ba mu teritware wenu anyi? Tshilejilu, tshibejibeji tshidi tshiakula bua ntatu ya bukulakaje tshidi mua kusankisha nangananga bantu badi mu nzubu itubu balamina bakulakaje. Tshibejibeji tshidi ne biena-bualu bidi biakula bua dishipa mikenji ya mbulamatadi tshidi mua kusankisha bantu badi bimanyina mikenji ya mbulamatadi.

3. Londa bualu budi buleja mushinga wa kufila bibejibeji bidi ne malu masunguluke kudi bantu badibi mua kusankisha.

³ Bipeta: Pavua bena dibaka babidi badi Bantemu ba Yehowa ba mu Afrique du Sud bapete Réveillez-vous! wa ngondo wa 10 wa 2011 uvua ne tshiena-bualu tshia ne: “Faites de vos enfants des adultes responsables,” bakabikila ku telefone bilongelu 25 bia tulasa tupuekele bia mu teritware wabu. Bilongelu 22 biakangata Réveillez-vous! eyi ne bobu kuyabanyina balongi babu. Bena dibaka bakuabu babidi ba mu ditunga adi bakenza pabu bia muomumue: bakabanya Réveillez-vous! ayi mu bilongelu bia mu teritware wabu. Balongeshi ba mu tshimue tshia ku bilongelu ebi bakangata dipangadika dia kuenza mudimu ne Réveillez-vous! eyi mu programe wa malongesha a ku lumingu luonso. Bena dibaka babidi abu bakalondela mutangidi wa tshijengu malu au. Ke yeye kukankamija bisumbu bia mu tshijengu tshiende bua bikale babanya bibejibeji mu bilongelu bia mu teritware yabu. Bana betu bakalomba Betele bua kubapatuilabu kabidi bibejibeji ebi.

4. Tudi basue kufila bibejibeji kudi bantu ba bungi bua tshinyi?

⁴ Bibejibeji bietu bidi bituambuluisha bua kumanya bua tshinyi malu kampanda adi enzeka lelu ne tshidiwu atulongesha, ne bidi bikoka ntema yetu ku Bible ne ku Bukalenge bua Nzambi. Pa buloba bujima anu bibejibeji bietu ke bidi ‘bimuangalaja lumu lua lupandu.’ (Yesh. 52:7) Ke bualu kayi tudi basue kubifila kudi bantu ba bungi. Mushindu muimpe wa kuenza nanku nkudiebeja ne: ‘Netshisankishe nganyi?’