‘Enda bua ditabuja, kuendi bua bintu bidi bimueneka ku mêsu to’
Matuku makese kumpala kua kabutu ka Yelushalema, mupostolo Paulo wakafunda wamba ne: bu mutudi basalayi bimpe ba Kristo, tudi ne bua kumanya ne: ntatu neyitukuate ne katuena ne bua kuteka disanka ne diakalenga dietu pa muaba wa kumpala to. (2 Tim. 2:3, 4) Bu mukadi dikenga pa kukuata bulongolodi bubi ebu, tudi dijinga ne ditabuja dikole bua kushala badifile bikole ku malu a mu nyuma. (2 Kol. 4:18; 5:7) Tangila filme wa ‘Marchons par la foi, non par la vue,’ (Buela mu jw.org mu Mfualansa, utangile muinshi mua PUBLICATIONS > VIDEOS.) Umone mudi dinanga dinekesha dia bintu bia ku mubidi dilua buteyi budi bufikisha Nahama ne Abitala ku lufu. Pashishe wandamune nkonko eyi:
1) ‘Tshintu tshia muengu tshivua tshimane muaba wa tshijila’ tshivua tshinyi mu bidimu lukama bia kumpala? Mbualu kayi bua mushinga buvua bena Kristo bavua basombele mu Yelushalema ne bua kuenza? (Mat. 24:15, 16) 2) Bua tshinyi bivua bikengela kuikala ne ditabuja bua kumbuka mu tshimenga? 3) Mmalu kayi avuabu ne bua kudipangisha pavuabu banyema? 4) Bua tshinyi Nahama ne Abitala bavua bajingakane? (Mat. 24:17, 18) 5) Nditeta kayi dikuabu divua Rachel mupete pavuabu bumbuka mu Yelushalema? (Mat. 10:34-37; Mâko 10:29, 30) 6) Mmunyi muvua Etana mushiye tshilejilu tshimpe tshia ditabuja ne tshia dieyemena Yehowa? 7) Nntatu kayi ivua bena Kristo bapete mu Pela? 8) Mmunyi muvua ditabuja dia Nahama ne dia Abitala ditekete ku kakese ku kakese? 9) Mmushindu kayi uvua Yehowa mukumbajile bena Kristo bavua mu Pela majinga abu? (Mat. 6:33; 1 Tim. 6:6-8) 10) Patudi bindile nshikidilu wa ndongoluelu wa malu eu, mmunyi mutudi mua kuidikija Abalahama ne Sala? (Eb. 11:8-10) 11) Tshinyi tshivua tshisake Nahama ne Abitala bua kupingana ku Yelushalema? Bua tshinyi bavua bele meji bibi? (Luka 21:21) 12) Nsombelu uvua mushindu kayi pakapingana Nahama ne Abitala mu Yelushalema? 13) Bua tshinyi tudi ne bua kukolesha ditabuja dietu kumpala kua nshikidilu wa ndongoluelu wa malu mubi eu kuluaye?—Luka 17:31, 32; 21:34-36.
Kuenda bua ditabuja kudi kumvuija 1) kueyemena buludiki bua Yehowa, 2) kumulekela utulombola ne 3) kuleja ne: tudi tuangata malu a mu nyuma ne mushinga kupita bintu bia ku mubidi. Tuangatayiku dipangadika dia kuenda bua ditabuja batuishibue ne: “Buloba budi bupita ne majinga abu kabidi, kadi muntu udi wenza disua dia Nzambi, udi ushala kashidi.”—1 Yone 2:17.