Bisangilu bia buambi bidi bikumbaja tshipatshila tshiabi
1. Bisangilu bia mudimu wa buambi bidi ne tshipatshila kayi?
1 Musangu mukuabu Yezu wakadisangisha ne bayidi bende 70 kumpala kua kuyabu kuyisha. (Luka 10:1-11) Wakabakolesha pakabavuluijaye ne: kabakuikala nkayabu to, bavua mua kubalombola kudi Yehowa “Mfumu wa dinowa.” Wakabambila kabidi malu a kuenza avua mabambuluishe bua kuenza mudimu au bimpe, ne kubatumaye mu bulongame “ku babidi ku babidi.” Lelu, bisangilu bitutu tuenza kumpala kua kuya mu buambi bidi ne tshipatshila tshia muomumue tshia kutukolesha, kutuambuluisha ne kututuma mu bulongame.
2. Tshisangilu tshia buambi tshidi ne bua kuenzeka mu minite bungi munyi?
2 Tshisangilu tshia buambi tshivua tshienza minite 10 anyi 15, kusangisha ne diabanya dia bantu, difila dia teritware, ne disambila. Mpindieu malu mmashintuluke. Kubangila mu ngondo 4, tshisangilu tshia buambi netshikale tshienza minite 5 anyi 7. Kadi, tshiotshi tshienzeka panyima pa bisangilu bia tshisumbu, tshidi ne bua kuikala tshîpi menemene bualu bantu badi babuelamu bakadi bapete malongesha makuabu mimpe a mu Bible. Kuenza tshisangilu tshia buambi mu minite mikese nekuambuluishe bantu bonso bua kuyisha mêba a bungi. Kabidi, bikala bampanda-njila anyi bamanyishi bakavua batuadije kuyisha kumpala kua tshisangilu atshi, nebibalombe bua kuimanyika mudimu wabu anu minite mikese tshianana bua kubuela mu tshisangilu.
3. Bua bisangilu bia buambi kuambuluishabi bamanyishi bikole, mmunyi mudibi ne bua kuikala bilongolola?
3 Mbimpe kulongolola bisangilu bia buambi bua bikale biambuluisha bamanyishi bikole. Mu bisumbu bia bungi, malu atu enda bimpe padi tusumbu tua buambi tudisangishila miaba mishilangane pamutu pa kutusangisha tuonso kaba kamue. Kuenza nunku kudi mua kukepeshila bamanyishi ntanta wa kuya mu tshisangilu tshia buambi ne pamuapa wa kuya mu teritware wa kuyishila. Bidi biambuluisha bua kuabanya bamanyishi ne lukasa ne biambuluisha batangidi ba tusumbu bua kutabalela bena mu tusumbu tuabu bimpe. Kasumbu ka bakulu kadi mua kukonkonona nsombelu wa muaba udibu ne kusungula mushindu muimpe wa kulongolola malu. Kumpala kua kujikija tshisangilu etshi ne disambila dîpi, bantu bonso badi ne bua kumanya muaba udibu ne bua kuya kuyishila ne muntu udibu bayisha nende.
4. Bua tshinyi katuena mua kumona bisangilu bia buambi bu bidi bishadile kudi bisangilu bikuabu?
4 Katshiena ne mushinga mushadile ku wa bisangilu bikuabu: Bu mudibu benza bisangilu bia buambi bua kuambuluisha badi baya mu buambi, pamuapa tshisumbu tshijima katshiena mua kubuelamu to. Kadi kabiena bisua kumvuija ne: tudi ne bua kupepeja bisangilu ebi anyi kubimona ne mushinga mushadile ku wa bisangilu bikuabu to. Anu bu bisangilu bietu bikuabu bionso, bisangilu bia buambi ndilongolola dia kudi Yehowa didi dituambuluisha bua kusakangana ku dinanga ne ku bienzedi bimpe. (Eb. 10:24, 25) Nanku, mulombodi wa tshisangilu etshi udi ne bua kudilongolola bimpe bua malu ayukidilanganabu atumbishe Yehowa ne ambuluishe badi babuelamu. Pikalaku mushindu, bamanyishi bonso badi baya mu buambi badi ne bua kudienzeja bua kubuelamu.
Katuena ne bua kupepeja bisangilu bia buambi anyi kubimona bu bishadile ku bisangilu bikuabu to
5. a) Mmudimu kayi udi nawu mutangidi wa mudimu bua kulongolola bisangilu bia buambi? b) Ntshinyi tshidi muanetu wa bakaji mua kuenza padiye ulombola tshisangilu tshia buambi?
5 Mudi mulombodi mua kudilongolola: Bua muntu kudilongolola bimpe bua kuenza mudimu kampanda mu bisangilu, mbimpe bamupeshawu kumpala kua dîba. Ke mudibi kabidi bua bisangilu bia buambi. Padi tusumbu tua buambi tudisangishila miaba mishilangane, mutangidi wa kasumbu anyi muntu udi umuambuluisha ke udi ulombola tshisangilu tshia buambi mu kasumbu kabu. Kadi dîba didi tshisumbu tshijima tshienzela tshisangilu etshi muaba umue, mutangidi wa mudimu neasungule watshilombola. Bamue batangidi ba mudimu batu babanyina balombodi bonso ba tshisangilu etshi programe ne bamulamika ku tshibasa tshia mamanyisha. Mutangidi wa mudimu neikale ne busunguluji padiye usungula balombodi, mumanye ne: bulenga bua bisangilu ebi nebulonde kabidi mudi balombodi balongesha ne balongolola malu. Pikalaku kakuyi mukulu anyi musadidi wa mudimu nansha muanetu wa balume mutambule udi mukumbane udibu mua kusungula bua kulombola tshisangilu etshi amue matuku, mutangidi wa mudimu udi mua kusungula muanetu wa bakaji mutambule udi mukumbane bua kutshilombola.—Bala tshiena-bualu tshia “Padi muanetu wa bakaji ulombola.”
6. Bua tshinyi mbia mushinga bua mulombodi wa tshisangilu tshia buambi adilongolole bimpe?
6 Patubu batupesha mudimu mu Kalasa ka Mudimu wa Nzambi anyi mu Tshisangilu tshia Mudimu, tutu tuwangata ne mushinga wa bungi ne tudilongolola bimpe. Bantu bakese tshianana mbadi mua kuindila bua kuelangana meji a malu ambabu padibu mu njila baya mu bisangilu. Ke mutudi ne bua kuenza kabidi bua tshisangilu tshia mudimu wa buambi. Bu mudibu bîpidije tshisangilu etshi bikole, didilongolola dimpe didi ne mushinga wa bungi bua kuikalatshi tshia nsongo ne kujikatshi pa dîba. Didilongolola dimpe didi dilomba kabidi kuikala ne teritware kumpala kua dîba.
7. Ngamue malu kayi adi mulombodi mua kuyukidilangana ne bamanyishi?
7 Malu a kuyukidilangana: Bu mudi nsombelu ishilangana mu teritware ne teritware, ‘mupika wa lulamatu’ ki mmufile plan bua tshisangilu tshia buambi tshionso to. Mu kazubu ka ne: “Malu anudi mua kukonkonona mu tshisangilu tshia buambi” mudi amue malu a kukonkonona. Misangu ya bungi, tshisangilu tshia buambi netshikale tshienzeka mu diyukidilangana. Imue misangu, badi mua kutshienza mu dinaya dilongolola bimpe anyi kutangila kafilme kampanda ka mu jw.org. Padi mulombodi udilongolola bua tshisangilu tshia buambi, udi ne bua kuelangana meji a malu ikala mua kukolesha ne kuambuluisha badi baya mu buambi dituku adi.
Padi mulombodi udilongolola bua tshisangilu tshia buambi, udi ne bua kuelangana meji a malu akolesha ne ambuluisha badi baya mu buambi dituku adi
8. Mmalu kayi a kuyukidilangana mu bisangilu bia buambi bia mu Disambombo ne mu Dia lumingu adi mua kuambuluisha bikole?
8 Tshilejilu, matuku a Disambombo, bamanyishi ba bungi batu bafila Tshibumba tshia Nsentedi ne Réveillez-vous! Bantu ba bungi batu bayisha mu Disambombo kabatu bayisha munkatshi mua lumingu to, nunku badi mua kupeta lutatu lua kuvuluka ngenyi ya mua kufila bibejibeji ivuabu balongolole mu Ntendelelu wabu wa mu Dîku. Nanku, padi mulombodi wambulula lumue lua ku ngenyi ya mua kufila bibejibeji idi panyima pa Mudimu wetu wa Bukalenge bidi mua kubambuluisha. Amue a ku malu adibu mua kusakidila mu ngenyi ya mua kufila bibejibeji nngumu ne malu bidi bienzeke muaba unudi, bibilu binene anyi mua kushiya tshishimikidi bua kupinganyina muntu bikalaye muitabe tshibejibeji. Bikala bamue badi balue mu tshisangilu tshia buambi bakadi batuadije kufila bibejibeji kampanda, mulombodi udi mua kubalomba bua kufila imue ngenyi mu mêyi makese anyi kulonda malu mimpe adibu bapete. Mu Dia lumingu, mulombodi udi mua kusungula bua kuenza bia muomumue bua mikanda ya kufila ngondo au. Mikanda ya kulonga nayi ne bantu bu mudi broshire wa Lumu luimpe ne wa Teleja Nzambi ne mukanda wa Bible ulongesha nya kufila dituku kayi dionso, nunku mulombodi udi mua kukonkonona mu tshikoso mushindu wa kufila umue wa ku mikanda eyi.
9. Mmalu kayi anudi mua kuyukidilangana mu Disambombo ne mu Dia lumingu panudi mu kampanye ka pa buaku?
9 Tshisumbu tshiotshi tshienza kampanye ka pa buaku mu Disambombo anyi mu Dia lumingu, mulombodi udi mua kuakula bua mua kufila bibejibeji bidiku pamue ne mabeji a dibikila anyi trakte, anyi udi mua kuleja tshia kuenza padi muntu uleja dianyisha. Nudi kabidi nansha mua kulondaku malu mimpe adi aleja mushinga wa tumpanye tua nunku.
10, 11. Bua tshinyi didilongolola dia bamanyishi didi ne mushinga bua tshisangilu tshia buambi kupitatshi bimpe?
10 Mudi bamanyishi mua kudilongolola: Bamanyishi badi pabu ne tshia kuenza bua bisangilu bia buambi bipite bimpe. Bobu badilongolole kumpala kua dîba, pamuapa mu Ntendelelu wabu wa mu Dîku, badi mua kupeta tshia kuambila bakuabu bamanyishi. Didilongolola dimpe didi dilomba kabidi kupeta bibejibeji anyi mikanda kumpala kua kulua mu tshisangilu tshia buambi bua bantu bonso baye diakamue mu teritware yabu kabayi bajingakana tshianana to.
11 Mbimpe kabidi kudilongolola bua kufika mu tshisangilu tshia buambi ndambu wa minite kumpala kua kutuadijatshi. Bushuwa, tutu tudienzeja bua kufika mu bisangilu bietu bionso bia tshisumbu kumpala kua dîba. Kadi bidi mua kutamba kutatshisha patudi tufika mu bisangilu bia buambi panyima pa dîba. Mmushindu kayi? Muanetu udi ulombola udi utangila malu a bungi kumpala kua kuabanyaye bantu. Bikala bamanyishi balue bakese, udi mua kusungula bua kubatuma mu teritware udi kayi muyisha bikole to. Bikala bamue bende ntanta bua kufika mu tshisangilu atshi ne teritware muikale kule, udi mua kubatuma ne badi ne mashinyi. Bikala teritware muaba udi benzavi, udi mua kutuma bana betu ba balume bua kuyisha ne bana betu ba bakaji anyi kuikala nabu pabuipi padibu bayisha. Badi mua kutuma bamanyishi badi kabayi ne makanda a mubidi mimpe bua kuyisha mu njila muimpe anyi udi ne nzubu idi ne bibumba bikese bia kubanda. Badi mua kutuma bamanyishi bapiabapia bua kuyisha ne badi bapiluke. Kadi, bamanyishi bobu bafika panyima pa dîba, nebilombe bua kushintulula bantu misangu ne misangu bua kubapetela ba kuyisha nabu badi bakumbane. Bushuwa, imue misangu kudi mua kuikala bualu busunguluke budi mua kutufikishisha panyima pa dîba. Kadi, tuetu bikale ne tshibidilu tshia kufika panyima pa dîba, tudi mua kudikonka bituikala tuenza nanku anu bualu tudi tupepeja tshisangilu tshia buambi anyi bualu katuena tulongolola malu etu kumpala kua dîba.
12. Wewe ne tshibidilu tshia kumvuangana ne bantu bua kuyisha nabu, ntshinyi tshiudi mua kutabalela?
12 Bamanyishi badi balua mu tshisangilu tshia buambi badi mua kumvuangana ne muntu kumpala kua tshisangilu etshi bua kuyisha nende anyi badi mua kubapesha muntu mu tshisangilu amu. Wewe ne tshibidilu tshia kumvuangana ne bantu bua kupatuka nabu mu buambi, kuenaku mua ‘kudikangula’ anyi kudialabaja paudi uyisha ne bamanyishi bashilashilangane pamutu pa kuikala uyisha anu ne balunda bebe ba pa muoyo dîba dionso anyi? (2 Kol. 6:11-13) Kuenaku mua kuyisha ne mumanyishi mupiamupia padi mpunga umueneka bua kumuambuluisha bua alengeje mushindu wende wa kulongesha anyi? (1 Kol. 10:24; 1 Tim. 4:13, 15) Uteleje bimpe mibelu yonso idibu bakupesha ne ulonde malu adibu bamba bua muaba uudi ne bua kutuadijila kuyisha. Padi tshisangilu tshijika, kushintuludi muntu udibu bakupeshe bua kuyisha nende to, nuye diakamue mu teritware wenu.
13. Bantu bonso bobu bangata tshisangilu tshia buambi ne mushinga ne benza tshidibu babalomba, netshituambuluishe mushindu kayi?
13 Pavua bayidi 70 bavua Yezu mutume mu buambi bajikije kuyisha, “bakapingana ne disanka.” (Luka 10:17) Kakuyi mpata, tshisangilu tshivua Yezu muenze nabu kumpala kua kuyishabu tshivua tshibambuluishe bua kuyisha bimpe. Bisangilu bia buambi bidi mua kuambuluisha lelu mushindu wa muomumue. Bantu bonso bobu bangata tshisangilu etshi ne mushinga ne benza tshidibu babalomba, netshitukoleshe, netshituambuluishe ne netshituteke mu bulongame bua kukumbaja mudimu udibu batupeshe wa kufila “bujadiki kudi bisamba bionso.”—Mat. 24:14.