Tuakajayi mishindu yetu ya kuyisha: Longesha bapiabapia

Mushinga: Bayidi bapiabapia ba Yezu badi ne bua kulonga “malu onso” avuaye muambe; mu malu aa mudi kabidi kulongesha bakuabu bulelela. (Mat. 28:19, 20) Bapiabapia ba bungi bakadi bakumbaje malu malomba bua kuenza mudimu mu Kalasa ka Mudimu wa Nzambi ne bakadi pamuapa bayisha bena mu dîku diabu anyi balunda babu padi mpunga umueneka. Kadi padi dianyisha diabu dienda divula bua malu adibu balonga ne bafika ku dimanya ne: Yehowa mmusue bua bantu bonso bumvue lumu luimpe, badi mua kuleja dijinga dia kuyisha. (Lomo 10:13, 14) Padibu banyishila muntu bua kuluaye muambi wa lumu luimpe udi kayi muanji kutambula, kumulongesha bimpe nekumuambuluishe bua kuikala ne dikima dia bungi padiye wela tshidia tshia mushinga mukole etshi mu dikola diende dia mu nyuma.—Luka 6:40.

Mushindu wa kuenza malu:

Ambuluisha mumanyishi mupiamupia bua apete mikanda ikalaye nayi dijinga bua kuyisha ne kulongesha. Muleje mushindu uutu ulongolola tshibuta tshiebe tshia buambi, ne mumvuije tshipatshila tshia mukanda onso uudi wela mu tshibuta.
Nusungule nende lungenyi lua mua kubanga muyuki ludi mu Mudimu wetu wa Bukalenge ne nuenze dinaya. Umukankamije bua kuambaye lungenyi elu mu ende mêyi. Nuenze manaya ne kadre idi mu dibeji dia 82 dia mukanda wa Kalasa ka mudimu idi ikumbanangana ne teritware wenu. Utambe kumuleja mushinga wa kuvuala bimpe ne kudilengeja bimpe.—2 Kol. 6:3, 4.
Wikale umulongesha ku kakese ku kakese. Leja mumanyishi mupiamupia karte ka teritware, mulongeshe mua kuenza mudimu ne kabeji ka Notes de maison en maison. Muleje mudiye mua kufunda malu adi atangila bantu badi banyishe mukenji wetu. Mulongeshe mudiye mua kuyisha ne site wa jw.org ne kakanda ka Une bonne nouvelle pour des gens de toutes nations. Muambuluishe bua kukolesha dijinga dia muntu udi muanyishe bulelela udiye upetangana nende.—1 Kol. 3:6.
Ikala ne lutulu, ne umuele kalumbandi. (Nsu. 25:11) Wikale tshilejilu tshimpe. Tshisumi tshiebe ne mushindu uudi utabalela bantu ne muoyo mujima nebimuambuluishe bikole matuku adi alua kumpala.

Tshitudi mua kuenza mu ngondo eu:

Uyishe ne mulongi webe wa Bible ku nzubu ne ku nzubu, ne nupinganyine muntu anyi nulombole nende dilonga diebe dia Bible. Wewe kuyi ne mulongi wa Bible, ulombe mumanyishi udi kayi mupiluke bua kuyisha nebe.