Filme mupiamupia bua kutuadija kulonga Bible ne bantu

Mu site wetu wa jw.org mudi filme muîpi wa Bua tshinyi kulonga Bible? udi bantu ba bungi mua kutangila. Mbenze filme eu bua kusaka bantu badi banange bulelela bua kuitababu bua kulonga Bible tshianana. Bua kumupeta, utute pa “Lomba bua kulonga Bible,” lua kuinshi pautshidi ukanguilaku site wetu anyi enza mudimu ne kode (QR) udi wambuluisha bua kubuela mu site wetu ne lukasa, udi panyima pa trakte yetu mipiamipia yonso. Tumonayi imue mishindu itudi mua kuyisha bimpe ne filme eu.

• Paudi upinganyina muntu, umuambile ne: “Ndiku mua kukuleja filme muîpi udi uleja mua kupeta mandamuna a nkonko ya malu a mu Bible iutu udiela anyi?” Yeye muitabe, umuleje filme mu telefone webe anyi mu ordinatere wende.

• Tuetu bafile umue wa ku trakte mipiamipia patudi tuyisha padi mpunga umueneka anyi muaba udi bantu ba bungi, uleje muntu muaba udi kode au ne umulombe bua enze nende mudimu. Bu mudi mu miakulu ya bungi kode eu ukufikisha musangu umue muaba udi filme eu mu site wetu, bidi mua kuikala bimpe bua kuleja muntu filme eu diakamue mu telefone webe.

• Wambile bena mudimu nebe, balongi benu, balela bebe ne bamanyangana nabu bua filme eu, ne ubalombe bua kubalejaye. Anyi ubatumine tukuatakaji (anyi liens) tua filme eu pashishe ubalombe bua bamutangile.

Tuetu tuenza mudimu ne filme mupiamupia eu, tudi mua kutuadija kulonga Bible ne bantu ba bungi, kuambuluisha kabidi aba badi “badiakaje bua kupeta muoyo wa tshiendelele.”​—Bien. 13:48.