Ikala mumanyishi udi utungunuka ne kuya kumpala
1. Fila bilejilu bia mu bidimu lukama bia kumpala bidi bileja ne: tudi ne bua kuakaja mushindu wetu wa kuyisha.
1 Bu mutudi bamanyishi ba lumu luimpe, tudi ne bua kuya kumpala. Ke bualu kayi Yezu wakalongesha bayidi bende malu avua mua kubambuluisha bua kuakaja mushindu wabu wa kuyisha. (Luka 9:1-5; 10:1-11) Ke tshivua Pisikila ne Akila benze pabu, bakaya ne Apolo kumbelu kuabu, “kumumvuijabu njila wa Nzambi bimpe menemene.” (Bien. 18:24-26) Bualu bua muomumue ebu ke buakasaka mupostolo Paulo bua kulomba Timote uvua mumanyishi mupiluke bua kutungunuka ne kudifila mu dilongesha “bua bantu bonso bamone” muvuaye uya kumpala. (1 Tim. 4:13-15) Nansha tuetu tukadi bakuatshile Mukalenge mudimu bu bapika kukadi bidimu bia bungi, tudi ne bua kutungunuka ne kulengeja nyishilu wetu.
2. Leja mutudi mua kulonda tshilejilu tshia bakuabu.
2 Ulonde tshilejilu tshia bakuabu: Umue mushindu utudi mua kuakaja nyishilu wetu, nkulonda tshilejilu tshia bakuabu. (Nsu. 27:17) Nanku padi bamanyishi bakuabu bayisha, wikale ne ntema. Ulombe mibelu kudi aba badi bamanye kuyukila ne bantu mu mushindu muimpe, pashishe ubateleje bimpe menemene. (Nsu. 1:5) Udiku welakana bua mushindu wa kupinganyina muntu, kutuadija kulonga Bible ne muntu, anyi wa kuyisha mu mishindu mikuabu anyi? Kuvungi maboko to, ebeja mulombodi wa kasumbu kenu ka mudimu wa buambi anyi mumanyishi mupiluke bua akuleje tshia kuenza. Tuvuluke kabidi ne: nyuma wa Yehowa udi mua kulengeja tshipedi tshietu, nanku ikala umulomba nyuma wende eu misangu yonso.—Luka 11:13.
3. Ntshinyi tshitudi ne bua kuenza bobu batupeshe mubelu nansha katuyi bawulombe?
3 Muanetu yeye mukupeshe mubelu bua muudi mua kuakaja mudimu webe, kufiki munda to, nansha wewe kuyi mumulombawu. (Muam. 7:9) Anu bu Apolo, udipuekeshe, witabe diambuluisha ne dianyisha dionso. Wewe muenze nanku, udi muena meji.—Nsu. 12:15.
4. Mbualu kayi bunene buvua Yezu muambe budi butusaka bua kutungunuka ne kuya kumpala mu mudimu wa kuyisha?
4 Kuya kumpala kudi kutumbishisha Nzambi: Yezu wakafila tshilejilu tshivua tshikankamije bayidi bende bua kuyabu kumpala mu mudimu wa kuyisha. Wakadifuanyikija ne mutshi wa mvinyo, kufuanyikijaye bayidi bende bela manyi ne matamba awu. Wakamba ne: Tatu wende udi ulengeja ditamba dionso didi dikuama tumuma “bua dikuame tumuma tua bungi.” (Yone 15:2) Anu mutu muena budimi bua mvinyo musue bua matamba a mitshi yende ya mvinyo akuame tumuma tua bungi, ke mudi Yehowa musue bua tutungunuke ne kukola, tukuama “mamuma a mishiku yetu.” (Eb. 13:15) Mbipeta kayi bimpe bidi bimueneka patudi tuya kumpala mu mudimu wetu wa kuyisha? Yezu udi wandamuna ne: “Tatu wanyi udi utumbishibua mu bualu ebu: nutungunuke ne kukuama mamuma a bungi.”—Yone 15:8.