Tuakajayi mishindu yetu ya kuyisha: Mua kuandamuna padiku bipumbishi

Mushinga: Fuanyikijabi ne: udi mumanye ne: tshikumina tshikole tshidi tshikeba kuenzeka. Bantu nebafue bobu kabayi banyeme. Udi uya kua muena mutumba bua kumuambila, kadi udi ukukosa ku mêyi wamba ne: udi ne bia bungi bia kuenza. Kakuyi mpata, kuakulekela diakamue bua kumuambuluisha to. Bia muomumue, bantu bakuabu ba mu teritware wetu batu babenga kututeleja bualu kabatu bamanye ne: mukenji wetu udi mua kubapandisha to. Imue misangu patudi tuya kubatangila, lungenyi luabu lutu lutume ku malu makuabu. (Mat. 24:37-39) Peshi badi mua kuikala batukine bua malu adi bantu batushiminyina. (Mat. 11:18, 19) Badi mua kuikala bela meji ne: bu mudi bitendelelu bia bungi bienza malu mabi, tuetu petu tutu tuenza malu au. (2 Pet. 2:1, 2) Bikala muntu kayi muleje dijinga musangu wa kumpala utudi tupetangana nende, katumulekedi diakamue to.

Mushindu wa kuenza malu:

Kumpala kua kuyisha ku nzubu ne ku nzubu, wangate minite mikese bua kuela meji bua bipumbishi biudi mua kutuilangana nabi, ne ukebe muudi mua kuandamuna.
Muntu yeye mujule tshipumbishi, ukebe muudi mua kutungunuka ne muyuki ne lutulu luonso. Pamuapa udi mua kumuela kalumbandi. Tshilejilu yeye muambe ne: ntu nya panyi mu nzambi, udi mua kumuandamuna ne: “Mvua mutekemene bua kupetangana ne muntu udi munange malu a Nzambi bu wewe.” Pamuapa kumanya mudi muntu udiumvua anyi kumanya nsombelu wende nekukuambuluishe bua kutungunuka ne kumuyisha. Tshilejilu, yeye muambe ne: ndi ne mudimu, udi mua kumuambila ne: “Ke mundi mmona. Kadi kumpala kua meme kukushiya, ndi musue kukupesha tshintu etshi.” Mushindu mukuabu: Muntu yeye muambe ne: kabiena binsankisha, mbimpe kumuela ka lukonko. Udi mua kumuebeja ne: “Udi musue kuamba ne: tshidi katshiyi tshikusankisha m’Bible anyi mbitendelelu?”
Ikala ne busunguluji. Uvuluke ne: Yehowa katu wenzeja bantu bua kumuteleja to. (Dut. 30:19) Muntu yonso neadiambuile bujitu buende kumpala kua Yehowa. (Gal. 6:5) Muntu yeye ubenga ubengelamu, mbimpe kumulekela. Patudi tuleja mutudi tunemeka mmuenenu wende, nebimusake bua kutelejaye muanetu mukuabu wikala mua kulua musangu mukuabu bua kumuyisha.—1 Pet. 3:15.

Tshinudi mua kuenza mu ngondo eu:

Paudi upeta tshipumbishi kampanda, nuenu bamane kushiyangana ne muntu, uyukile ne mumanyishi unudi nende munuvua mua kuikala bandamune muntu au bimpe.