Udiku udilongolola bua Tshivulukilu anyi?

Mu dia 13 Nisana 33, Yezu uvua mumanye ne: kuvua kumushadile anu dilolo dimue dia kusomba ne balunda bende ba pa muoyo kumpala kua kumushipabu. Uvua mua kusekelela nabu Pasaka wende wa ndekelu, pashishe kubanjija tshibilu tshipiatshipia tshia Didia dia Mukalenge. Tshikondo tshia mushinga tshia nunku tshivua tshilomba kutshilongolola. Nunku, wakatuma Petelo ne Yone bua kulongololabu malu onso. (Luka 22:7-13) Kumbukila anu ku tshikondo atshi, tshidimu tshionso, bitu ne mushinga bua bena Kristo batu basue kusekelela Tshivulukilu balongolole tshibilu etshi. (Luka 22:19) Mmalu kayi a mushinga atudi ne bua kuenza bua kulongolola Tshivulukilu tshituenza mu dia 3 ngondo 4?

Malu alongolola bakulu:

Balongolole bua kutshienzela ku Nzubu wa Bukalenge anyi muaba mukuabu udi mukumbane. Muaba au udi ne bua kuikala ne miaba ya kusomba mikumbane, bintu bia kukenkesha nabi, ne wikale upita kapepe bimpe. Balongolole kabidi bua kusukula muaba au bimpe menemene kumpala kua dîba.
Basungule ngamba-malu udi mukumbane, mulombodi ne bana betu basambila bua diampa ne mvinyo.
Bisumbu bia bungi biobi bienzela Tshivulukilu muaba umue bishilangana, bumvuangane dîba didi tshisumbu tshionso ne bua kuenza Tshivulukilu, mushindu wa kubuela ne kupatuka muaba au ne muaba wa ditekela mashinyi, mioto ne makalu.
Basungule bakididianganyi ne bendeshi ba mampa ne mvinyo ne babaleje tshia kuenza.
Balongolole bua kupeta mampa ne mvinyo bidi bikumbane, malonga, vere, ne mesa mimpe ne tshilamba tshia pa mesa.

Malu alongolola bamanyishi:

Badilongolole bua kuyisha bikole tshikondo tshia difila mabeji a dibikila nawu bantu.
Bafunde mêna a balongi babu ba Bible, balela babu, balongi babu, bena mudimu nabu ne bamanyangana nabu bua kubabikila.
Babale mvese ya mu Bible idibu bafile bua kubala tshikondo tshia Tshivulukilu ne belanganapu meji.
Balue mu Tshivulukilu badilongolole bua kuakidila benyi.