Biamu bietu bia mudimu bia kulongesha nabi
1. Mmushindu kayi udi bamanyishi bikale bu bansenda?
1 Bansenda batu ne biamu bia mudimu bia bungi. Bimue batu benza nabi mudimu mu mpukapuka, bikuabu batu benza nabi mudimu dîba dionso. Bansenda bapiluke batu misangu yonso ne biamu bitubu batamba kuenza nabi mudimu mu tshibuta tshiabu, ne mbamanye mua kuenza nabi mudimu bimpe menemene. Bible udi ulomba muena Kristo yonso bua kudifila bikole mu mudimu wa kuyisha ne kuikala “muena mudimu udi kayi ne bualu bua kumvuila bundu.” (2 Tim. 2:15) Ntshiamu kayi tshia mushinga mukole tshitudi natshi? Tudi ne Dîyi dia Nzambi, tshiamu tshinene tshia ‘kuvuija natshi bantu bayidi.’ (Mat. 28:19, 20) Nunku, tudi ne bua kudienzeja bua kumanya mua ‘kulongesha dîyi dia bulelela bimpe menemene.’ Kadi, tudi ne biamu bikuabu bitutu tulongesha nabi bulelela bidi bena Kristo bonso ne bua kumanya mua kuenza nabi mudimu bimpe menemene.—Nsu. 22:29.
2. Mbiamu kayi binene bia kulongesha nabi bitudi nabi?
2 Biamu bietu binene bia kulongesha nabi: Pa kumbusha Bible, mbiamu kayi bikuabu bitudi ne bua kuyisha nabi? Tshiamu tshinene tshitudi ne bua kulongesha natshi bulelela mmukanda wa Bible utu ulongesha tshinyi menemene? Patudi tujikija kulonga mukanda eu ne mulongi wa Bible, tudi tubuela mu mukanda wa “Nudilame mu dinanga dia Nzambi” bua kumulongesha mua kutumikila mêyi manene a mu Bible mu nsombelu wende. Nanku, tudi ne bua kumanya mua kulongesha bantu ne mikanda ibidi eyi bimpe menemene. Broshire yetu mikuabu idi payi mu biamu bia mudimu bitutu tulongesha nabi. Broshire wa Lumu luimpe lua kudi Nzambi ntshiamu tshietu tshinene tshia kutuadija natshi malonga a Bible. Mu teritware muomu bantu badi ne lutatu lua kubala anyi badi bakula muakulu utudi ne mikanda mikese peshi katuyi nayi, tudi mua kulonga nabu broshire wa Teleja Nzambi peshi wa Teleja Nzambi bua upete muoyo wa tshiendelele. Broshire wa Badi benza disua dia Yehowa lelu mbanganyi? udi utuambuluisha bua kulombola bantu ku bulongolodi bua Nzambi. Tudi ne filme idi yambuluisha bua kuvuija bantu bayidi itudi ne bua kumanya mua kuyisha nayi bimpe, bu mudi Bua tshinyi kulonga Bible?, Tshitu tshienzeka ku Nzubu wa Bukalenge ntshinyi?, Dieu a-t-il un nom?
3. Nimero yalonda ya Mudimu wetu wa Bukalenge neituambuluishe bua kuenza tshinyi?
3 Nimero yalonda ya Mudimu wetu wa Bukalenge neituambuluishe bua kumanya mua kuenza mudimu bimpe ne mikanda yetu ya kulongesha nayi. Tuetu tudienzeja bua kuyisha bimpe menemene ne mikanda eyi, netutumikile mubelu mufundisha ku nyuma wa Nzambi eu: “Wikale mudimuke mu malu ebe ne mu dilongesha diebe. Unanukile mu malu aa, bualu paudi wenza nunku, neudisungile wewe muine ne bantu badi bakuteleja.”—1 Tim. 4:16.