Londayi tshilejilu tshia baprofete: Yoele
1. Patudi tuyisha, mmushindu kayi utudi mua kuikala ne didipuekesha bu Yoele?
1 Muprofete Yoele uvua nganyi? Mmuambe anu ne: uvua “muana wa Petuele.” (Yoe. 1:1) Muprofete eu muena didipuekesha uvua mutambe kuimanyina pa mukenji wa Yehowa pamutu pa kuimanyina pa mudimu wende wa buprofete. Bia muomumue, patudi tuyisha tudi tuambila bantu bua Yehowa ne bua Bible pamutu pa kudikebela butumbi ne lumu. (1 Kol. 9:16; 2 Kol. 3:5) Bualu bukuabu, mukenji utudi tuyisha udi utupesha bukole. Mmalu kayi a mu mulayi wa buprofete wa Yoele adi mua kutupetesha tshisumi ne ditekemena lelu?
2. Bu mudi dituku dia Yehowa disemene pabuipi, bidi bitusaka bua kuenza tshinyi?
2 ‘Dituku dia Yehowa didi pabuipi.’ (Yoe. 1:15): Nansha muvuabu bafunde mêyi aa kukadi bidimu binunu ne binunu, lelu tudi mu tshikondo tshia dikumbana diawu dia ndekelu. Dinyanguka dia malu a pa buloba ne dibenga kututeleja ne dituseka dia bantu patudi tuyisha, mmalu adi ajadika patoke ne: tukadi mu matuku a ku nshikidilu wa bulongolodi bubi ebu. (2 Tim. 3:1-5; 2 Pet. 3:3, 4) Patudi tumona mudi nshikidilu musemene pabuipi, bidi bitusaka bua kuteka mudimu wetu wa kuyisha pa muaba wa kumpala.—2 Pet. 3:11, 12.
3. Bu mutudi tusemena ku dikenga dinene, bua tshinyi mudimu wa kuyisha udi nangananga ne mushinga wa bungi?
3 ‘Yehowa udi tshinyemenu kudi bantu bende.’ (Yoe. 3:16): Dikanka didibu bakuila mu mvese eu didi ditangila anu dilumbuluisha dienza Yehowa mu tshikondo tshia dikenga dinene. Kumanya ne: Yehowa neasungile batendeledi bende ba lulamatu mu tshikondo atshi kudi kutukolesha. (Buak. 7:9, 14) Patudi tudifila mu diyisha ne tumona mudi Yehowa utuambuluisha ne utukolesha, tudi tukolesha ditabuja ne dinanukila biatuambuluisha mu tshikondo tshia dikenga dinene didi dienda dilua.
4. Bua tshinyi tudi mua kuikala ne disanka ne kuikala ne dieyemena bua matuku atshilualua?
4 Nansha mutu bamue bamba mudi mukenji wa Yoele wenza buôwa, udi upetesha bantu ba Nzambi ditekemena dinene dia lupandu. (Yoe. 2:32) Nunku, tuikalayi ne dieyemena bua matuku atshilualua ne tuyishayi lumu luimpe lua Bukalenge bua Nzambi ne lukunukunu bu mutudi tutumikila mêyi adi mu Yoele 2:23 a ne: ‘Sankayi bienu, ikalayi ne disanka mu Yehowa Nzambi wenu.’