Nukoleshe dijinga dia muntu ne lukasa luonso

Ku diambuluisha dia site wetu wa Enternete udibu benze, bantu ba bungi menemene mbatuadije kulomba bua kubalongesha Bible. Bakuabu kabidi badi balomba bua kubalongesha Bible ku diambuluisha dia mishindu mipiamipia ya kuyisha muaba udi bantu ba bungi. Betele utu umanyisha bisumbu bualu ebu ne lukasa luonso. Tshilejilu, muntu yeye mulombe mu site wetu wa jw.org bua bamulongeshe Bible, Betele utu umanyisha bakulu ba mu teritware udi muntu au panyima pa matuku abidi patupu. Kadi luapolo lutudi bapete ludi luleja ne: mbingu ya bungi itu ipita bena mu bisumbu kabayi baya kutangila bantu badi balombe bua kubalongesha Bible. Ntshinyi tshitudi mua kuenza bua kuambuluisha muntu kumpala kua dijinga diende kujikadi?​—Mâko 4:14, 15.

Padi muntu udi kayi musombele mu teritware wenu uleja dijinga, uuje formilere wa S-43 ne lukasa luonso, pashishe umupeshe sekretere wenu dituku dia bisangilu bia londa. Sekretere udi ne bua kumanyisha Betele anyi tshisumbu tshia muaba udi muntu au bualu ebu dituku dimue anyi abidi ku diambuluisha dia Enternete mu site wetu wa jw.org. Bakulu badi ne bua kuikala ne tshibidilu tshia kutangila malu adi mu site wetu. Padibu babamanyisha bua kuya kutangila muntu, badi ne bua kuya ne lukasa luonso bua kukolesha dijinga diende. Mumanyishi yonso udibu balomba bua kuya kutangila muntu au, udi ne bua kuteka bualu ebu kumpala kua malu makuabu onso. Wewe kuyi musangane muntu kumbelu, udi mua kumushila ka mukanda bua kumumanyisha mushindu unudi mua kupetangana nende.